دخيلك
 

ارشيفية تتسامى بقرائتكم.

*يعزيني بعد الانقطاع انكم في القلب :

دخيلك دامني مخطي بحقّك ياحبيبي قِل
لاترحل؛ وانت ماشفت الخطا ياسبّة هيامي

نشف ريقي وانَا انادي لمزنك بالمواصل هِل
واشوفك تمطر لغيري وصال وصاحبك ظامي

احبّك كثر .. ماتطعن بصدرٍ مايعرف الغِل
شماليٍ .. لو يضيق الفضا ماضاق بالامي

واحبك كثِر ماتِسهر عيونٍ لاطريت تبلّ
ورق شعرٍ بكاك وخالطتها دمعة اقلامي

واحبك كثر ماشِفتك بميثاق الغرام تخلّ
وانا ماني عمى عن ماتسوي .. بس متعامي

اسافر عنك.. واردد لوجهك عن عيوني حِل
واخلي ذكرياتك بْظهري؛ والقاك قدامي

واقول إني نسيتك والخفوق اللي يحبك مَل
وإلى من مرني طاريك .. ماتنقلني عظامي

واقول إنّ اللسان اللي نطق كلمة "احبّك" زلّ
وانا اللي مانطقت إلّا "أحبك" طيلة اعوامي

يا أكبر مشكلة؛ واجهتها وأيقنت مالك حلّ
كثِر ماتجرح بقلبي مقامك داخله سامي

تعبت اهرب.. وغربالي مرافقني مرافق ظِلّ
واخاف إنه يغرّك يوم أرتب كِبْر هندامي

كبيرة يوم تعلن صدتك عنّي وانا مادِل
سوا دربٍ عليك بسكّته تتسابق اقدامي

اقلّ الأمر لامِن ضاقت الدّنيا بعيني؛ طِلّ
ترا لو هو بكيفي، للزمن ما اخترتك حزامي

ولكن دامي احبك واعدّك في عيوني خِل
اببلع جرح قلبي لو .. يكدّر صفوة ايامي

حلالك؛ جرّح إحساسي ولكن لاوصلت للذِلّ
يطيب الجرح الأول .. والكرامة جرحها دامي

حسام المجلاد

عز الله انك حسام شعر .. وقاف .. ومعنى .. ي حسام المجلاد
صح الساااانك بكل معنى الكلمه

المجلد حسام
تأتينا بالفريد ولا زلنا في برامج إلهامك نطلب المزيد

كثيرٌ أنت
وكثيرٌ بك الشعر

لك التحية عاطرة

:
جميل ياحسام
هذا الحب وهذا الشعر
وهذا الشعور.
🌹

الله يحفظك ياغالي يسعدني اعجابك دائما

ولا غرابة في اكرامك اياي هذه القراءه المبهجه، الف شكر