[د. فريد ابراهيم]

عبد السميع - جلال - محمد - مُرقص أو بشندي ...

مهما كان اسمك .. اللي عندك برضو عندي ..

صداع و خوف و قلق و حيرة

و دماغ بطورطُن بـ اللاوِندي

الاصل مصري و الحال يتمنى لو يبقى هندي

انا نفسي اعرف هُمَّ مالهم الهنود

شعب قديم و من زمان و موجود

على كل دين و شغَّالين

شبهنا احنا كـ مصريين

لكن طموحهم مالوش حدود

شوف اقتصادهم ..

جيشهم ..

حتى غُناهم و رقصهم

في السيما عندهم بوليوود

و تقوللي (انت فاكرني هندي؟)

هو انت تطول تبقى انت هندي

انت فين و الهندي فين ؟

يا عم طنِّش

يا عم كَبَّر

يا عم عدِّي

انت ف اسفل السافلين

انت صِفر مش ح يبقى على اليمين

الا لو عندك يقين

و ارادة و حبِّة تحدِّي

امتى ح اشوفِك عروسة و مِتزَوَّقة

و صافية البال و مزاجك عال و مِرَوَّقة

امتى يا بلدي

فريد 2/2/2018