ياهاجسي بالمثايل زيد وارقى سنود
لك عادةٍ لا ابتدى بدعك تصيد وتفيد

اهلين يا مرحبا ترحيب ماله حدود
ترحيبتن لا بدا العداد يرجع يعيد

العيد جانا ويجعله عليكم يعود
وياجعلكم فايزين وكل الايام عيد

يالله جعل الوجوه الغانمه فالوجود
ويالله توسع لهم رزقن وعمرن مديد

ياماحلا الصبح متخالط مع ريح عود
بقدوم ضيفن يجي في كل عامٍ جديد

ثلاثة ايام والطيّب ... بطيبه يجود .
في (وصل الارحام) لا هوّن ولا حط قيد

------ الوجه الأخر :) -------

هلا ثم هلا ثم مرحبا ثم هلا وعداد
مّا هلّ المطر واستبشرو فيه نشاده

نبارك لكم بالعيد جعله لكم ينعاد
وياجعل يجمعنا على العيد عواده ..

خطا لا ظهر مني أسوق العذر منقاد
وانتم لكم شرهه و طيبٍ لكم عاااده ..

نمد الشعور اللي تجهزّ وجا بعتاد ..
نمده وياجعله على الطيب وشداده

انا الطيبين اعد هم لي ظهر وزناد ..
يوم ان الردي ضايع وضيّع به ازناده

وسيع البطانه نذخره ماهو النقّاد ..
لا زدنا معه بالطيب رده لنا زياده

كسبنا من الدنيا كريم وكسبنا اجواد
وخسرنا ردَيٍ لو خذى الطيب بقلاده

ياليت الردي نعرف وصوفه وهو بمهاد
نشوفه ( ولا نقرب ) نخليه بمهاده ...

عرفنا وجربنا وشفنا الردي مافاد ..
ماهو شرط يتشكل على ابوه وجداده

#بداح_الشويب