شعر x شعر .... أبيات لا تكتمل [الأرشيف]

نواف التركي

01-02-2008, 01:25 AM

ياليل عندي سـؤال أرجـوك علّمنـي
أليا متى يورق الدفتـر مـن أحزانـي

أليا متى أنفث الأبيـض ويـ/ ألمنـي
خويـي اللـي لكـل العمـر خاوانـي

ياليـل مليـت كـل النـاس كلّمـنـي
ما دام حظي رمانـي فيـك وأغوانـي

ولاّ مثـل مـا وصلتـك قـوم ولّمنـي
وودعّني آخـر وداع وروح وأنسانـي

ياليل .. تكفى لوجه الصبح ... سلّمني
على مثل ما الغروب لسجنك ... أهداني

نواف التركي

01-02-2008, 01:26 AM

نرجع نغنّـي لـ(مـيّ) الله يذكرهـا
بالخير كانت تعرف الحب وشـ/ يعني

اليوم بالذات تحتـاج أنّـي أشكرهـا
على الأقلّ يوم راحت جت تودعنـي

ياقلب بيبان وصلـك قـوم سكرهـا
في وجه ريح الغرام أن كان تسمعني

كل الوجيه الغريبـه طعنـي أنكرهـا
لا يكرمون الجروح بملحهـم طعنـي

نواف التركي

01-02-2008, 01:26 AM

الصبح باقي عليه شوي ويشرّف
أفتح شبابيك بعض النور وأسعفني

بعانق أول شعاع يطلّ وأصـرّف
هالحزن ... ملّت يدينه همّ تغرفني

من كثر ماني كريم لحزني مطرّف
قلبي لطعنات وجه الصبح تعرفني

نواف التركي

01-02-2008, 01:27 AM

أغليك أي والله يا كثر ما أغليك
لكن شمالي وأن طنى عنك شمّل

عطني بقايا أحلامي الله يخليـك
ما أقدر معاك ب/ هالطريق أتجمّل

أطلب عيوني بس لا تطلب أجيك
مرّه تصد الثانيـه مـا أتحمّـل

نواف التركي

01-02-2008, 01:28 AM

تبين أغنّي بس ..حاضر وممنـون
للصبح أغنـي لـك ولكـن ولكـن

أنا أغنّي .. يعني يضيق هـ/الكون
وما عاد يبقى لك فضاء بـ/ الأماكن

نواف التركي

01-02-2008, 01:28 AM

ما ودّك نغيب أنا ملّيـت هالعالـم
حروف متكلّفـه ووجيـه كذّابـه

الكل منهم لطعنة صاحبـه والـم
قلوب متفرّقه وعقـول تتشابـه

ياصاحب الحزن يا مجنون يا حالم
المنطق اللي أشوفه منطق الغابه

أذا لـ/ هالحين قلبك منّهم سالـم
يالله مشينا لأبوها شعر وكتابـه

نواف التركي

01-02-2008, 01:30 AM

هنيّا ... كان به قلبٍ طحنته في رحى الهجران
تركته في يدك وأثرك توصّيت بعذابـه صـح

نواف التركي

01-02-2008, 01:30 AM

ياصاحبي كل واحد عارفٍ قـدره
لاعوّدت للصحيح يبيّـن الخافـي

ناسٍ تصفّط حكي ووجيههـا ودره
ماعاد يعرف بها مخلوطٍ وصافـي

خل الرجيلي يناقز عند هالخـدره
لا يشغلك طردة الهافي ورى هافي

يا كثر شعّارنا والشعر بـه نـدره
قليل تلقى شعورٍ صـادقٍ وافـي

من شفت ساحاتهم للدون منحدره
سنّدت يم الغياب وقلت يـا كافـي

غنّيت ياسدرة العشـاق ياسـدره
ما مرّك البدر ينسف ليله الضافي

ردي على واحدٍ زابنك في صدره
أهٍ وجعها من البارح وهـو لافـي

لليوم عيّا يفارق ضيقـه وكـدره
وأنتي مثل حالته يلعب بك السافي

لو في يديني على هذا الزمن قدره
ما ضاع مستقبلي وأنا أنظر خلافي

نواف التركي

01-02-2008, 01:32 AM

قل للسماء لا عـاد تمطـر حبايـب
أنا أمتلا ظهري من طعون الأحبـاب

جردٍ رعاها بـ/ أول العمر غايـب
ما عاد يغريها (الوسم) تنبت أعشاب

اللي كسر ظهـره جحـود القرايـب
وشلون يستأمن سكاكيـن الأجنـاب

يا أحباب مالي بالحكـي والطلايـب
وماعاد فيني قلب يستحمـل عتـاب

من كثر ما شافت عيوني مصايـب
شريت صبري قفل وأسكنته البـاب

ألد طرفي عـن بـروق السحايـب
عن كل ما يغري بي قلوب الأغراب

قم غنّ لجـروح الزمـان العطايـب
ولا عاد تسألني على كل من غـاب

وأن عنّت الذكرى وهبّـت هبايـب
سكّر درايشها ترا ( الشوق غلاّب )

نواف التركي

01-02-2008, 01:32 AM

مشكلتك أن الله رمـاك بشمالـي
صعبه ولوّ أخطى يراجـع كلامـه

(شربت مروقه) عاد لو أنت غالي
جاك الكـلام ورافقتـك السلامـه

نواف التركي

01-02-2008, 01:33 AM

تبين عاد الصحيح وخلّـي الهـذره
ما عاد طعم الكـلام المـر يغرينـي

من غاب ما همني لو جاب لي عذره
بس أبتسم له كـأن الأمـر يعنينـي

من يومه أقفى شلعت الحب من جذره
ولا عاد أشوفه بعيني طاح من عيني

نواف التركي

01-02-2008, 01:33 AM

من غبت ..ليل السهر في عيني مواصل
و تقول صبرك علي وأقول وشـ/ باقي

ما كان بين الوصـل وفراقنـا فاصـل
مثل المسافه مابين الحـزن وأوراقـي

أسمعك وأقرأ ملامـح غيبتـك واصـل
ما دام عذرك ذنـوب أهديتـك فراقـي

كان العشم فالزمان أكبر مـن الحاصـل
يا أخر بقايا الغـرام بداخـل أعماقـي

نواف التركي

01-02-2008, 01:34 AM

قالوا الصبر مفتاح الأمور العظام
قلت مامن عظام السالفـه بيّنـه

طفسةٍ ماتبي منّا نشـد الحـزام
لو تجي في ملابس عرس متزيّنه

كل نفسٍ لها غايه وطبع الكـرام
ما تذل النفـوس لحاجـةٍ هيّنـه

نواف التركي

01-02-2008, 01:35 AM

يـا مـداد القصيـد وروح قــرّاءه
ما كتبتك عشـان عيـون قرّائـي

لي ضرره ولهـم بغنـاي سـرّءاه
لـي شقـاه ولـهـم تفنـيـد أرائــي

أكتبـه يسهـرون الخلـق جـرّاءه
والثمن مسبقاً مدفـوع بأطرائـي

ليـت بيديهـم التريـاق وأبــراءه
البلاء أني أشيـل الـداء بردائـي

شاعـرك بالقصيـد يـمـرر أراءه
ويقتنع فيه قبل أصحابي أعدائي

نواف التركي

01-02-2008, 01:36 AM

كنتـي قريبـه قريبـه حيـل لكنّـك
آثـرتـي البـعـد لا والله أثـرتـي
ذبحي بليّا ذنـوب وظلـم مـا كنّـك
إلا تحرين ( غفلة قلـب) وأخترتـي
يومٍ نجـر الغـرام ب/ قلبـي يدنّـك
كان الصدى ياهلابـك بـس سيّرتـي
يمّ الجفى اللي يودينـي علـى ظنّـك
أو كان عذر الفراق السمح وأكثرتـي
لومك عشان الحروف السود يرثنّـك
لو أن قبر الكـلام العـذب حنجرتـي
تدرين حتى الدموع اللـي ب/يبكنـك
ذبحتهن بالسلامه ويـن مـا صرتـي
حمامـةٍ جيتـي تغنيـن فـي فـنّـك
على غصون الجروح الخضر ثم طرتي

نواف التركي

01-02-2008, 01:36 AM

سحقاً لهذا السديم ووجهه الشاحـب
غمّضت جفني عليه ولا وصل بكره
غلطان من يعتقد بأن المدى راحـب
غلطان من يعتنق لو كذب هالفكـره
من علّم الورق تسجع لحنها الناحب
من علّم الصوت يرجع فالصدى مكره
كن لي عدواً ولكن لاتكـن صاحـب
عشان أرد الطعون لصدرك وأكـره

نواف التركي

01-02-2008, 01:37 AM

نامـي بقلبـي والسـهـر لــي خلّـيـه
لا تتعبـيـن عيـونـك النـجـل نـامـي

لايشغلك دربٍ قضى عمري أمشيه
هـذا حفـظ حزنـي ويعـرف هيامـي

للوداي اللي كـل مـا أغيـب وأجيـه
أشوف عمري فـي فضـاه مترامـي

لا يشغلك بعض التعب والمشاريـه
إنتـي عيونـك فرحـة العمـر نـامـي

نواف التركي

01-02-2008, 01:38 AM

يا ( مي ) هذا العمر مقفي على وين
تعبـت خطـاي تـدوج ســود الليـالـي

لا صـوت يندهنـي ولا رفّـت العـيـن
مـا كـنّ لـي غالـي ولا كـنـت غـالـي

نواف التركي

01-02-2008, 01:38 AM

كـم تعبنـا ولكـن ماعرفـنـا الصحـيـح
وكـم هوينـا الصعـود ولا لقيـنـا درج

وكـم هقينـا ولكـنّ الزمـان الشحـيـح
قاسـيٍ مـا يبـي يطلـق يديـن الـفـرج

غن يا حـادي الأحـزان يمكـن يطيـح
دمــع ولا تـحـن قلـوبـهـم لا عـــرج

بي من الروح ما يتبعه صوتٍ يصيح
لا مـتـى وأتعـكّـز لــي بـحـظٍ عـــرج

نواف التركي

01-02-2008, 01:39 AM

مسّيت حبل الكلام وخابت الهقوه
يا صاحبي توّنا بالحكي ما جينا

للفعل وأنت الذي محسوب فالنقوه
وآخيبتي وأول طعونك مبادينا

نواف التركي

01-02-2008, 01:39 AM

مو غبي لكنّي أغفل عن صديـق
مو ذكي جـداً ولكنّـي صريـح

عن قلوب الناس ما خذ لي طريق
ما يودّي لأي قلـب ومستريـح

نواف التركي

01-02-2008, 01:41 AM

عقبك فلا أنشد من خذته الليالي
بتراب كل اللي يروحون بتراب

نواف التركي

01-04-2008, 10:03 PM

خارج نطاق الروح بالضبط ... بالضبط = شوفي لك أي إنسان ثاني وحبيه

نواف التركي

01-04-2008, 11:48 PM

ودّع هريره غداة البين يا حادي = وإلق صوتك بسمعي لين تبكيني

نسّم علينا الهواء من مفرق الوادي = والدمع مثل الغريب ويرقب بعيني

ياقربه إن قلت رجّعني على بلادي = أخاف أكنّه وينزف من شراييني

لو قلت عادي وربي ما هو بـ / عادي = لكنّي أخاف لا أخذل ناس ترجيني

إن كنت ودّعت لك حيٍ فـ / أنا بعادي = ياما سرق من سنيني أجمل سنيني

وإن كان صوتك حزين وشفتني هادي = فالجمر تحت الرماد إن كان توحيني

لا تحسب إنك وحيد بحزنك السادي = مثلك حزين وحنين البعد يكويني

صوتك يحثّ الخطى والشوق وقّادي = وأنا مقيّد ولا به شي فـ / يديني

دعنا نودّع هريره غن يا حادي = فـ / العذل يولع وما فيني يكفيني

نواف التركي

01-04-2008, 11:49 PM

يا حاطب الليل دوك أحطب مواجعنا = نبي نعيش الحياة بطعمها الثاني

خذنا معك للفرج.. وإحذر ترجعنا = ملّت مزاميرنا من لحننا الفاني

فـ صدورنا زفره وغرقى مدامعنا = إحطب دخيلك بقايا حزننا الجاني

يا حاطب الليل لاتسري تودّعنا = ترا الجميع أجمعوا والكل وصاني

إني أكون الكلام الصادق المعنى = لذا تراني بوجه الله تقراني

عن كلّهم ..جلّهم بـ أرتّب ودعنا = ننسى المجامل تحمّل زلّة لساني

قلّي دخيلك ورى تبكي شوارعنا = ليه الحواري تضّج بصمت وتعاني

ليه المدينه حزينه ليه ما معنا = من ذكريات الطفوله ضحك وأغاني

ليه إنتوارى بضحكتنا ونخدعنا = وحنّا نعرف القلوب وحزنها الراني

يا حاطب الليل ممكن بس تقنعنا = إنّا خلقنا كذا والحزن رباني

يا حاطب الليل كانك صدق تسمعنا = خذنا نعيش الحياة بطعمها الثاني

نواف التركي

01-04-2008, 11:50 PM

الليل هذا ليـل حـزن وغرابيـل=من أوله واضح عسى الله يعديـه

وأنا أتعبتني يا ( خميس) المواويل=والشعر والغربه وكثر المشاريـه

أغمض جفوني على الدمع ويحيل=يا ليتني مثل البشر وأقدر أبكيـه

يردّني جـدّي وخالـي وهالليـل=لو ما سترني وين هالحزن أوديه

الشعر لا غايه ولا أبغى محاصيل=منفاي لا ذعذع بـهالبال طاريـه

نواف التركي

01-04-2008, 11:54 PM

ما عاد في حالـي الحالـي=لو قلـت فكّـر وش/ أفكّـر

ماعـاد فـي بالـي أبالـي=الليلـه أحــسّ متعـكّـر

الحـزن مالـي ومـوّالـي=وباب الفرح مبطي مسكّـر

ياصـاح جالـي وفنجالـي=تصبّ بـه ملـح أو سكّـر

نفس الطعم ما أعرف الحالي=بس أنت صبّـه ومتشكّـر

نواف التركي

01-04-2008, 11:57 PM

من بذر للقاء دمعه بـ يحصد وجع
......................................... عادة الوقت ماهي فلسفة شاعرك
أسألي عنّه التوباد يومن رجــع
......................................... ينبأك يـوم مات الحلم وين أخـــرك

نواف التركي

01-04-2008, 11:59 PM

للدرب الأول لـ طاري (مي) رجّعني
قبل أتهاوى هنيّا ضمّني يمّك

لا تخسر الصدق بيدينك تضيّّعني
أخاف لا طحت ما تلقى من يزمّك

معقول يعني يجي يوم وتودعني
معقول (نواف) ما يعنيك ويهمّك

نواف التركي

01-05-2008, 12:05 AM

كل ما أقرب قرّبتني للـ بعاد
وكل ما أبعد تدني بقلبٍ رحيم

لا تخليي طيرها يتبع هداد
ولا تخليني على الرحمه مقيم

نواف التركي

01-05-2008, 12:11 AM

هي / وألاّ / ما أبي هذا الوكاد
قلتها / ما بين زمزم والحطيم

مالـ جرحٍ تتركه (ميٍ) ضماد
ومالـ قلبي من بعد (ميٍ) حميم

نواف التركي

01-05-2008, 12:19 AM

أشبع ترى ماهي بدايم فضيّه = مرّات ما تملى الكفوف الميانه

وأروى ترا ماهي بدايم عذيّه = مرّات دون الماء تصير اللعانه

وأنسى ترا ماهي بدايم خليّه = كم فيه خبلٍ كنت أحسبه تكانه

نواف التركي

01-05-2008, 12:55 AM

ياللي تقولين أكتب قصيده بـ تفسير.=بعضك ترا بعضي عشانك سألته

وش فيك كنك من على الآرض بـ تطير.= الناس تكرهني وش اللي عملته

الذنب يغفر ..بس يحتاج تبرير =. ولا أنت لا شفت الخطاء رحت شلته

يمكن بعض من شافني شافني غير=ويمكن بعض من هو قراني خذلته

نواف التركي

01-05-2008, 03:32 AM

هو أنت صدّقت يوم أقول لك راحل = ولا أنت تبغى الفراق وصارت الحجّه

ضقت وبغيتك لموجات الزعل ساحل = رميت حزني بحضنك قلت لك نجّه

جيتك وأنا منكسر متبهدل وباحل = قلت إنت تملك هدووء يشتت الضجّه

يا سيدي صار خير اللي إلتوى كاحل = بـ أعرج عليه وعسى في هالفضى سجّه

ولا يهمّك لو أغراك الجسد ناحل = لي قلب من وين ما وجهت به وجّه

نواف التركي

01-05-2008, 03:51 AM

ليش بغيابك أشعر بـ إني أكثر حزن = ليه أحس المكان يضيق رغم السعه

ليه كل شي بعيوني ما هو متزن = ليه لا من طرى طاريك رحت أتبعه

سيدي شاعرك أضحى بليّا وزن = جاء معه قلب لكن راح ماهو معه

نواف التركي

01-06-2008, 01:40 PM

لا عاد ترجع ما بقى لك بقايا = ماعاد به شيٍ يساوي رجوعك

أهديتهم قلبٍ برئ النوايا = وأهديتهم حزنك ,, بقايا دموعك

مديت كل اللي ملكته عطايا = حتى تبيّن في زمانك خنوعك

في هـ / الزمن شف كيف رد الهدايا = بالقلب وأن أخطت فؤادك تروعك

لا يخدعك ما ينعكس بالمرايا = حلمٍ هزيل ولا يكفّي لـ / جوعك

طعني وخلّك مرتحل والولايا = تلقى لها والي كثيره ربوعك

لا ترهن أحلامك لحزن الزوايا = وتطفّي الذكرى بقايا شموعك

ما دام باقي روح سوّ السوايا = أن مت يكفي ما فرحوا في خضوعك

نواف التركي

01-09-2008, 01:33 AM

البارحه صوتك ذبح طاري النوم = وضاق الجبيل بـ / عيني وقلت أخليه

وانا بليّا ماني بـ / ناقص هموم = البال فيه من الغثى ما يكفيه

سايق عليك الله لا تكثر اللوم = ما يذبح الرجال غير المشاريه

لاتقول لي غامض ولاني بـ / مفهوم = أدري وربي / فكّني من غثى ليه

الصمت هذا ماهو بـ / سالفة يوم = رحلة عمر وسنين وأنا مخاويه

زبنت لك من كثر الأشواق مزحوم = ما في عيوني غير واديك ياهيه

يا قوم يا وادي العشّاق ياقوم = كم من غريبٍ ينتظر تطلق أيديه

كف الملام اللي حصل شي مقسوم = لو في يديني شي مبطي مسويه

نواف التركي

01-09-2008, 01:37 AM

ضايق ومن عادتي لا من’ صدري ضاق = أروح أهجّيه بعض الشعر ويروّق

والليله أحسّ بأن الحزن فيني فاق = والشعر من فوق ضيقي كنّه يضوّق

الليل خنجر وصبح الناقمين أعتاق = فتّق وعجزت يدين حروفي تروّق

والريح تشلع طنب صبري بلفح أشواق = والدمع مبطي لغزو الجفن متشوّق

يا حادي الركب لا تسجع بلحن فراق = مبطي وأنا من كفوف الوقت متذوّق

رح غنّ عنّي وبلّغ معشر العشّاق = صحبي وقوفاً لحزن أرواحنا نسوّق

من كان مثلي يجي وأقسم معه ترياق = من كأس يصحي من الأهات ويفوّق

نجمع فتات الفرح نسكب على الأوراق = ويولد من أرحام هذا الحبر متعوّق

نواف التركي

01-09-2008, 02:11 AM

تباطيت العذاب وجيت أدّور للفـرح تفسيـر=لقيتك تنبش قبور الجروح وتنفـض غبـاره

هلا يا مرحبا.. وأقلط تفضل يا عساك بخير=تقهوى يا شقى عمر الحزين وغربة أشعـاره

تعال أقلط هنا..ولا هنا واللي تبيـه يصيـر=تعال أفرشلك الخافق ..غلا وأكشفلك أسراره

هلا بك ياشقى البارح..هلا يانفحـة النوّيـر=هلا..وأن كان للغربه وطن فعيونـك ديـاره

يقولون العرب كثر السـلام يقلـل التقديـر=وأنا أشوفه عتب قلب(ن) غيابك حطّم أسواره

ذكرتك وأنحنى حرف القصيد لصطوة التعبير=لقيتك تنبش قبور الجروح وتنفـض غبـاره

تساهلت الغياب وضاق صدر الكون بالتأخيـر=لك الله..ما غفت عين الغريب ولا طفت ناره

نواف التركي

01-26-2008, 03:35 AM

يالله بسيطه كل أبوها تساهيل = ماعاد يغري شي لو تجحدوني

شفني من أول ليل لين أخر الليل = وأنا أتوارى والدموع بعيوني

طاب الكلام ولا بصمتي محاصيل = ونجرك يذكّرني حبايب نسوني

يالدهمشي توّ الليالي مقابيل = اليوم بـ / ضمّد بقايا طعوني

في ذمتي ماني قليّل مواويل = والصبح خايف لا يرّوح بدوني

وأنت البقى والباقيه غربة سهيل = اللي خذاني معه وأتعب جفوني

أرقب مطاليعه ولاعاد بي حيل = وسيوف خلق الله تزارق متوني

لله ياللي جرّة العين بالميل = وأمطرتها حرف وروت من مزوني

بـ / عيونها قومٍ تطارد بهم خيل = ومن دونها الموت الحمر وألحقوني

ربعي .. هلي .. يا أهل السيوف المصاقيل = لا غبت ثم حمي الوغى بتفقدوني

اللي خذتني يوم توّ المواصيل = راودتها خوني لك الله خوني

وعيّت وعيّا قلبي لغيره يميل = وغابت وغبت ومابقى من جنوني

ياخوي ما طابن ولا عاد بي حيل= والعشق لا طعمي ولا هو بلوني

ياسدرة الغرمول للسيل للسيـل = ياكثر من عزّيتهـم و خذلونـي

نواف التركي

03-18-2008, 01:56 AM

يارب وإن كان باب الخلق متسكّر = فـ أنا ببابك وقفت وطالبك حاجه

يارب عبدك وأبن عبدك و متذكّر = ذنبي وطامع بـ عفوٍ منك وإفراجه

يارب لا تحدّني أحمد وأتشكّر = غيرك وأنا ما حنيت لغيرك وتاجه

وأعوذ بك كان خاب الحظ وإتنكّر = عن وقفة الذل والشمّات وإحراجه

يارب جوعي ضماي ومشيي مبكّر = للمسجد وخوف نفسي منك وخلاجه

لا تجعله كـ هالباء إن جيت ومفكّر = ينفع ولا ينفع إلا عفوك إن واجه

عبدك صراطك ومال الذنب وإتسكّر = في وجه نفسي طريق وجتك محتاجه

نواف التركي

04-04-2008, 02:46 PM

من يوم ميلادي = وأنا كذا حالم

تنفيني بلادي = مظلوم مو ظالم

لو طوّل قعادي = في غيبتي والم

قم غن ياحادي = عساك بس سالم

ياركني الهادي = ملّتني العالم

نواف التركي

04-15-2008, 02:33 AM

يا صلاح الحفر ما كنه اللي عرفــــت
.................................لا البيوت البيوت ولا الطريق الطريق

الشوراع بعيني زفت والوضع زفـــت
.................................لا الوجيه الوجيه ولا الرفيق الرفيــق

لا الحواري هذيك اللي تخبره وشفت
.................................بس ظلّـــت أسامـي من زمانِ عتـــيق

يوم ضاقت بعيني هالمدينـه هتفـــــت
.................................لين صوتي رجع كنــّه يقول أستفــيق

أن مشيت أتذكر والبلاء لا وقفـــــت
.................................قمت أديــر العيون بكل فــجِ عميـــــق

أوف يا طول ليلي بالهموم ألتحفـت
.................................والمـدن ما تحس بشاعــرِ مستضـــيق

كل ما جن ليلي من دموعي نزفــت
.................................دمـعـةِ للظياع ... ودمـعـةِ للعشـــــيق

يا خوي ويش قلي من ذنوب أقترفت
.................................يـــوم لا ني مقــــيّد لا ولا ني طليـــق

لي هنا وأنتهابي كل حزنِ عزفــت
.................................لآن ما عاد قلبي للمصايــب يطــــيق

يا صلاح الحفر ما كنه اللي عرفت
.................................كل واحد خذاله في حياتــه طريـــــق

بس مادام راسك صافيٍِ ما أنحرفت
.................................جعل كل البقيه عقب راســك حريــــق

نواف التركي

05-09-2008, 08:06 AM

صاحبي والدرب هذا لو تقاصرته طويل = والمسافه أفة الصبر وطواريق الغرام

روح لا يغريك عود البان لا شفته يميل = لا تميل .. النور توّه وانت قافيك الظلام

رح وربي مابقى تمره ولا باقي نخيل = رح وربي مابقى غصنٍ تناغيه الحمام

رح لك الله مابقى للبيد خيّاله وخيل = تصهل الكدش وطروش البحر ترقى للسنام

عن تواريخك صريخك ماهو بجايب قليل = ما خذاها غير من لا له خوال ولا عمام

عرّب وليدك عشان يذوق من ورثك حصيل = وأن كبر بكره وشاف الذل لحّقك الملام

ليه قلت إنّا عيال العز ما فينا ذليل = ليه قلت إنّا وجيه الناس لا أشتد الحزام

ليه أدنّ النجر من جودي ويسبقني بخيل = ليه أسوق النفس من عزمي ويكسبها الخمام

ذنبك اللي لو تجمّلته ماهو فيني جميل = يوم أمدّ الشوف ما عيّنت مردوم الغمام

ليت قبل يموت صوت الحق ولّعت الفتيل = ليت ما نام الرصاص ولا نطق وجه الكلام

كان ما صارت بيوت الناس للذله مقيل = وكان ماسادت رعاع القوم في ظل الزحام

نواف التركي

06-22-2008, 09:06 PM

ماتبت ؟ كم لليال السود تقتاتك ؟ = ماشبت ؟ من كسرت الأدنين والهرجه

اللي تمرك .. وتكرم سفهها سكاتك = وتروح منها القلوب السود منحرجه

يا طول صبرك على راعيك وإن فاتك = من هالزمن ما بغيته باقي بـ / خرجه

ما يمشي العمر في كيفك ومشهاتك = ملحوق لا شد خيّال القضاء سرجه

وإن سكرّوا بابهم في وجه هقواتك = ياقلب شم عنّهم والضيق للفرجه

نواف التركي

06-29-2008, 05:38 PM

تبي تغيب الله معك بالسلامه = منت أوّل اللي للفراق جبروني

صمتي ماهو حسره ولا هو ندامه = أنا أحترم حزني وأقدّر طعوني

واللي من الخوه فرضت إحترامه = عيب أطعنه لو خنجره في متوني

ماهو بذنبه يوم أعلّي مقامه = ذنبي وأكفّر عن خيانة عيوني

وشلون غرّتها رقبة النعامه = وخلت إبهامي يقضمنّه سنوني

شفني أقابل هـ / الزمن بـ / إبتسامه = وأنا أتهاوى بس تبرق مزوني

حادي تعب نافخ قصب والملامه = ما أتبعتها دربٍ مشوا فيه دوني

نواف التركي

07-13-2008, 09:34 PM

يالركن الأبعد من الضوضاء والـ / لا وعي = يالهادي اللي على مرساك طعم الحزن

أجي من أقصى الحياة أسعى لحضنك سعي = صدرك ملاذي وأنا سيد البحر والوزن

وش عذري إن جيت بور فياضك ولا معي = ما يبعث الروح وآنا اللي عروقي مزن

ياجارة الهادي إن طاب السهر فـ أسمعي = بعض التفاصيل لا تكمى ولا تنخزن

ياجارتي عادت أشواقي وفي مدمعي = أشياء .. مدري.. بكاء .. أحس مو متزن

وأنتي دخيلك قبل لا أبكي معك ودعي = تطمعي بي أحباش خلق الله وأنا ذي يزن

نواف التركي

12-23-2008, 01:28 AM

الليل هذا يجرجر خطوتي للدروب = وأنا رجولي ماهي منّي ولا قاويه !

متقيّدٍ بالظروف الملزمه.. ومغلوب = وفي صدري الناهشات .. تحن متعاويه

وألوذ عنّي.. وتطرقني يدين الهبوب = والأرض كنّه عروش من الفرح خاويه!

الشوق يذبح ..وطاريها يجيب الذنوب! = وظروفي تكود .. والدنيا ماهي ناويه

عنّي ..توّخر بلاويها شوي ..وتتوب = ودّي أشوف الحياة بغير هالزاويه !

وش جاب هذا الحنين ؟ اللي يفت القلوب = من أوقظ الوجد في نفسي ؟ وهي غاويه !

هو المطر في عيون العابرات محبوب = أو شوفة المبطيات من الجدب راويه ؟

أو وقفتي قبل يحمّر الفضاء للغروب = وبين أصبعيني توالي جمرةٍ كاويه !

أو شوفي الغيم يومنّه عبرني لصوب = ( إفليج ) .. مقفي بروقه بالسماء ضاويه ؟

أخيله .. ودونه المسرى وقطع الدروب = وأنا على جال جرف وحدري الهاويه !

خويي أصد عنّه نوب ! ويصد نوب = وأضاحكه .. والنفوس بضيق متخاويه !

وأقول : باكر ترا الموعد ووقت الهروب = ويقول: باكر ..وهي سودا ومتلاويه !

كم لي معه نشبر الدنيا بهم ونجوب = أرض الله وبالصدور ذيابةٍ عاويه ؟!

يارب .. لبّس عزايمنا من الصبر ثوب = ماعاد فينا النفوس القاويه .. قاويه !!

نواف التركي

12-23-2008, 01:29 AM

مرّي بدون إزعاج بـ/ هداي ـ بـ / هداي = لا تقعدين الجرح ..بالله .. بشويش

إقري وخوذي ما تيسّر من غناي = وصبيه فـ / دروب السفر للمطاريش

لا تذخرين من السهر شي للجاي = مو كل لحظات العمر تقبل الطيش

غنّي بصوتك بعض مني لدنياي = أنا تعب صوت الحزن فيني يعيش

محتاج صوتٍ غير صوتي لشكواي = بسمع بدون آه وتحشرج وتشويش

لأني أجرّه لا حشرني من أقصاي = وأغيب وأعطي كل هالناس تطنيش

أحسّ جف الشعر ما عاد وياي = الليله أكثر من كذا .. وأكتب بأيش

الحين غيبي لين أرتّب حكاياي = وعودي بعد ما ينبت لـ /هالشعر ريش

نواف التركي

12-23-2008, 01:32 AM

شفني أقلّب مفاتيح الفرج بيدي = لكن ولا شفت في دنياي بوّابه

ياسمسم أفتح ولا يفتحك ترديدي = أفتح وراي التعب والليل والغابه

لو كلمة الذل يا ( عمي ) ويا (سيدي ) = لو كلمت السر مدح لناس نصابه

أفتح تعبت أتوغل في حظن بيدي = أفتح لبو كل صدق وكل من جابه

أعاهدك بس تطلق من يدي قيدي = أستمرء الكذب سلم أعيش وأحيابه

وأعاهدك كل ما تنضج عناقيدي = أقطف لك أحساس مو مقري ومتشابه

مو كل ما أصيد حاجه ينوكل صيدي = لا والله إلا أبشروا بالذيب يا ذيابه

نواف التركي

12-26-2008, 03:06 AM

قل للخلاوي يا سعد لا تضايق = مبطي وهالدنيا حظوظ وتوافيق

فإن حطوا لحلمك قيود وعوايق = وأن راودوا صدرك تفك المغاليق

فإنت الكبير اللي لهالحزن طايق = ونموذج لكل الوجيه المطاليق

الساكنين بقلب كل الحقايق = العارفين بصدق وش يعني الضيق

أثبت بوجه السخف كن فكر رااايق = خلك جبل لو زاحموك المطافيق

نواف التركي

04-05-2009, 12:36 AM

ما يطرب الشعر غير إليا صعب طرقه = الهيّنه كل خلق الله لها راعي

ولاّ الشرايد تجي جفله ومفترقه = ولا يقنص الفكر غير الشاعر الواعي

فإن كان ما بيّن بعين البشر فرقه = خلّيت كثر الحضور وما لها داعي

من أوّل الليل لين تبيّن الزرقه = وهو معي وين ما وجّهت بشراعي

كنّي سماه وينوض بداخلي برقه = أو كنّه المهتوي والمرقب أضلاعي

يا حادي البوح نوم البارحه سرقه = يخمّ عيني وتقنب دونه أوجاعي

ستاير الصبر سمل النور يخترقه = بلْيت ولا عاد فيها ينفع رقاعي

غريب أجرجر خطاي وطالت الطرقه = متحريٍ كل ليله صرخة الناعي

ما مر في عالمي من غربه لـ / شرقه = فرحٍ يبلّ العروق ولا لفى ساعي

والشعر الأوراق والأوراق محترقه = ليتي قبل ما أكتبه دوّرت مطلاعي

نواف التركي

04-05-2009, 12:38 AM

كانت ليالي وكان الحزن متراهي = واليوم عين القصيد بنظرته شايحه

عزّ الكلام وتركت الشعر لأشباهي = وأدركت بأن المسامع توحي الصايحه

فأن كان يا مي لاحت بسمتي ماهي = رضى ولكن دلالي من سخط فايحه

وحق رمشك وطرفٍ خادر ساهي = ما كان هذا العشم بسنيني الرايحه

أخطيت يامي وأدري عذري الواهي = ما هو مجمّل ولو حطّيت له لايحه

لله يا أنتي وأنا مغرور متباهي = وأعزّ نفسي عن السقّيط والطايحه

ضمّي بقايا غريبٍ حزنه يضاهي = حزن النوارس إليا أقفت بالفضا نايحه

لوكنت سامع نصيحه كان لي ناهي = لكن لي نفس عن خلق الله متزايحه

الصبر ثوب الفقير وستره الزاهي = والشعر معراج روح ودمعةٍ سايحه

وأحسّ به مرّ لا رفرف على شفاهي = وإحس نفسي عن التفكير به شايحه

نواف التركي

04-05-2009, 12:39 AM

البارحه بين حد الصحو والغفله = ماهزّني غير صوت الشادي الناغي

يجر له لحن فوق الدوح وأهتف له = يا عازف الحي صوتك موجعٍ طاغي

فج الحنايا وخذ قلبي معك شف له = جناح يقوى لقلب الغيمه إبلاغي

أبنهمر مثل طعم الحكي من طفله = تعلّمت كلمتين وراحت تغاغي

ما كان حزني عشان الخلق تأسف له = ولا أسأله وين في تغريبتي باغي

وأحس روحي طريدة مبعده جفله = وأحسّه الطهر ويلزّم على إسباغي

وأبلا به الشعر وأغنّيه وأقطف له = دمعٍ تعبت أستره في طارف شماغي

نواف التركي

04-05-2009, 12:40 AM

الله الله ياللي في ظلوعي وقفت = لك ثلاثٍ تلجّ الموحشات تعوي

لو بقى دمع ما قصرت معك وذرفت = لو بقى وجد خلّيت القلوب تغوي

بس والله شفت وشفت واجد وعفت = وبالسما كل يوم أشوف نجم يهوي

خفف الله كثير من الوجيه وعرفت = ماهو بكل من تعرف يسمّى خوي

وإن بالبعد راحه وإنك إليا إكتشفت = علّتك فأعجل بميسمك وأرك الكوي

ما يهمّ القلوب المترفه لا نزفت = المهم في عيون الناس تبقى سوي

أيه كل الشوارع زفت والوضع زفت = خاليه غير من حزنٍ سرى ببدوي

دجت في كل ركن بهالمدينه وطفت = وكان أخر حديث لنصايتها .. لوي

إختلف كل شي بهالزمن ما أختلفت = أتعامى وأجمّل حالتي وأحتوى

الله الله ياللي كل ما أسلى وقفت = من ورى الصدر وأرقبت الضلوع تعوي

والله إني تركتك للزمان وحلفت = بس جاب القوي منك الشديد القوي

نواف التركي

04-06-2009, 05:23 PM

يا سلمى وين ألدّ الشوف عنّك وين يا سلمى = لي سنين أتحاشى وآتنائى وأوصد الأبواب

لي أسنين أقنع أرواح البشر بإن الحزن أسمى = وأصدق كذبتي وأعيشها وأبلل الأهداب

وأحس إنّي مثل ما قالوا أعمى قاد له أعمى = ولكن المصيبه كثروا العمي وطغى الإعجاب

ولا أدري كيف يرجون الضيّا من حادي الظلمى = ولا أدري كيف يرجون الوصل من سيّد الغيّاب

كتاباتي مثل حلم الحكي في مبسم الطرمى = حكاياتي أساطير السنين ورحلة الأغراب

أجمّع ما تيسّر من حنين وأشربه وأضمى = وأعرف أني بموت ولا يجود الوصل بالأحباب

كأن الذكريات أقواس سهم وقلبي المرمى = وكأن الثانيه والثانيه والثانيه أنياب

فهل أرجي بعد هذا الكلام أحلام يا سلمى = وهل كان الشعر إلاّ حنين يخالج الأعراب

نواف التركي

04-11-2009, 01:23 AM

ياحادي الروح بين البوح والعبره = شيِ بسيطٍ على الدنيا مصبرني

فإن كان لابد ينزف شاعرك حبره = أضمن لي الدمع ما ينزف وعبّرني

كبرت حمول الزمان وقلّت الدبره = وعيون الأحلام عميا ما تدبرني

ياطيب حزني معاي وصدقه وكبره = شف كيف بعيون خلق الله كبّرني

عزالله إنّي غديت بـ / هالزمن خبره = من كثر ما كسّر ظنوني وجبّرني

هالقلب قفلٍ قديم وباقي بـ / صبره = مقدار ما يكفي الأيام تقبرني

ما ظلّ بي حيل أعاشر قلب وأختبره = طلّعني من الحديث الموجع أخبرني

هو باقي أحدٍ يحب الشعر وأعتبره = الناقد اللي بعين الحرص يسبرني

وإلاّ تنام الشوارد غبن منجبره = ويدين الأقزام شرهتها تشبّرني

تدري يطول الكلام وتخفت النبره = وأنا التعب للغياب بصدق يجبرني

والبوح هتّاك ستر وداخلي عبره = وشيٍ بسيطٍ على الدنيا مصبرني

نواف التركي

04-15-2009, 12:03 AM

من يوم مات الكلام بصدري ونامت = عيون وجدي نذرت البعد لأقدامي

وأدركت بإن النهاية حق ما دامت = قبلي لـ / شاعر عشان تدوم لأقلامي

هل كان ماراح إلاّ روح قد هامت = في كل أرضٍ تدوّر مرقبٍ سامي

وهل كنت إلا آتحاشى نظرة الشامت = وأحاول بقد ما أقدر أنصف إلهامي

فليغفر الله ذنب أوهامي إن ( قامت = بحمل روحي إلى ما يقتل أحلامي )

روحي مرومة شرف وبعذرها رامت = بلوغ سابع سما لو ترفض أيامي

يكفيني إنّي قدرت أحاول ولامت = خلق الله وما كسر عزمي ولا إقدامي

حتى بلغت آخر اللي يمكن وحامت = روحي مثل كل طيرٍ حرٍ قطامي

فإن كان دنياي قصّت جنحي وسامت = نفسي بحملٍ ثقيل يكسّر عضامي

يبقى العزا كان ضامتني فقد ضامت = قبلي صناديد قومٍ تنطح الرامي

ولدت رغماً عن أنفي منغبن صامت = وبموت رغماً عن أنف الوقت متسامي

فـ / ياصاحبي حطّ رحل الشعر قد شامت = روحي ومات الكلام وجفّت أقلامي

نواف التركي

04-18-2009, 01:46 AM

لاتردين الزياره ..
لاتجيني ..
ما بقى بي قلب يستاهل حنينك ..
لاتجيني ..
لو تشوفيني على أرصفة الشوارع ..
قلب ضايع ..
أتسكّع في ممرات المدينة ..
وتلّقفني عيون الناس وتفتش ملامح وجهي وتقفي حزينه ..
كثّر الله خير قلبك ..
لاتجيني ..

مو رخيصه ..
لا وربي..
كنتي أصدق من عرف قلبي وحبّه ..
كنتي أوفى العابرين من الأحبه ..
آه يا أنتي ..
صار أسمك في حديث القلب كنتي ..
وآنا مليت أتعلّق في ضمير الغايبين ..
وإتعداني السنين ..
غيبي أكثر ..
غيبي أكثر..
لإنك أقرب من قلوب الناس وأبعدهم مسافه ..
ياحسافه ..
مثل طعم الآه كنتي ..
لاتردين الزياره ..

ردّي لنفس الطريق اللي بديتي به غيابك ..
آنا مو محتاج عطفك ..
كثّر الله خير قلبك ..
كان من ذوقك ولطفك ..
بس أنا محتاج أكثر ..
من مجرد جبر خاطر ..
( لو ) تردين الزياره ..

آنا محتاج لعمر ثاني أعيشه ..
شي أكثر من زياره ..
آنا محتاج لكثير ..
حتى لو قلبك كبير ..
آنا يا جرحي الجميل ..
باقي بعمري قليل ..
صدقيني ..
كنت أغرّد خارج أسراب الطيور ..
كانت الأيام بور ..
وكنت أكابر..
وآتقاوا ..
وآتهاوا ..
وآتهاوا ..
وآتهاوا ..
لين طحت ومالقيتك ..
كنت والله ..
أيه وربي ..
كنت محتاجك كثير ..
ما ذكرتي ..
وش كثر مني زعلتي ..
وش كثر رحتي وجيتك ..
ما ذكرتي !!
كنت محتاجك صحيح ..
كنت انادي لك وأطيح ..
كثّر الله خير قلبك ..
أنا مومحتاج عطفك ..
لا تجين ..
لا تردين الزياره ..

نواف التركي

04-18-2009, 01:57 AM

تعرفين اللي يغنّي ..
( عيونك أخر أمالي ) ..
تعرفينه ؟
سمعته قبل مدري كم سنه لكن ..
ولا حسيت به لحظه ..
وكان يدندن بعوده ( عيونك أخر أمالي ) ..
( وليلي أطول من اليم ) ..
وكنت أخر من يفكّر يجي يوم وأحس مثله بـ هالأحساس ..
ولا ذكرى ولا عاشق ولا أيّة هم ..
وجيتي مدري من أيّة سحابة تمطرين وكنت ..
أحسب إن المطر نعمه ..
وأبلل في ظلوعي قلب ..
وينبت من سحابك حب ..
.
.
.
( عيونك أخر أمالي )
وصرت أعرف أغنّي مثلهم وآحب ..
وصرتي يم ..
وصار الليل بغيابك مجرد هم ..
وصرتي تستلذيني ..
تغيبين أكثر وأكثر ..
وصرت أشتاق لك أكثر ..
ورحتي تبعدين أكثر ..
وصرتي أخر أمالي ..
وصار الليل مثل اليم ..
وصرت أبحر بلا مرسى ..
تجدّفني يدين الهم ..
.
.
.

ولا ذكرى ولا عاشق ولا أيّة هم ..
لو أرجع بس مثل أول ..
بليّا هم ..
لو أرجع بس مثل أول ..
بلا حب وبلا عشق وبلا أيّة هم ..
لو أرجع بس ..

نواف التركي

04-18-2009, 01:59 AM

أغيب وأرجع والسخافات هي هي = وأستاحش لقل الكلافه وأفارق

أخترت نصفي ميّت ونصفي الحي = يكون في حزن المسافات غارق

نذرت أكون لعتمة أحبابي الضي = وظلّيت من عمر البدايات شارق

أرمي بنفسي دون عثراتهم لـ / أي = سيف وأموت ولا تطيح البيارق

ما أقول أنا اللي ما طرق راسه الغي = لكني أكثر من زهد كل طارق

ماغير ( مي ) إليا طرقت خلوتي (مي) = تسطي تقل رمحٍ على القلب زارق

تمر كنّه ضحكة الطفل أو زي = بشارة الأرض المحيله ببارق

تضحِكني إشويّ وتبكّيني إشوّي = وأحس معها غصن الأيام وارق

ماكنت أفرّق ذي عن ذي عن ذي = وعقب أبعدت عرفت كبر الفوارق

مات الكلام ولا بقى للضمى فيّ = والوقت لأجمل ما ذكرناه سارق

نواف التركي

04-18-2009, 02:01 AM

نواف التركي

04-18-2009, 02:02 AM

اللي يقول إن كل مطرود ملحوق = قلّه تريّح راحت أعمارنا طرد

ماعادت الأمثال لأحلامي تلوق = وهمومي طروشٍ على خافقي ورد

خلّك من التمثيل واللطف والذوق = ما للمقرد غير تدريجة القرد

نواف التركي

04-20-2009, 04:08 AM

دع الشعر وأساطير الكلام وفلسفته وراع = إلي .. وأفهم ..وبطّل من قناعاتك بإيهامي

بأن الشعر نوع من الترف وإن القصيد أنواع = وأنّ ..وأنّ .. وتأنأن علي وتقطع إلهامي

ياعمي هدّ مو كل القصايد ذوق وإستمتاع = بعضها ما يضع رحله يا كود أقطّع إبهامي

تبي عاد الصحيح أقرب وأسولف لك عن اللي ضاع = قبل ما أجمل تفاصيل الحياة تموت قدامي

لي أكثر من ثمان سنين ما تقضب رجولي قاع = كأني موكل أقيس الفضاء بخطوة أقدامي

ماهي لحية شعر طس السبيل بنكوي الأوجاع = وشغلّي مهلي خل صوته يبري ألامي

ترا يكذب عليك اللي يقول إن الفجوج وساع = إذا تقدر تموت بديرتك مت جايعٍ ضامي

وحق الله يـ / أني كل ما دكّوا على المهجاع = أغنّي للعيون عن السهر يا نكبتي نامي

ويشق الصبح من عين الظلام وما رضت تنصاع = ولا يطري عليها تستريح أتلذذ أحلامي

لك الله بس أدوّر في متاهات الزمن مطلاع = ولا أرجي غير أريّح من شقاي بمقبل أيامي

ماني ناقص يطيح قناع خلف قناع خلف قناع = يكفّي خلّها بس إتّحمل ثقلي عظامي

وإذا غرّك وصول التافهين وذكرهم لا شاع = فصدّق لو عرفت شلون وصلوا تشكر أقدامي

نواف التركي

04-20-2009, 04:19 AM

بتعيش تاكل غير هذي وبتعيش = من قال لك يعني تسوي هواوي

يا لله ياعمي جت بسيطه وبالريش = بكره تحلّق فالسماء يا النداوي

عادي تعوّد تعطي الوضع تطنيش = وغب كثر ما تقدر وخلّك خلاوي

وأنزح عن التخمين والشك والـ / ليش = وصمّ عن كلام / العاشقين الحكاوي

تراك في وقتٍ يعزّ الدراويش = ويرخص مقام أهل الشيم والنخاوي

عدّى زمان الطيش يا راعي الطيش = وبعيوننا صار الزمان متساوي

ما عادنا بعيون خلق الله غويش = كبرت مشاريه العرب والهقاوي

نواف التركي

04-20-2009, 04:20 AM

لو يعرف السافل بإنه سافل = ما كان حاش الطيب واحد غيره

لكن يشوف إنه لجيله نافل = وكلٍ بعقله راضي وتدبيره

مو كل ما مرّك شرودٍ جافل = إقصيت نزفك في أثر تقصيره

إسكت وخلّك واعيٍ متغافل = ما لك بـ / شر الناس ولا خيره

دع ذا وربّك للبرايا كافل = وأنسى وفض لـ / هالعلاقة سيره

نواف التركي

04-25-2009, 01:08 AM

والله حتى القصيد أحسّ كثرّته = والناس ماهي بـ / أرض وماني بـ / صيّب

لكن عزاي إن من يقرى فلا أجبرته = يجيني بطيب نفس ويرتحل طيّب

والشاعر اللي عروق القلب محبرته = ما هو ولو طال ليل الوجد متهيّب

وش عاد عقبك وباب الحب سكّرته = كل المنابر تقول لشاعرك غيّب

لو كان بالدمع خيره يمدي أخترته = لو بالصبر فود ما خلاّني أشيّب

فإن كان قلبي بليل الحزن سامرته = ما هو بكل الليالي منّك قرّيب

نواف التركي

04-27-2009, 01:38 AM

كان تبغى الكلام اللي عليه الكلام = صكّ قلبك عن قلوب العرب وأستريح

مرّ بعيون خلق الله مرور الكرام = ما يضرّك ملام ولا يسرّك مديح

المقامات ما تحشم بوسط الزحام = لا يضيع الغناء بين العواء والنبيح

وأنت عقلك معك والمعذره والسلام = وبعد أذنك بدوّر لي مكانٍ فسيح

خاليٍ غير من صوتٍ يفجّ الغمام = لين وبله على جرد الحنايا يطيح

يمكن يعود يصدح للقلوب الحمام = يمكن الشعر يرجع مثل الأوّل فصيح

نواف التركي

04-29-2009, 04:11 AM

بعض هالناس بالدنيا كمالة عدد = لايزوّد كثير ولا يقلل قليل

لا يسرّك قريب ولا يضر إن بعد = بس حملٍ على ظهر الليالي ثقيل

والمسافات ما تطرق بليّا مدد = كيف عاد إن تخيّرت الطريق الطويل

سم بالله وأبدا لا تلفّت لأحد = أمش ما فيه شي بـ هالزمن مستحيل

ودّك يقال شاف الموت لكن ورد = الرجل ما يعوّد عقب عزّه ذليل

خلّك الغيم لا زمجر بصوت الرعد = ما يروّح يا كود الأرض منّه تسيل

قل أعوذ برب الناس ممن حسد = وإتقِ شر من سويت فيه الجميل

ماهو بكل من يرزع بيومٍ حصد = لا تدوّر من قلوب الأوادم حصيل

نواف التركي

05-05-2009, 03:26 AM

شايفك لو كنت أسوّي ماني بشايف = وأبيك تفهم كذا وتجنّب إزعاجي

قلبي غريب متوّحد مبعدٍ عايف = متنائي عن القلوب بـ / هالركن لاجي

أجيه في كل ليلة وأرقب النايف = وأرفع يدين الذنوب المبطيه راجي

وألوج والجّ عبدٍ مؤمنٍ خايف = يارب يارب زيّن درب مخراجي

ملّيت من بهرجة هالعالم الزايف = وأخترت من هالمكان يكون معراجي

أمرّ وجه السنين المظلمة حايف = وأبوق ضحكة تحلل عقدة حجاجي

تدري يـ / لولا القصيد وغايبٍ طايف = طاريه بين الضلوع إن كان ما أناجي

لكن عسى خير ويش بعزلتي شايف = الله يرضى عليك تجنّب إزعاجي

نواف التركي

05-14-2009, 03:15 AM

مو غريبه , لا خذانا البعد لأبعد , القلوب أحيان محتاجه لـ راحه ,
والصراحه , صرت محتاج أبعد أكثر ,
ما لقيت أنقى من الوحده ولا أجمل , إنك المبعد بجرحك ,
وإنك أقرب من بعيد وأنك أبعد من قريب وأنّك الصانع من الـ لاشي شي وإنك الزاهد بـ غيّ وإنّك الأكثر علو
منت محتاج لـ غلو , لأنك الساكن بقلب المعدمين الأبسط الأقرب لنبضك ,
تدري إنت أن الشعور الصادق أبلغ ,
وأن طعمك في عيون الناس سكّر , وأن أجملك إبتعادك وأنك أجمل في غنائك , وإن حكي الصامت أبلغ ,
عاد تدري , في غياب الوعي وشـ عذر المحابر ؟
أنها قدرت تكابر ,
وآنا محتاج أبعد أكثر ,
عن حديث المنهكين البالغين من التعب حد السقوط ,
عن بقايا أرواح يسكنها القنوط ,
عن مساحه ما بقى فيها لـ أحلامي مساحه ,
القلوب أحيان محتاجه لـ راحه ,
يا أحبّه ,
كان عذري ما وصل حدّ العفو عذراً عليه ,
ياااااا أحبّه ,
يااااا أحبّه ,
أكره أقرب قلب منكم , أكره أصدق قلب فيكم ,
لأنّي إن حبّيت شؤم لمن أحبّه ,
لأنّي أفقد أي شي إن قلت أبيه ,
كان عذري ما وصل حدّ العفو عذراً عليه ,
مو غريبه ,
لا بكى المرغم على المنفى دياره ,
حس جاره ,
ذكرياته ,
أمنياته ,
كل شيٍ كان يسوى في حياته ,
مو غريبة
مو غريبة
الغريب إنّي كثر ما أبعد أحبّك ..

نواف التركي

05-16-2009, 03:21 AM

البداية ..
عادةً تأتي بلا أيّة بداية ..
تنخلق من رغبة الهاوي مراودة الخلود ,
تشبه إحساس الـ تحرر مـ القيود ,
تبتديك بلا سبب , تدمنك تاخذك لأبعد من توقّعك الوصول ,
تاخذك منّك إليك ,
لين تتوغل بذاتك , في سكاتك , فـ التفاصيل الصغيرة , من حياتك ,
لين تتوحد مع الأشياء حولك , لين تنسى من تكون بزحمة التكوين والبعث الجديد ,
كثر ما تتوغل بروحك بتبعد , وكل ما تتوغل أكثر تبعد أكثر , لين تجهل من تكون وكل ما كنت يتلاشى ,
وتبدا ترجع من جديد , تكتشف إنّك بعيد ,
وأنّ قلب أمّك بسيط , وإن حلم أبوك أبسط , وأنّك الجامح لحلمٍ ماله حدود وملامح ,
لو قدرت بأمنية ترجع بعمرك , إرجع لمولدك الأوّل , عيش ثاني كل ذرّات الثواني ,
من يشقّ النور نوّر , من يطيح الليل ليّل , مثل كل الناس خلّك ,
لا تروح أبعد من اللازم كثير , لو منحك الحلم ريشه لا تطير , لا تغادر , لا يغرّك ملمس الحلم الحرير ,
تدري إنت إن الزكاة تحلّ في إبن السبيل , وأنت أرضك من ذهب , لا تكون اللي ذهب , كن مثل أرضك عريق ,
الكلام يغصّ في فمْه الكلام ,
وأتعثّر بالوجيه الفارغه من كل معنى غير من صف الكلام ,
كانت الرحلة تعيسه للأسف ,
البداية خطوة لـ لأي إتجاه ,
بس الأصعب كيف تكتب في نهايتك النهاية ,
كيف تقنع كل من حولك , ذبولك ,
كيف ترمي الورد تطفي الشمع يغرق في عيونك دمع تنسى نفسك بلحظة وتكتب ,
عذراً لكل القلوب اللي مشت وياي واللي ما تقاطعنا أبد ,
ما أظن أن الكتابة بالنهاية تعني إنك قادر تصيغ النهاية ,
بس أكتب , مغلق لأشعار أخر , وأقفلك بالشمع الأحمر , وأنتهينا بالسلامة ,

لم أكن أعتقد أن هذا المتصفح سيمتد بي لـ لانهاية , لكل شئ عمر إفتراضي , أعتقد أن عمره تجاوز الحد المسموح به , ستكون هذه المشاركة الأخيرة , فقد آن وأده , قبلة لكل القلوب التي قرأتني من خلاله , ودمتم بود .