منتديات أبعاد أدبية - السبــة أميـــرة

صـراع + تحكيم = إنهزام وفوز

.
.

من سأل ماتاه دل , ومن جنح لاتستشيره
. . . . . . . . ومن تمادى في ضياعه مارجى نصح استشاري

.

ماشحذت الهم ضيقة والعقل خابر مصيره
. . . . . . . . لكن القلب ومراده لاحكم يبطل قراري

.

ولاربطت النفس راغب لا ولا بالبال سيرة
. . . . . . . . حملقت عين وتمادت ثم طرى للقلب طاري

.

هبّت رياح العواطف بالتفاؤل مستجيرة
. . . . . . . . واستتر قلب ٍ تلبّس بالوهم والجسم عاري

.

آه منّك لابغيت الشي ياقلبي تثيره
. . . . . . . . كل شي يهون لكن بالخطا ماقدر اداري

.

كيف توصل من تريده وانت رجلينك كسيرة ؟
. . . . . . . . إن مشت لك رجْل فابشر رجلك الاخرى انكساري

.

لاتأفأف ماتركتك من عِدا في وسط حيرة
. . . . . . . . من غلاتك ما أبي تبتل ورى الاوهام ساري

.

مستحيلك بالتخيل تاخذه وتطول غيره
. . . . . . . . بس والله ماتنال الا الولع والهم جاري

.

لاتباهى بالتسلسل يوم حلقاتك كثيرة
. . . . . . . . دامك لوحدك تسكع فاعرف إن الحق زاري

.

الهوى المذموم دايم بالعقل حلقة خيرة
. . . . . . . . المهم الصح وافهم بالتعدد لاتماري

.

ماهقيت إنك تطيح بحفرة ٍ قدمك قعيرة
. . . . . . . . بعتني باول قدوم ٍ صرت طايش وانتحاري

.

هو صحيح النجم سامي بس مايجهل مسيره
. . . . . . . . . السماء فوقه وكل ٍ عارف ٍ قدره وداري

.

القمر نور ٍ ينير الارض من شمس ٍ تنيره
. . . . . . . . هكذا ياقلب ضيّك دون هالشمس متواري

.

ليه أنا مالي ومال الليل والروح الاسيرة ؟
. . . . . . . . خلنا في نور دايم وانت شمسي وازدهاري

.

خذها مني ماتوغل دام مابالأمر خيرة
. . . . . . . . لاتحاول تبطي والله مافديتك باعتباري

.

الورم لاصار توه مايبي نضرة خبيرة
. . . . . . . . يعني استأصل هواها واحفظ لذاتي وقاري

.

والله إن دمي تبيّغ منك والدعوة يسيرة
. . . . . . . . اغسل يدينك براي العقل واقبل اعتذاري.

.

الجدل مابين شيخ وشاب والسبة أميرة !
. . . . . . . . واحد ٍ حزبه يمين وواحد ٍ حزبه يساري

.

زبدة الموضوع ياللي تهت هو بيت ٍ بديرة
. . . . . . . . إن دخلته تعجب بشرحي ويقنعك اختصاري

.

"" حل حب , وهاج شوق , وضيقة ٍ جارت مريرة
. . . . . . . . وانكتب شعر , وتحجر دمع , واختنقت عباري "" .

,
,

فيصل بن سبيّل الباهلي