سما ولّا الحـروف وريشة الرسام
كثر ما اكتب غلاك يخونني قافي

كذا طبعي كتبني والحياه أوهام
احس إنّي بسيط، ومـرّه اسنافي

توسّد هاك حلمي يالحبيب ونام
وأنا حدّي تعبت وما مضى كافي

سما بيني وبينك ما قوى للهام
يقرّبها وأنا في ذا الفضاء حافي

على شوقٍ خياله عانقك من عام
وأنا فـي حـرْوتـه ملّيت مشرافي

تباسطت الهوى واثر الهوى قتّام
أدل الدرب ، لكن وين ميقافي

أروّض لـ اجلك احروفٍ بليا إلجام
أصـايـل مـا لمحها طرفك الجافي

على مركب خفوقي والرياح أنسام
يهودلبك عـلـى الأمـواج مجدافي

رسيت بساحلي وأنا عزيز إخصام
عطيتك ضفّتي وأهديتني سافي

لك الله ما خذاني في هواك إحطام
مـن الدنيا ، ولا مـكّـنـتـك أكتافي

عزيز ولا خضعت إلّا لـذي لـ انعام
عـلَـي ، وعزتي من مشربٍ صافي

سلامي للـحـروف وريـشـة الرسام
كثـر مـا اكتب ولا قـد خانني قافي