.. وجه .. وقفا ..
 

عودة بـِ هذه المتواضعة ولـِ قلوبكم الحب .

[poem=font=",6,darkblue,normal,normal" bkcolor="transparent" bkimage="" border="outset,4,green" type=2 line=0 align=center use=ex num="0,black""]
لا يخدعك ضحك سنّي والله أنّي حزين = ضحكي مجامل واخبّي ضيقتي بالخفا
حنّا ثلاثة تجمّعنا وعشنا سنين = أنا وهمي مع شين الظروف احلفا
ماهقوتي نفترق والوقت عيا يلين = وظروف الأيام ما جادة بذرّة وفا
الهم / نعم الخوي والبعد ساسة متين = والليلة السرمدية جوّها ما صفا .
والحظ عيّا يقوم وطبع الأيام شين = ما تعترف في شيوخ ولا تعرف شرفا
وطبع الليالي جفا والحظ عيا يزين = لا جيت ادوّر لذيذ النوم همّي لفا
ياقو صبري على همي وجرحي الدفين= من قبل عشر إسنوات بخافقي ما شفا
دوّرت باب النجاة ولا لمحته بعين = ملّيت كل الوسائل صابني ما كفا
افا يـ الأيام ..! وش حدّك على عبيد لين = ادميتي القلب وارهقتيه افا .. ثم افا
ليتك وفيتي وقدّمتي بوادر حنين = ولا بخلتي وحوّلتي المواصل جفا
كان .. ازرع الوصل بالجوري وبالياسمين = واحطب من البرد لصدور الليالي دفا
وأخلّي الحلم يتراقص شمال ويمين= واخلّي آمالنا ترقص طرب واحتفا
لكن همّي سَواة السيف حدّه سنين=ميّل على آمال عمري وإن جرح ما رفا
ياهم ..! رافقتني واصبحت حصنٍ حصين = وعيال عمّك تعاقبني تقول اخلفا
احرجتني وأنت مالك عند شرواي دين=والقلب ما هو حديد أو قطعةِ من صفا
احس / وازعل / واعاتب / وافهم الوضع زين=واللي خلق مكة أن القلب منك أكتفا
لله درّك عرفت الكتف توكل منين = وحاصرتني مع مرور الوقت وجه وقفا[/poem]

الهم والحزن هو دائما ما يجعل المداد ينزف

نص جميل

وفقك ربي ... اخي عبيد

نص مملوء بالحب والجمال
شكرآ لك عزيزي

لله درّك عرفـت الكتـف تـوكـل منـيـن
وحاصرتني مع مـرور الوقـت وجـه وقفـا

ــــــــــــ

وأنت يا عبيد الله درك على هذا النص
الذي تبش سطوره بصدق مكامنها
سعداء بعودتك أيها النبيل

يامساء الشعر ياعبيد
مقل جداً لكنك تأتي محملاً بما يشبع الذائقه
قصيده فاخره وراقيه كحضورك العذب
يسعد مساك
ويسلم حضورك