[عبدالعزيز المخلّفي]

..

.
فوضى ترتب ضاحكات الغيم في درب عربي
شاف الوطن منفى وناداه الطريق ولا انتبه

أنه يودع خلف روحه ماتبقى من صبي
كان المدى حلمٍ تراءى في عيونه واعجبه

كم له يسافر في فضاء الله يبحث عن نبي
يسترشده عن صافنات الدمع حتى تكتبه

عن لذة التصريح يغريه المجاز ويجتبي
من دهشة "الأرض اليباب"وصوت جدٍ يجذبه 1

حاول وحاول في مداراته يتوه ويختبي
من خلف اسوار الكلام وليل عابر يسلبه

حتى تشكل ثم نادى كيف اصونك ياتعبي
في ذنبي الاطهر سؤالٍ تحتضنه الأجوبه

من يقنع النحّاس لو تختال عينه بذهبي
بينه وبين الصافي الإبريز عمر وتجربة

لو حاولوه يطولني ماهو محاذي منكبي
لو حاولوه يردني ماهو بلي ند وشبه

وان خانني وقتي وضيّع من يديني مطلبي
ماني وانا رب القصيد اللي تواقد موهبة

محتاج له لو عاصفات الريح هزت مركبي
والبحر بحري والسما والقاف فضه وذهبه

..
.

--------------------------------------------------

1- الأرض اليباب قصيدة لـ ت س إليوت