أعجبتني
 

لا ضاق درب ٍ فيك وش لـك بممشـاه
جنّب طريقـه و الفيافـي عريضـه


درب ٍ يوريـك المـذلـه بلـيـاه
شمس الخيار ولا ظـلال الفريضـه


الحر ليا من ابـرق الريـش وازاه
عاف الديار و عاف عشّه و بيضـه


و الناس كل ٍ ينجبـه نـوع مجنـاه
مثل الشجر لا من تجـدد باريضـه


احد ٍ ليـا ضاقـت محايلـك تلقـاه
حبل النجاة اللي بتوتـه غليضـه


اللي ليا حارت بك الرجل تنصـاه
عزّك يعـزّه و انكسـارك يهيضـه


و احد ٍ بحزّات الرخا جـاه واوجـاه
و في ساعة الشـدّات ما تستعيضـه


مثل الغدير اللي حفظ مـاه بشتـاه
و احرق وروده في لواهيب قيضـه


و اللي زعل من خاطـره لا ترضّـاه
ليا صار ماسويـت شـيٍّ يغيضـه


و العفن لا تزعل على شـان فرقـاه
ترى العفن فرقاه ماهـي غميضـه

و ما دام رزق العبد بيديـن مـولاه
وش حاجتك باهل النفوس المريضه