المعلقة الصبحية
( تاريخ الروح .. تذروه الرياح )
[poem="font="simplified arabic,4,black,normal,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]
( الثوب شامر و العمامه قضيفه ) * = والعلم غانم والنوايا نظيفه
وان قيل عشقك قلت عشقي عفيفه = مهبط من اللذه ومرقاب للنور ْ
الحزن عرّش في عيوني الحزينه = من بعد ما كانت نزول ٍأمينه
صارت خرابة وحش دمع المدينه = لا غصن ميالٍ ولا رقص عصفورْ
روح الصحاري وسط قلبي تناشا = عشرين عام ٍ مدهراتٍ عطاشا
و ان فز غيم ٍ في ثواني تلاشا = نوق الامل ماتت فأيامها البور ْ
حضّرت في صبح السعادة غيابي = و اسقيت حلمي حثربات السرابي
حتى نعق باسمي لسان الغرابي = وانحيت في جنب الأمل طفل مكسور
يا سامعين الصوت ... غنوا حروفي = و الله ما اسمع غير ياسي و اشوفي
فوج التعب في صحن قلبي يطوفي = دبّ الشقا في فرحتي ذر ّ مسعور ْ
في جيب ثوبي خيبتين وقصيده = آهات منسيه و آه ٍجديده
و ايام مرت بس ماهي سعيده = و اشتاق لانسانه من اشباهها الحور
الدمع يابس في عيون السؤالي = شاة الجواب تخاف ذيب احتمالي
يشرب من دروبي ويسقي ارتحالي = ويبيّح اسراري لنشّادة الدور
يا عشقي المخلوط هجر و أغاني = يا نيل لذاتي ودجلة حناني
لازلت من رؤياك دهش الجناني = ازور بيتك و اتلمّس ندى السور
حرّقت لاجلك كل شي ٍفـ الاعذار = جهلك بودي واحتراسك من الجار
والعاذل الملعون بوّاح الاسرار = ازقف فؤادي .. انت يالزين معذور
الشوق عجلٍ والاماني عطيبه = والهم مدخال القلوب السليبه
لا زاد يهنا لي كذكرى الحبيبه = و انا مودع لكن العشق مغرور
باكتب وصاتي وادري انك ماتدري = و ان جاك علمي زورني اليوم بدري
تلقى زهورك نابته فوق قبري = واياك تبكي حيثني فيك مقبور
غيمة وصالك ارعدت ما اسفهلت = جاها رويعي الشوق ينشد ما هلت ؟
شدّت قليبه للسما ثم خلّت = بينه وبين الوصل راعد و محجور ْ
حكّلت لي دله من الهم مُرّه = و اسقيت منها صاحبي بس غرّه
كثرة كلامي عن حبيبي وسرّه = روّح وخلاني وحيد ٍومهجور
جمر انتظاري كلّ ماله يزيدي = هفهفاف من تحته سوافي نشيدي
و قشاش من ذكرى حبيبي تقيدي = خلت غيابه غصن أخضر فـ تنّور ْ
هذي الأثافي من بقايا حنيني = حرّق حجرها موحشات السنيني
و اطناب ليلٍ قد سكنته حزيني = عوّد كما الماضي طويل ٍ و معمور
مسراح رعيك يا حبيبي هنيّه = تاكل من افراحي وتترك شويه
للقلب ياكلها لحون ٍشجيه = و يصيح ضاوي : ياعرب عشب مسحور ْ
همي وحبك غربتين و حكايه = اطلقت ْصوتي وانت نغمة صدايه
الوجه وجهك وانا عند المرايه = كنك بنظراتي معلق ومبذور ْ
طاح الظلام و عوّد الصر ّعشّه = و انسْت من لفح التباريح رشّه
هيا نجمّع للشقا روح قشّه = ونسيّر المغنى إلى الصبح طابور
راضي بحظي من حياة الندامه = مادام قلبي طاهر ٍفـ انهزامه
ماهمّني لو قيل خالد علامه ؟ = يجفل من العربان زاهد ومذعور ْ
تنصاك شمسي يا شروق الحبيّب = يا ضلع ريحان ٍ و يا شِعب طيّب
يا ليت ردبي من نسمْها قريّب = لكنني في البعد حارس ومأسور
عود الهوى شقّق منابت فؤداي = تسقيه من عيني دموع البعادي
و ان جاه نحل عسّله في مدادي = شمّع تناهيد ٍعلى فمّ مهقور
من خضرة الدمعة عرفني المزارع = زرّاع في وادي الهوى عاش ضايع
وسّم مراويها : غرام وشوارع = و اظنها يا شبّ ترديك مغدور
هوّعت ما غثا على كبد حرفي = من حرقة الألحان غمّضت طرفي
حتى غسلت الخط غضٍّ وترفي = عريانة الآهات لبّستها سرور
بيني وبين الناس نظرات وظنون = تاكلني الغربه و ربعي يشوفون
قالوا مذبذب قلت وحصاني جنون = لله سجّادٍ و بالشعر مخمور
واللي لمسته من لهيب الوداعي = حرّق مسافاتي وحرّق صباعي
يارب تلمهني براد الدواعي = واصبر قليبٍ على الشط مشطور
فوق المنابر طار قلبي يحومي = تاريخ يا جاهل تعلّم تقومي
لا جيت طربانٍ و هرجي غيومي = بشّر عربنا بالمطر تفرح طيور
اليوم يا العابر تغسّل غبارك = وتعلّق الخطوه على باب دارك
يرمد لهاثك بس علّم صغارك = لا تسكن الذله ترى العمر معبور
جلسات قمرا وسط خبتٍ رحيبي = فنطوس يرجف طوع سلك ٍطريبي
عيجان ملتويه وعاج ٍ عجيبي = برّاك طربان وعوّاد مزيور
معقول يا حيٍّ مقابر تربيك = حيثك لمست الموت منها بـ ياديك
علّمت ميتها دعاك و أغانيك = و اعطاك موعد ممتلي شوك وزهور
الجيل جيلي والمكفن شهيدي = فتيان طياره على ما تريدي
صبوا لي البسمه فكاسٍ وحيدي = و اصبحت و القاهم على دفتري شعور
وانفضّ سامرنا وبان المشيبي = الوقت شيبنا ودمع الحبيبي
اشتات رحنا في فجاج النصيبي = لاخلّ متذكر ولا خلّ مذكور
أقدار تزرعنا و أقدار تحصد = و انا مسوّي وسط مغناي مسجد
أتلو قصيدي فـ اتوضا فـ أسجد = فاستغفر الغفّار عن كل مغفور
ما بين نخل امسي وعرجون باكر = أحيا معاني الدرب عند المسافر
من جمعة الأحباب يبكي المشاعر = ياصل دياره والتعب طلع مابور
ياما سهرنا فوق صدر الدفوفي = نحفر عن المغني رمال الظروفي
لاهين عن شرطة خفير الحتوفي = يومه يفخّخ صبحنا شوك وقبور
شفنا افتراس الحرّ سرب الحمايم = قمنا نغطّي الهمّ تحت العمايم
مهدود فينا بيت باربع قوايم = درات رحى فالقلب لسّاعها تدور
هذي الجبال البغث والحمر والسود = قلبي وطنها والوفا حولها حدود
واشيل عنها من عنا الوقت جلمود = لاهبّت الذكرى غدا فرخ شحرور
مخنوق يـ الشاعر فـ كيس انعزالك = مالت من اعيونك عذوق اشتعالك
اجتثها الحصّاد واعمي خيالك = وارتاح من حرف يحركه له بذور
ليش التمنّي والرياح امحشوره = في ربقة ٍتحتاج ختم ٍ وصوره
عشان تنزع عن رقابٍ صبوره = ما تزرع الثورة ولا تعرف اتثور
ليش التمني والقلوب استكنت ْ = في زربة التدجين درّت و حنّت
يا ويل شاة ٍعن علفها تمنّت = أيام معشوبه لإنسان ممطور
و احنا ورثنا الدمّ .. دمّ الصحابه = أربع عشر قبرٍ تولّد إجابه
عن بذرة المنفى وحزن الربابه = فرسان فـ الغزوة ولو بيننا دهور
وذّنت في ياسي وصلّيت وحدي = خلّصت ركعه وانتبه وان بعدي
صفّين تتبعني وصفّين ضدي = واكتظت الدمعه مصلين وسطور
الزيلعي مسّه من الشعر جنّي = أسبوع ما وقّف يهتّ و يغني
يحصد يقين و ينزرع وسط ظني = مجموع من صمته و فـ الريح منثور
يا ناقر الزير المحماة دوبك = قشّاط في جلدي لحَنْك و طروبك
الناس مغشوشة وتعشق لعوبك = في ليلة ٍما مثلها اللعب محكور
صفّين وقّافة و عشرين بالكف ْ = في ظلّ ربّان ٍ إذا ونّ وقّف
يبدع من التلحين ما يشعث الصف = قال : انجزوا لي فـ الهوى وعد بلفور
مجهول هذا القبر لا تنشدوني = و ان كان في قلبي ويملا عيوني
منصوبة الشاهد حقيقة ظنوني = و تمرّه الدمعه على خفيه مرور
اقرا عيون الناس قرطاس يابس = اوطان منفيه فـ تعبير ناعس
غيمة أمل تمطر على بحر يائس = وتلحّف الأجفان برموشها بحور
لحظة كتابة شي يسبق ظنونك = تشبه تعلقك برجاحة جنونك
لوّنْ رماد الحب قبلة عيونك = لحِّن مسافاتك على لحْن مجرور
علّمني الشارع عن اللي يمرون = في صمت ليل الهم .. واللي يطلّون
من طاقة الموتى على اللي يشوفون = أرواح محروقة و أرواح فحبور
سدرة نهاية قصتي ما تميلي = باقي لها نسمة وداع ٍطويلي
وتعلّق اسمي فوق جبهة رحيلي = الريح تدمسني ومن فوقيَ اتمور
دوبي نزعت السلسلة عن لساني = عطني مسافة شمس بـ اقصى الأماني
نفسي أزور الغيب واسمع تهاني = ياللي شريت الصبح رابح ومشكور
[/poem]
4/1430 هـ
