السلام عليكم ورحمة الله وبركاته
أولا أعتذر على قلة حضوري كما وكيفا
وكلي رجاء أن تحتوي قلوبكم الطاهرة إعتذاري هذا
لكم مني هذا النص هدية من قلبي إلى قلوبكم المشرقة دائما
النص
ـــــــــ
تصدق هذي المره
عجزت أعرف..
وش براسي
على ما أظن وأتوقع ...
وعلى مذكر ..
أنا .. ناسي
هو الوقت لما يدور
ويقتل فينا أي شعور
هو الهم لما يجور
و يكبت بسمة فيها النور
عجزت أعرف
عجزت أدري ..
سبب هالثورة بأنفاسي
غريبة ..
هذي المره
أحس بشي متغير!!
بشعوري .. وكل إحساسي..
* * *
تعبت أحكي .. وأبي أحكي
ولا أدري وش السيره ؟!
ولا عندي سبب واضح
وفمي جف تعبيره
شي ..ومشغل ٍ بالي !!
وشد أفكاري من تالي !!
شي ..
وكيف يفسرني ..
والقى اليوم تفسيره ؟!!
حقيقة هذي المره
أنا حاير..
ولا أقدر ..
أقول إن حيرتي
حيره !!!
* * *
أنا مرتاح
وإلا هو..
وهم إحساسي بالراحه
وأشوف الوقت يلعب بي
وتضم يديني .. اجراحه
تعبت أتخيل ..
وأنسى
تعبت أساير أوهامي
عين ٍ تنشد المرسى
وقلب ٍ في النهر ظامي
تعبت أرحم ..
عجزت أقسى ..
تضيع الخطوه باقدامي
أنا المرتاح ..
وإلا صرت
أشوف الدنيا مرتاحه..
أنا الفرحان ..
وإلا صرت
حزن ٍ تكذب أفراحه
تصدق .. هذي المره
أنا ..
ضايع ..
ومتناقض..
وشكلي ..
خارج ..
الســـاحة !!!
ابراهيم محمد الخويطر
22 يناير 2003 م