|
كيبُورديّة للمشَاركة في فعالية شيفْرَة شاعر وقَد تمت كتابتها بهذا الشكل ، وأخذو منها خمسة ابيات نظرا ً لتجاوزي العدد المطلوب للمشاركة: الجادل اللي ملاحمها : ملامحها ،،،،،،،،،،،،،،،، كم جنْدَلَت نَاس ، واخرهم هَوى راسي! في عينَها كم غرق واحد ، وسابحْها ،،،،،،،،،،،،،،،، زين ان وقف بعدها عاقل ومتواسي! لامن مشت كل عين تمر تلفحها ،،،،،،،،،،،،،،، وتروح نظراتهم صفرا ويبّاسي في مشيها تحسب الطرقة تمازحها ،،،،،،،،،،،،،،،،، ياقو قلبي على الشوفه ، وياباسي! زعيمة النور ، يوم النور صالحها ،،،،،،،،،،،،،،، رفيقة الأنس ، دام الصمت جلاّسي إسوارة الحكي ، يوم الحكي رابحها ،،،،،،،،،،،،،، بها يزين الكلام ويطرب احساسي لو ماوصلني سوى همي مسامحها ،،،،،،،،،،،،،،،، يازين ليلي لو انه لابس ٍ ياسي يكفيني اليا ذكرت اجمل ملامحها ،،،،،،،،،،،،،،، اسعدت عين ٍ تخيل ،،وكيّفت راسي! |
لاصرت من بَدّل حبيب بسهُوله
،،،،،،،،،،،،،، مانيب خسرانك ولانيب كاسبك لك امنياتي والأماني عجوله ،،،،،،،،،،،،،، تسبق كلامي قبل اجيلك واحاسبك |
تصدق كثر ماتنسى حبيبك ،،،،،،،،،،،،،،،،، اقول الله يسامح من نساني!! لأني مانويت اني اصيبك ،،،،،،،،،،،،،،،، سوى في حب يمطر به كياني! |
ياكثر ماجيت لك ، واللي يجي منك غير ،،،،،،،،،،،،،،،،،،،،،،، وانا مع اللي يجي منّك ، اسامح ، واجي! الفرق بين الوفا ، والتسلية ، في الأخير ،،،،،،،،،،،،،،،،،،،، شفني وقفت انتظر للوصل منك ارتجي! ان جيت لك قلبي اللي ماوضع لك خشير ،،،،،،،،،،،،،،،،،،،،،،،، وان رحت ، عادات امانينا تعيي تجي! |
"سَلامْ" يا"تَافِه" ولوّ انّّك عَدو ٍ للسّلام
،،،،،،،،،،،،،،،،،،، وانَا يِمِيْني صَافَحَت رجّال ، وتْنّازِل قُويّ ودَامَ انْت مَجْهُول ، ونُوايَا خَافقِي بِعْد الغَمَام ،،،،،،،،،،،،،،،،، عَن مِثْل مَاتَنْويه يَا"تَافِه" ، ولِي طَبْع بْدُوي ان جِيْت انََازِل جِيت وَجْه لوَجْه ، وعزُومِي حِِزَام ،،،،،،،،،،،،،،،،،،، وان جِيْت اعدّ الطّيْب عَدّيْتَه وكِنّه لي خَويّ وانْ كَان فِي قَلْبِك حُثَالاَت الحَسَد تَبْنِِي خِيَام ،،،،،،،،،،،،،،،،،،،، الله يعِيْنِك دَام ذيِب الخُوف يَعْويْبِك عَويّ وطَبْع النّسَا والخُوف يَا"تَافه" لِمثلِك إحْتِشَام ،،،،،،،،،،،،،،،،،،،،،، تِسَتر وخَلك كِذا خَلْف "الوضَاعَه"مِنْزويّ |
كِل ذكرى ماتجيبك للحبيب
،،،،،،،،،،،،،، ماهي إلاّ تسلية باسم الهوى! جيت لك ياما ولاشفتك قريب ،،،،،،،،،،،،،،،، والوفا صرحي ، واشوفك من هَوَى!! |
تعال تاخذني من البُعْد والغِير ،،،،،،،،،،،،،،،، ملّيت أنادي ، والمَدى فزعته:رُوووح!! |
كم شَارب ٍ لاشِفت راعِيه يخْدعْك ،،،،،،،،،،،،،،،،،،،،، وتحِط له مِقدار يشتَال إسْمه! مَاهي سِذاجه مِنك! ، مِن طِيب منبَعْك ،،،،،،،،،،،،،،،،،،،،،، تحْسِب فُعول النّاس مِن قول : كِلْمَه! تقول : يارجّال ، وتحسْب يسمَعك! ،،،،،،،،،،،،،،،،،، واثرك تنادي شَاربٍ مَات عِلمَه!! ويَاشَارب ٍ خَايِب لَو المُوسْ يَقْطَعْك ،،،،،،،،،،،،،،،،،،،،،، أخِيْر مِن وضْعِك عَلى وجْه "حِرْمَه"!! |
| الساعة الآن 07:02 PM |
Powered by vBulletin® Copyright ©2000 - 2025, Jelsoft Enterprises Ltd.