انا البديل لعمر ابن كلثوم لو ماله بديل
لقامت فحول الشعر تفخر بطيب انسابها
لا المستحيل يردني ولا ابن عم المستحيل
ياماكسرت القاعده واخلفت وجه اعرابها
صدري ليا عليت علا وليااستطالت يستطيل
اما استوت لي كلها والا بلاش اشقابها
عندي قناعه ظلها وافر ولي فيها مقيل
مامشي وراء قالوا قبل واعيش في جلبابها
مامن وراء زرع المثل في وقتنا الحاضر حصيل
من طبق امثال العرب هذا الزمن يبلا بها
من ذل لو قالوا سلم يبقى بنظرهم ذليل
ماتستوي القمه تحت رجلين من هو هابها
ايه الشجاعه تغلب الكثره وانا اعطيك الدليل
الذيب يدرع بالغنم ولا يحسب حسابها
جيت بشموخ الوايلي ماجيت من تحت الشليل
ولا ردني عن ساحه الشعار كبر القابها
لو كل من اسمه جميل من العرب يطلع جميل
كان أكثر اسماء العرب تحمل صفات اصحابها
ولاينعم بظل النخيل اللي تحت جذع النحيل
الشمس تصقع هامته حتى يحين غيابها
ولا طولت عمر أدمي قولة عسى عمرك طويل
طول العمار وقصرها رب العباد ادرابها
رح ردها عني وانا بأكبر عواقبها كفيل
كانها كذبه فأنا بين العرب كذابها
ان الشجاعه تغلب الكثره وهذا اكبر دليل
الذيب يدرع بالغنم ولا يحسب حسابها .. ؟!
الابيات لـ نصفي الثاني / خلف المشعان