قصيدة الجمس
 

البارحـه داوم علي الضّيـق..والضّيق اسـتـدام
---------------- والعـيـن هـلّـت دمعـهـا وابطـت على خــدّي تـديــم

قلت المحـل ماهـوْ محـلّي والـبـلـد ماهـوْ مـقـام
---------------- ابـغـالي دربٍ لامسـكـْـتـه ارجـهِـن فـوقــهْ واهـيــم

ركَبْتِلي جـمس ٍ حـمَـر مخـلـوق من نـار وْسـلام
---------------- في ظـاهـرهْ كـتـلـةْ لـهــب وبـْـداخــلـهْ برد وْنعـيـم

جـمـس ٍ قديم امْطــرْبـلِـهْ تحـْت الـمظـلّـه من عَـوَام
---------------- امـخــزّنـهْ لـلـيـوم الاســود والنـشـايـب من قـديــم

قـرطـاسـتهْ بالـنـافـذهْ واضـح أثـَرْهَـا من أمــام
---------------- ما كـنّهـا الاّ عـبـرة ٍ في محـْـجــر اعـْـيــون اليـتـيــم

جمس ٍ جبلْه الله على الطـِّرقـهْ وعـصـيان النظام
---------------- امـجـهّـز ٍ للـطـّـرد والمـقـنـاص والـظــرف العـظـيــم

دقـّـيــت سـلْـفـهْ واشـتغـل واسندت وجهـهْ للأمام
---------------- ثمّ انطلـق مثْـل الشـهـاب اللي قِــدَح وسْـط العـتـيـم

ما تسـمـع الاّ طـرطَـرَةْ عـبـّارتـيـْـنـهْ بالـظــلام
---------------- وامْـسجّـلـهْ اللي صِــدَح في أُغـنـيــةْ عـبـدالحـلـيـم

يمشي على السّكّـهْ مثِل مشي القمر فوق الغمام
---------------- واليا كِبسْـتـهْ زود جـاوب وانـدفـع مثْل الخـصـيــم

ما كـنِّ صوتهْ يوم قـفـّى وانقـطع صـوتهْ تمـام
---------------- إلاّ صـدى صـوت البـنـادق في إثـِر جـيـش ٍ هـزيــم

من فوقـه انـوارٍ تبث الرّعـب وتضيء العـتـام
---------------- ما كـنّهـا الاّ عــقــد لــولـو في نحَــر غــرو ٍ وسـيــم

لهْ هـيـبةٍ يسـبقـها في كلّ الـمـواطـن احـتـرام
---------------- ولـهْ طــلّـة ٍ ما مـثـلـهـا الاّ طــلّـة الـبــدر الـتـمــيـــم

الشّكْل شكْل ام الحِسِن ذات الحسب والإحتشام
---------------- والفـعْـل فـعْـل ابن الكـرم..الماجــد..الفــذ..العـديــم

من فـوق كـبّـوتهْ يقع تمـثـال بـوذا..لا حــرام
---------------- إنّه إمام اهـل الـنّجَـف في حـضـرة ابليس الرجـيـم

في مـقـْـدِمـَتـْـه الـفـارهـه شـبْك ٍ تـقـلَّـدلـهْ وسـام
---------------- في حـافـتــهْ ازيـاق فـضــّه وسْطـهـا لـيـل ٍ بـهـيــم

والرَّفـرف الخلفي كأنـّه مـدفــأةْ طـوب وْرخـام
---------------- في مجـلـسٍ من فـوقـه الـقـرمـيـد ينـضـح بالأديــم

والحوض مكسي بالخشـب ومْشمّع ٍ طوقـهْ لِحِام
---------------- والـبـاب في خـلْـفـهْ كأنـّهْ روج في ثغـر ٍ طـخـــيــم

فـيـه الســلاسـل عـاكِــفـهْ ومْـكـمّـمـهْ بـقـْمـاش خــام
---------------- كـنـْـهـا سـواعــد شـايـب ٍ يـذِّن على الوضع القـديـم

امّـيـّـز ٍ فـي رفــرفـيــن وْتـنـْـدة ٍ مـثـْـل السـّـنام
---------------- والـميـزه الأخـرى على الصـندوق قـرنين ٍ تـقـيــم

كاملْ وِلِهْ من كلّ وصف ٍ وصف ٍ آخـر ما يـرام
---------------- ما عـيـبـه الاّ انـّـهْ عـديـم الوصـف وانقاصهْ عـديــم

يعجـبـك لامـنـّـك مِـتَـلْـتـهْ وانـزوى مثـْل الهـوام
---------------- واليا انعطف بالدرب واهتـز هـزّة اردوف الحريم

عـزالله انّ الجمس عن عَشـرةْ رجـاجـيـل ٍ كِـرَام
----------------- يسـتـاهـل انـّك تـنـتـخــيــبـهْ واتـّحــدّابـهْ تـمـيــــم

اقــولـهــا مـاهــوْ مـجـــرّد قـافــيــهْ والاّ كــــلام
---------------- لكنْ تـمـيـم لْحــالـهـا وادري شــرفـهـا مسـتـديــم

والجمس لا عـدّيت عِـدّهْ من ذوي أصـل وْمـقـام
---------------- اللـي يشــرّف أصـلهـم لا قـيــل من أصـل ٍ كـريــم

الـبـارحــه مـرّيـت بـهْ عـشـرين ديــره بالـتـّـمــام
---------------- اللـيـل كـلّهْ راح مـا بـيـن الـمـديـنــه والـقــصـيــم

أمشي على وجهي مثِل مشي العمى وسْط الزحام
---------------- من غـير خـلٍّ يشـتكـيـلي واشـتـكـيـلـهْ..أو نـديـم

لينَ اذَّن الـفـجـْـر وْتَهَايـق في طََـرَف عيني جهام
---------------- مدري ضَحَاح النور فوق الصْويْدره..أوْ حلم نيـم!!

من بـعـْـدهـا ديــوَرت دورة واحــد ٍ جـاه انـعــدام
---------------- واقـفـيت راجع جـايب ٍ طـبـلـون جمسي للقصـيم

السيارة
للبيع

تعجبني قصائد الوصف
وفي هذه الفصيدة وصف مبدع
تميز واضح
على كثرة القصائد التي قيلت في الجمس
إلا أنك يا صالح أضفت تميزا وتفردا .
شكرا لك على هذه الفريدة .

جمس واغنية عبد الحليم .....!

: ) يحق لشاعر مالا يحق لغيره .. وصح السانك مدد

قديمك نديمك


لاتعرضه بالنور .. مادامه يعزك بالظلام
.................................. ترى العرب قالو بعد قديمك .. ال حالك .. نديم

نايف السميري
حضورك محل شكري وكامل تقديري

سعدت بك

صالح


صح لسانك يالغالي وللي مثلها هذا مايباع استخر

دمت بود

محمد فرج
الله لا يهينك على هذا الحضور
ورأيك محل اعتزازي

ممتن لحضورك ياعزيزي