وآتساءل داخلي من قبل مده
ليه انا ياخاطري ماني بطايب ؟!
جاوبتني نبرة الصوت المجدة
وش بلاك اليوم رديت المصايب !
وش تبي من بعد مافارقت جدة ؟!
يوم كلن راح في دنيا العجايب
ما بباب إذنوبنا حبل نمده
وما باب المغفرة إنسان تايب !
لكن اسمح لي دخيلك دون حده
هو سبق عند المحبين الطلايب ؟!
صاحبي والليل قبل الليل شده
واطوي النجمات طيات السحايب
صاحبي والجرح بيتين ومخدة !
وكلمتين عالقة في راس شايب!!
ماسوى الريحان! عايش في مكده
ماسوى النعناع صار اليوم ذايب !
ماسوى النرجس جموحه للمصدة
ماسوى العناب في صدور النجايب
صاحبي والجرح لو يبرى نعده
مير .. خل الجرح صار الجرح غايب !
ردني صوب الرياض ! اللي أوده
قبل ماتنبش مجاهيم النصايب !
واعترف لك مابعد حبيت جدة !
لا ولا ضني بعد نورة حبايب !!
علي ال شيبان