عـابِـرة سَــبيل ...

[حنان العصيمي]

عابرة سبيل ..

شاعرة سطعت شمس حروفها
وغرُبت فجأة ..

تقول عن نفسها :

أنا عجوز مطلقـة وأم ورعـان
وأيضاً مدام وبنت وآنس وعانس

أنا بدوية وعايشه عند حضـران
وبنت البحر وأبوي زارع وغارس

أميةٍ ماتعرف حـروف وألـوان
وتلميذةٍ دشت جميـع المـدارس

ظفرة وخبلة عاقلة في نقصـان
شرود وأنطح لي ثمانين فـارس

خلوني أعيش العابرة دون عنوان
طيفٍ يمـر بلارقابـة وحـارس

[حنان العصيمي]

ضايقه

ضايقه بالحيل محتاجه أشكي
لولا طبع فيّ يمديني شكيت

بس أدوّر عذر منشان أبكي
لو يدوسون بطرف ثوبي بكيت

كل ما جيت أتريّح وأرتكي
يزدحم في خاطري ألفين بيت

ويش بيّدي أفعله غير الحكي
قاصره خطوات رجلي لو مشيت

أسرعي يا نفس موتي واهلكي
صرتي همي يوم في الدنيا شقيت

[حنان العصيمي]

بريال عارضته على السوق بريال
من باعني برخيص والله لأبيعـه

من يشتري رجّال قصّر بالافعـال
باع العهود الماضيـه للخديعـه

رجّال يسوى له ثمانيـن رجّـال
كل الصفات اللي ملكها فضيعـه

له ضحكةٍ تشبه لضحكات الأطفال
ذيبٍ ونظراتـه حنونـه وديعـه

وله فزعةٍ منها المجانين عقّـال
وفجوج لا ضاقت عليّ الوسيعـه

ياما عدل عوجا ثقيلات وطـوال
وأنا معاقبتـه غيـورٌ صريعـه

والله يسوى لـه ثمانيـن رجّـال
والخبل مثلي لا زعل يب يبيعـه

[حنان العصيمي]

( رسالة من بدوية )

تعال بشـرح لـك أنـا كـل مغلـوق
تعـال شاهدنـي مــع ذكريـاتـي

لا لا يغرك لبس موضـة ومسحـوق
انفض غبار الوقـت تلقـي صفاتـي

قرب وطالع معّـن الشـوف بحـدوق
وزيف التطـور جـرده مـن حياتـي

بتشوف في وجهي من الماضي اطروق
أخذت من بطـن الصحـاري صفاتـي

طفلـة بثـوب مخيطينـه ومفـتـوق
تنطـر جديـد الثـوب بالعيـد ياتـي

سمعت طرف اخبار عن كلمة السـوق
وتاخذ وتسـأل هـو وجـوده ثباتـي

طفله سحبهـا الوقـت للهم برفـوق
حتي انهـا صـارت مـن العاشقاتـي

وجار الزمن وعرض الحـب للعـوق
شـرق ركايبهـا وهـم مشمـلاتـي

واتلا عهدها فيه يركـض ورا نـوق
مسرود جيب وفـي يدينـه عصاتـي

ويصد لكن يلتفت لـي مـن الشـوق
عجـلان يلخصنـي بعيـنٍ تحـاتـي

وقفـى وخطواتـه يتلـن معـلـوق
وخلانـي ماتنقـل عظامـي عباتـي

ودار الزمان ولا مشي الحظ بوفـوق
ومازلـت أخفـي بالظـلام اعبراتـي

ولا زلت أنا العب له علي كل طـاروق
حتـي يجيـب الله موعـد وفـاتـي

[حنان العصيمي]

يسألوني عابـره ويـن الجديـد
والاجابه ضايقـه فينـي ملـل

راحت ايام السعـاده والقصيـد
عشتها بيـن التكانـه والجهـل

كنت اروض شارد الحرف العنيد
ماعسرني لو بغيته فـي عجـل

فيه اصور لوعة الحـب الاكيـد
ومنّه(اشكل) ماحوى قلبي غزل

ومعه (اسافر) عن معاناتي بعيد
ولأجل حبه ماشحنّي من زعـل

احضنه (فرحة) طفل في يوم عيد
واسكنه (روض) الخزاما والنفل

واحتويته ليت لي (قلب ٍ) بليـد
ماعرف (فرق) الجزاله والهزل

والنهايه مابقـى عنـدي جديـد
واعذروني صارت ايامـي ملـل

[حنان العصيمي]

العين بالعين

تدري حبيبي بطعبي حيل وتعرفه
العين بالعين والبادي هو الظالم

ماني ورا العاطفه بالحيل منجرفه
طبعي على صد ردات الفعل والم

الا خيانتك ما املك عندها صرفه
واحذر تحاتي ترى من خونتي سالم

مارضى اخونك ولا ارضى اعيش منحرفه
ماهو عشانك ؛ عشان النفس والعالم

درب الخيانات لو اموت ما اعرفه
لكن يا عمري تحاشى ثورة الحالم

[حنان العصيمي]

هذاك

هذاك لو قال الشتا صيف عرقت
ولو قال صيفي برد شبيت ناري

هذاك لو قال الجمل طير صدقت
واقول ريشه بعثرته الصحاري

هذاك لو قال المطر جذب وافقت
وادور الاعذار حق الخباري

هذاك لو قال القمر طاح صفقت
واقول مللته كثير المساري

هذاك لو قال النظر عيب دنقت
يصير لي كف على اللمس ضاري

هذاك لو ينفي وجودي توهقت
ما عاد ليّه حل ...غير انتحاري

[حنان العصيمي]

مزاج

سمّه دلع سمه غرور وعوابه
سمه مزاج يعشق اللي يناحيه

سمه قساوة قلب سمه صلابه
سمه لعانه سمه اللي تسميه

هذي طبوعي والغلا مو طلابه
يا نور عيني غير هالطبع ما فيه

مليت قلب يشتكي لي عذابه
وتصرفي دايم يذمه ويشكيه

ودايم على طبعي كثير عتابه
درب المذله يامنى النفس مابيه

مادام درب العيب ما جيب بابه
وعهد الوفا ما خنت روعة معانيه

[حنان العصيمي]

الدموع

سالت دموعي و الجروح القديم ...
وهاج الضمير وبدل الافراح بالحزان...

أنا الذي عايش حياه ظليمه ...
ولاني بقادي من ورى حبك احسان...

لجلك شربت المر وروحي سقيمه...
وانت تجازيني على الحب حرمان...

لا تجربون الحب والله جريمه...
اسئل مجرب فيه وترك حكيمه...

تلقى كلامي اخر الوقت قرآن...
ليه السعاده تنكتب لي يتيمه...

ليه الحزن مرسوم للقلب عنوان ...
لكن بنسى و اعتبرها هزيمه...

[حنان العصيمي]

ليل الشتا

فــــي عـــز ليـــل الشتـــا قـــعدت بلحـــالي
مــــا غيــــر انــا و هـــاتفي و البــوم و الــدوه

أنطـــر يبـــي يتـــصل بـــي واحـــــد غــالي
و طفـــيت ليــتي اخــاف انشــاف فـــي ضـــوه

اقلـــب الفـــــيش 00 اخـاف عــاطل بـــالي
امـــوت و احيـــا و عقـــرب ســاعتي تــــــــوه

انـــا فـــي مـــوقف يخــوفني بـه اظـــلالي
و اقـــول مــا قــوم ليــن يقـــول لــي : قـــــوه

و دقـــات قلبــي تــزيد و ينشــغل بــــــالي
و يــزداد خـــوفي لا درت الوجــــه للـــــــــهوه

خـــلاني انطــر حبيبــي المـــذن التــــــالي
عـــز اللــــــه مـــــا ســـوى خيــــر و مــــــروه

[حنان العصيمي]

وشلون يزعل

لا ما يجوز الزعل مابينه وبيني ..
وشلون يزعل وانا اللي شلت تقصيره

وانا على طريف لو ازعل ويرضيني ...
ارضى قبل لايكمل معاذيره

جاك الخفوق بدوي يعتزي فيني ...
يسوق لك من حلاله من مغاتيره

خلاص طوف خطاي ولاتبكيني ,,
وامسح خطايه بوجه الحب والجيره

ارضى وانا اي عذر منك يكفيني ..
ولاتطول السالفه يا مطول السيره

[حنان العصيمي]

آخر موعد


له موعد(ن)لاروّح الليل وياي
أول وآخر موعده مع فتاته

الـــيــــوم مـاتــنــفــع دمــــوعــــه ورجــــــــواي
الــيـــوم تـفــصــل عـــــن حــيــاتــي حــيــاتــه

الــــيــــوم يـعـطــيــنــي بــقـــايـــا بـــقـــايـــاي
وأعـطــيــه أنـــــا مـاشــلــت مـــــن ذكـريــاتــه

الـــيــــوم بــــابــــدّل مــشـــاعـــر حــنـــايـــاي
أـصـبــح مــــن أخــوانــي وأنــــا مــــن خــواتــه

الـــيــــوم يـتــركــنــي لــحــالـــي بــدنـــيـــاي
مــجـــبـــور يــقـــفـــي لــويـــزيـــد الــتــفــاتــه

الـيــوم يـخـلــف عــــن مـمـاشـيـه مـمـشــاي
والله مــاضــمـــن مـــــــن عـــذابــــه نــجــاتـــه

لــــــو أتــعــلــق فـــيــــه مـايــنــفــع بـــكــــاي
خـــــلاص فـــــات الــوقـــت وأعــلـــن فــواتـــه

الــيـــوم بـعـطـيــه الــعـــزا عــقـــب فـــرقـــاي
عـنــدي خــبــر وش قـيـمـتـي فــــي حـيـاتــه

وانــــا الــعــزا مـابــيــه مـــــن كــبـــر بــلـــواي
يـنـفــع الــلـــي عـــــاش وأعــلـــن وفــاتـــه

يــارحـــمـــة الله ســاعــديــهــم بـــســـلـــواي
عـــوضــــه الله بــانـــكـــســـار امــنـــيـــاتـــه

الـــيـــوم يــاهــمـــي ويـــاطــــول مـــســــراي
ويافرحة العذال وأهل الشماته

[ضياء شمس الأصيل]

...

يا كثر شعري


يــا كثـر شعـــرٍ كتبـــته امـــس و البـــارح =و يــا كثـــر شـــعرٍ عقــب فرقـــاه سجلــــته


قالوا عنها الكثير
وقالوا إنها شاعر ومو شاعرة
وقالوا وقالوا
بس سؤال هي كويتية أو سعودية؟
إذا هي متوفية
الله يرحمها
مودتي:34:

...

[حنان العصيمي]

...

يا كثر شعري


يــا كثـر شعـــرٍ كتبـــته امـــس و البـــارح =و يــا كثـــر شـــعرٍ عقــب فرقـــاه سجلــــته


قالوا عنها الكثير
وقالوا إنها شاعر ومو شاعرة
وقالوا وقالوا
بس سؤال هي كويتية أو سعودية؟
إذا هي متوفية
الله يرحمها
مودتي:34:

...


هي شاعِرةٌ كويتية

واسمحي لي بعرضِ بطاقتها الشخصية

في نهاية الطرح

وشكراً لمُداخلتكِ القيّمة يا ضياء أبعاد :icon20:

[حنان العصيمي]

سنين

سنين مامرت علومه عليــــّـه
لاعلم لاطاري ولامن مكاتيب

سنين في صبري وحالي رديّه
بين المحاتى وانتظاري وتعذيب

لا..ليل..لا..فرحه..لا..دنيا هنيّه
يعلم بحالي واحد يعلم الغيب

انا ان تحريت اتصاله عليّه
دقات قلبي ضربها ينفض الجيب

ولو دندنت اساوري في يديّه
اضم انا الهاتف واهل التراحيب

ابا انطره وابقى بعهده وفيّه
وارفض علشانه جميع الخواطيب

[حنان العصيمي]

لا ترفع الصوت

لاترفع الصوت ماني فيك مجبوره
قررت دربي وصوتك ما يوقفني

أرضى أنا بقاسيه أرضى بمغروره
ولا أرضى بعشرة حبيب ما تشرفني

ياما وياما وياما قلت بحروره
حاول تغيير ترى وضعك يكلفني

خلنا نتفاهم تعال نوضح الصوره
إما انت تمشي معي او لا توفقني

مسرور فيني وانا مانيب مسروره
حبي يشرفك وحبك ما يشرفني

[حنان العصيمي]

احتجاجي

قصيدة قالتها الشاعرة ردًا على قصيدة طلال السعيد
قالها أيام الغزو الغاشم على دولة الكويت


باعلن على كلمة طلال احتجاجي
طلال يكفينا تجاريح ياخي

ما انته بلاحئ لا منته بلاجئ
تكفى تراها كلمة تذبح الحي

قل ضيف قل زاير لناس هجاجي
وبكره نرد وكن ماصار به شي

خلك على ماقيل في برج عاجي
لو تحترق كل البشر داخلي فَيّ

شفني وشف حالي وقل ابتهاجي
عقب انقلاب الحال وش صاير فِيّ

من اول كيفي وحره ومزاااجي
واليوم ماعندي من اللي مضى شي

مديت كفي للعطا وطاح تاجي
وبعض المبادي دستها تحت رجلي

[حنان العصيمي]

طيري

طيري غدا بين هالغربان
يامن يدور على طيري

في ساعة خاطري زعلان
بيدي سلمته لغيري

ماهوب غض ولا حقران
يا للأسف ضاع تفكيري

ما جابه الخاطر الندمان
ولا انفعني معاذيري

لو إنه مخلي العنوان
والله لاوريه تقديري

[حنان العصيمي]

فدا الماضي

لاخير بانسان رمى ثوب ماضيه
وبالتالية يسعى لطمس الهوية

للشمس نور يحسب إنّه يغطيّه
ما يدري كفوفه بنوره خفّيّه

وأنا فدا الماضي ليا حل طاريه
أنسى الحياة المترفة والشقية

طبع البداوة عشقي وميتة فيه
وكلّي فخر لاقالوا إنّي بدويّه

إيه أبدويه آخذ الخير وأعطيه
وأبادل المعطي جزيل العطية

إيه أبدويه وأزرع الطيب وأجنيه
الطيب زرعي ما زرعت ألرديه

إيه أبدويه لو تزيد المشاريه
ببقى على عهد البداوة وفيّه

ماألاحق الموضة بسوق المسافيه
اللي لهن كل يوم روحه وجيّه

الله سترني ، ثوبهم ذاك ماابيه
لاصار تطريزه بسلك الخطية

ماني من اللي أثبت العكس وأنفيه
وبيني وبين العيب حوض المنيّه

ومانيب دلّوعه ولا قلت : (أمبيه)
ولالي على كثر الدلع مقدريّه

رزينه وثقلي على الخفّ ابديّه
دام الثقل زينه لعقل البنيّه

كرامتي نجم سطع في لياليه
ولاذلّني مخلوق ما دمت حيّه

لنفسي عليّه دين لاشك أبوفيه
ولا دفعت لمقتل الخوف ديّه

وأقول للي جهل الأيام معميه
مولوده ، وعشت ، وبموت أبدويه

[حنان العصيمي]

نون

هو يعرف أن القصايد خيالات وفنون
واقعي مافيه غيره شريك بدنيتي

مالعبوا اهل المغازل عليه ويخسون
ماشيه في حشمةاللي مشى في حشمتي

من تربي مثلي فبيت عزٍ مايخون
غاليه بالحيل بالحيل عندي سمعتي

ماسهرنا بالليالي ندقدق تليفون
امحشوم اللي نواه الجليل بقسمتي

غالي لو هو يبي قصة العاتق يمون
حجته تبقى وتسقط لعينه حجتي

هو نون وحطه المعتلي في وسط نون
في يدينه دمعتي وفي يدينه بسمتي

[حنان العصيمي]

أغض عيني


أغض عيني عن خطاه وخماله
وأرقع فضايحهم بزين التواصيف

أثاري فيهم ماتفيد الجماله
والناس لاسبوه قلنا ملاقيف

فرقاه صار ونسيته لامحاله
ولاعاد في بوم الليالي لهم طيف

دموع عز ولا ابتسامة نذاله
دنياك مادامت لغيرك على الكيف

[هـيـفـااللاّفـي]

.
.
عابرة سبيل رحمها الله ..
أسم من أسماء جميلة استطاعت أن تضع لنفسها مكاناً في ساحة الشعر
عابرة سبيل
رائعه في البساطة والتركيب والسلاسة والصور
تبحر بنا إلى أعماق كاتبها .. هكذا هو الشعر
يظل مكانها متوجاً بأعذب الكلمات التي خطتها في لحظة عنفوان الشعر..
.
.
وهنا..تسافر بنا عابرة سبيل..
لنكون معها أيضاً عابرون سبيل فقط من أجلها..
.
.
أنا هنا متابعه بصمت لـ هذا الجمال ..
حنان العصيمي
هنا قصائد نسجت بخيوط من ذهب..
شكرا لجهدك ياغاليه
شكرا كثيراً ياأصيله ..

[حنان العصيمي]

.
.
عابرة سبيل رحمها الله ..
أسم من أسماء جميلة استطاعت أن تضع لنفسها مكاناً في ساحة الشعر
عابرة سبيل
رائعه في البساطة والتركيب والسلاسة والصور
تبحر بنا إلى أعماق كاتبها .. هكذا هو الشعر
يظل مكانها متوجاً بأعذب الكلمات التي خطتها في لحظة عنفوان الشعر..
.
.
وهنا..تسافر بنا عابرة سبيل..
لنكون معها أيضاً عابرون سبيل فقط من أجلها..
.
.
أنا هنا متابعه بصمت لـ هذا الجمال ..
حنان العصيمي
هنا قصائد نسجت بخيوط من ذهب..
شكرا لجهدك ياغاليه
شكرا كثيراً ياأصيله ..




لمروركِ عطر باريسي ، لا يُضاهى يا هيفا
كل الشكر يا روح :34:

[حنان العصيمي]

خويّة الذات


أنا آسفة يا قصيدة وابعدي عني
الوقت كله عطيته لامتحاناتي

حتى حبيبي بطيفه لادنى مني
للغرفة الثانية لملمت حاجاتي

الوقت ضيق وانا دروسي يهمني
خليني اختمها مسك آخر محطاتي

ما انكر جميلك علي يا مخففة عني
قصة شقاي وعناي وكل ضيقاتي

أدري أنا منك وانتي قطعة مني
لكن صراحة ثقيلة بعض الأوقاتي

خوية الذات لا لا تزعلي مني
العمر قدام وانتي مرصد آهاتي

[حنان العصيمي]

رجوع المواليف


الأسمر اللي زارني في محلي
الله يجيره من جميع الصواديف

عيا على قطع المواصيل خلي
يومه درى في علتي زارني ضيف

جلس يسليني بهرج يسلي
صادق لو إن الهرج بدعه وتأليف

اليا ضحك جيته من الضحك كلي
واليا سكت ضاعت جميع السواليف

قال التغلي ؟ قلت ما من تغلي
قلت الفراق ؟ قال ما من تكاليف

وقال أبروح وقلت واكبر غلي
وقامت تدق طبول قلبي تحاسيف

ليال عمري كلبوها غدن لي
عداك ياليلة رجوع المواليف

[حنان العصيمي]

الشاعرة / عابرة سبيل

هي شاعرة كويتية ،
اسمها الحقيقي ( وسمية العازمي )
توفت وعمرها " 34 " سنة في عام 2003
ولديها من الأبناء أربع بنات وولدين
بسيطة جداً وهادئة تكره الإعلام
وقد كانت تخفي شاعريتها عن الجميع ولم تخبر حتى زوجها بذلك إلا بعد مرضها
قبل وفاتها قام زوجها بطباعة ديوانها الشعري
ورفضت أن تستلم ديناراً واحداً رغم أن مبيعات الديوان آنذاك
كانت أكثر من ( 40 ألف دينار كويتي ) تقريباً .


المصدر : ( أدب : الموسوعة العالمية للشعر العربي )

[حنان العصيمي]

المشكلة

المشكله ماهيب هذي ولا ذيك
المشكلة لاحبت العين طايش

تزعل ويضحك وان تبسمت يبكيك
الموت جاك وهو بالأفراح عايش

تناقشه يزعل ، تداريه يشقيك
ترقع شروخ ويطلعن لك درايش

ماينتراضى وبالزعل مايراضيك
والصبر يثر بالقلوب الهشايش

[عبدالإله المالك]

شكرا يا حنان ُ ..

على الجهد ..

رحم الله عابرة سبيل .. هي حالها حال الكثير من الشعراء البارزين المبدعين المميزين .. أعمارهم قصيرة كالفراشات ..

[شذرة السيف]

شاعره ابكتني بحياتها ومماتها


.

.

اعشقها حد الغرق

اللي يقولون انها شاعر ماعندهم عند جدي .. انا اعرفها شخصيا ويسعدني ذلك

.

.


حنان

لا شلّت يمناك غناتي
http://www.7looo.com/uploader//uploads/images/7looo.comccb9d8b7af.gif

[حنان العصيمي]

شكرا يا حنان ُ ..

على الجهد ..

رحم الله عابرة سبيل .. هي حالها حال الكثير من الشعراء البارزين المبدعين المميزين .. أعمارهم قصيرة كالفراشات ..

العفو ؛ أستاذي القدير :34:
وكم من عمالقة تقازموا ليصلوا إلى القلوب ...
شكراً لحضورك الذي منح الزوايا الكثير من الصدق ..

[حنان العصيمي]

شاعره ابكتني بحياتها ومماتها

اعشقها حد الغرق
اللي يقولون انها شاعر ماعندهم عند جدي .. انا اعرفها شخصيا ويسعدني ذلك

حنان

لا شلّت يمناك غناتي
http://www.7looo.com/uploader//uploads/images/7looo.comccb9d8b7af.gif

ويسعدني ويشرّفني أن يكون بيننا أمثالكِ في الوفاء يا روح
شكراً لقلبِكِ الذي يُشبهُكِ في البياض :34:

[حنان العصيمي]

لله ابشكي

لله ابشكي (حيرتي ) لله رب العالمين
وامد له كفي (دعا) يالله عفوك ياجليل

يامنتهى (الشكوى) إله العابدين الصابرين
يالله (عونك فزعتك) همي على قلبي ثقيل

جتني (رساله) نصّها ياعابره (حزن وأنين)
مع(تجربه)مضمونها فيه النتايج والحصيل

في شكلها الظاهر (غطا) وفالباطن المعنى الدفين
وفي (حبرها) تلميح لايمكن يصير المستحيل

وانا حقيقه ماعرفت شلون ببدى ياحنين
مدري ابديّ كلمتي أو الزم الصمت الفضيل

لا جيت ابتكلم لقيت الوضع قاسي مايلين
وان جيت ابسكت مالقيت علاج للقلب العليل

لاكنّ (عزايه) مامعي سلطه ولاعندي ضمين
ولااقدر اميّل ماعدل ولاقدر اعدّل مايميل

ماعندي الاّ (كلمة ٍ) فيها العوارف خابرين
القاع لاصارت دهر (يابدو)يازين الرحيل

وخلافها (سلامتج) والله على الدنيا يعين
والصبر عنوانه(فرج) والغيث لابده يسيل

ويامنتهى الشكوى إله الصابرين العابدين
لاحارت افكاري ترى مالي سواك انت الدليل

[حنان العصيمي]

يا ضلع

ياضلع جيتك من الايام منهاره
ركايب الهم مرني وداسني

ياضلع بالله ماتدري عن اخباره
هو حي ياضلع وإلا مخالفٍ ظني

اتلا العهد فيه يوم اللعب بالحاره
ايام لازارني ماسولفوا عني

ايام لا زارني ماينزعج جاره
بالعكس لا من نويت أروح فطني

ايام ماحرموا شعري عن انظاره
بالعكس لامن تبعثر يفهقه عني

ايام ماحرموا للبيت مسياره
ملامحي عنه ماقالوا يخبني

ياضلع ياضلع بشرني عن اخباره
وعلمه ياضلع لا جاء ينشدك عني

[حنان العصيمي]

كيفي

كيفي مزاجي كل شي بكيفي
حره وحره والف مليون حره

باخذ ربيعك منك واعطيك صيفي
وباخذ حلا الايام واعطيك مُرّه

ذوق العنا خله يزاورك طيفي
ذوقي اللي ذقناه ولو كان مَرّه

عقب الهجر يا تعتذر يا وليفي
بأرد لك نص العنا والمضرّه

[ريانة العود]

رحمة الله عليها شاعره لن تسى
سلمت يداك يارقيقه

[حنان العصيمي]

رحمة الله عليها شاعره لن تسى
سلمت يداك يارقيقه

وسلِمَ عطْركِ يا أميرة :34:

[حنان العصيمي]

رجوى

بين رجوى الغريب وبين ضغط الأهل
لاحصل لي صعود ولاحصل لي نزول

إلتزمت آتفرج مابقت لي حيل
اطلعن المشاكل عن اطار الحلول

بس اطالع بعيني انسحاب الأمل
وانكسار البيارق وانتصار العذول

وحلمي اللي رجيته عن حياتي رحل
لملم اللي بقى له وانهزم في ذهول

والأماني تبارى مقفية بالعجل
كن حلمي تهمتها والجواب القبول

[حنان العصيمي]

( كوشة فرحها )

معنى الحياة بعينها صحوت الموت
شهود صلوا والمملك دفنها

وكوشة فرحها حولوها لتابوت
وكليلها الأبيض بقايا كفنها

تبريكهم أصبح عزا يجرح الصوت
صرخة ويبابه تشابه لحنها

غصب عليها تقبل الوضع بسكوت
مهره وعادات البداوة رسنها

أغضت وصدت وأنطلق صوت
مكبوت لابو تقاليد الحياة وسننها

وراحت معاه بقلبها حرف منحوت
يبقى معاها يطوى بدنها

وراحت وبركان القهر لاتها لوت
تبي تصيح وفيه خوف سكنها

راحت وصدى كلماتها زلزل بيوت
لابو تقاليد الحياة وسننها

[حنان العصيمي]

مُهْرة الشوق

جيتك من الفرحة على مهرة الشوق
تسبقني الخطوة على الدرب قدام

جيتك ولا ابالي ولو يطلع العوق
جيتك وأنا شوقي موزعني أقسام

لا لا تهمك ناس ماتعرف الذوق
يسرون تال الليل والصبح صيام

ياعم لامنطق ولا فيه منطوق
بعها تراني بايعتها للإعدام

إخذ الرطب قول النخل يثمر عذوق
خيب رجا اللي يرتجونه من العام

واضرب على الكايد ان ماجات برفوق
مليت انا وياك من عدّ الأيام

[حنان العصيمي]

حيرة

لا قال ردي لي ولا قال روحي
لا هو مريحني ولاهوب مرتاح

يغيب ويعود ويفتق جروحي
واذا استجد الجرح لوح لي وراح

واضحك واجامل وادعي بالفروحي
وبداخلي نار وتجاريح وصياح

واحاول اخفي جروحي بروحي
واخيط جرح وتنفتق عدة اجراح

وان قربت دمعات عيني تفوحي
الله أكبر ، صار لي قلب مزاح

[حنان العصيمي]

( ثروة )

تشوف عيني جملة الناس عدوان
وعقلي يقول اصابعي ماتشابه

وقلبي تبلد من عقب جرح خوان
ماعاد يرد العلم عقب الاصابه

في صمت تجري بي تصاريف الازمان
امشي وعلم الغيب مايندرى به

واحس بالغربه وانا وسط اوطان
يتيمة بين الاهل والقرابة

اوراق مع ظرفين , صورة وديوان
والغلطة اني مدمنة بالكتابه