[محمد بن منصور]

بين ذنبي وبين المغفره
اقترب خطوه / ارجع خطوتين

راح نصف العمر راح أكثره
من يرجّع سنيني يا سنين
.
صاحبي , والورق والمحبره
تدخلك في متاهات الحنين
.
اغتنم كل صرخة حنجره
راس مالك صراخ وكلمتين
.
ما بقى ليل في الليل اسهره
السهر منخلق للعاشقين
.
السهر ينكر اللي ينكره
عدّني من جموع المنكرين
.
شخص أنهى حكاية دفتره
واتجه صوب جمع الصامتين
.
لو رموك الملا بالثرثره
مدّ لمصافح الصمت اليمين
.
ما بعد أربعينك معذره
كيف مابعد خمسه واربعين
.
الصبر في المواجع مقدره
وانت لولا المواجع انت مين ؟