حسافة حلمنا الباقي على حبل الألم ممدود
كسر ضلع الاماني وانتبه من حسّها و ردّه !
تشبّث بالأمان وطيف ذكرى واستعارة جود !
يحاول يخفي الماضي ويضحك والهوا ضدّه
تساوى ليله وصبحه وعمره بالفرح معدود
يخاوي ضيقته وأكبر شقاه انه على قدّه !
على خبر العمر ماضي تجوّد والمواجع سود
وسوم الوقت لو تبرى حشا ماكان له عدّه !
تزامن بالصبر صمته على غربه وضيق وجود
يبيع من الحزن دمعه ويغسل به جفا خدّه !
تعلق بالوفا الباقي ونورٍ يحتويه وعود
لجل عين الحياة اللي بكت في داخله مدّه !
انا ادري ضيقتي طالت وحزني والشعور احدود
حسبت اني على قمة جبل واثر الألم هدّه !
لك الله يالدموع اللي كساها التيه والمنقود
تبعثر خطوتين وتطوي الفرحة مع الشدّه !
يجيبك مع غمام الصيف وتنهج والبروق رعود
وتمطر قطرتين وينهدم من قبلها سدّه !