فالطريق اللي على وصلك بعد غيبه دعاني
خايف من الوقت يمضي والطريق أرهقت طوله
ولاوصلت الا بعبره خالجه بين المحاني
تحتوي فرحة وصول وشيء مدري كيف أقوله !
في سماك الغيم متماسك بخيط من الأماني
كم تمنّيت أوصله هالغيم وأجذبك بهطوله
كيف أقول ل مرحباك أهلين وأهديك الأغاني!!
وكلّ كلمه لانويت أقولها .. مرّت جفوله
الكلام يخاف مايوفي .. نحرك الأرجواني
من لبسه العقد وأحرج عاشقك وأربك ذهوله !
وقفتك ! هذي شموخ وفرحتك مسرح غواني
وغرهدة يدّيك جابت لحظة الصمت الخجوله ..
( ساعة إحساسك )خذت قلبي على تكّ الثواني
مابقى عرق بزفيره ماتنفّسك ب ميوله ..
ماني معاتب غيابك لو تلعثم به لساني
كل عقده في لقى شمسك وفارعك محلوله ..
ذابت اللحظه على سحر المحبّه بالتفاني
والتقى وجه السحاب (العشب وأحيا له ذبوله )