اقدم لكم رائعة الشاعر والكاتب الكبير عدنان كنفاني (( مين الصبي ))تنشر لأول مرة ...
مين الصبيّة..؟
"شعر محكي"
عدنان كنفاني
يمكن مش هيّ.؟!!
"قالوا صبيّة مرقت من بعيد، ومزنّرة بحزام.."؟
قالوا: جدايلها سمر
قالوا: طويلة مشرّعة متل الرمح، وعيون عسليّة
وخدود متل الورد
ومنوّرة متل القمر
يِسعد صباحِك يا قمرْ..
معقول يمّا تكون سعدية.؟!
مبارح قبل الغياب بشويّة، كنا سوا
وكانت عيونا كتير فرحانة
مسكِت بإيدي وطلّعت فيّ
وقالت: بتعرف "يا عمري" شو مشتهية.؟
قلتلها عيوني
قالت: تسلم عيونك..
قلتلها: روحي
قالت: بلاش روحك
إنت أصل زيتون ضيعتنا
وإنت الأمل في يوم رجعتنا
قلتلها: قلبي
قالت معي قلبك، ورح أزرعه بصدري
وسافر أنا واياه والسلسلة...!!
السلسلة يا نور عينيّ..!؟
هاي سلسلة جدّي.
وفيها خريطة ملوّنة، وصورة علم
قلتلها: لوين بدك ترحلي
قالت: ولو.!
صدْقت يا عمري.!
عمرك شفت في أرض وبترحل.؟
حتى النوارس
لو تركت عشوشا مواسم برد
لا بد ما ترجع..
شفت النوارس وين ما طارت
ولو بعّدت لبعيد..
لا بد ما ترجع
وسكتت......!
والسلسلة لمعلّقة بصدري
تذكار من جدي الشهيد لبستها اياها..
وصارت على صدرا قمر..!
(قالوا صبيّة مرقت من بعيد، ومزنّرة بحزام..)
ونجوم طارت متل لون الدمّ
والأرض ما طارت..!
والسلسة..
متل الشمع ضوّت على كل الدنى
وصارت قمر
وسمعت صوت بعيد جاي من السما
وعيون لسه معلّقة فيّ
وقالت: عرفت "يا عمري" شو مشتهية.؟
أنا شتلة حبأ بالأرض مزروعة
بنحني يمكن لهبّة ريح
بس ما بركع
ما دام شرشي ساكن الميّه
وشرش الحبأ بدّو سقي
مش متل زيتونة
بتعطش وما بتيبس.!
يِسعد صباحِك يا قمر
والسلسة بقيت معي ومعلّقة بصدري
وشتلة حبأ نبتت على الغيمة
شدّت عروقا.. واخضرّت
واصوات متل الريح بتغني
حاملة على جناحاتها هودج مطر
جواه حزمة نور
مش قلت لك يمّا..
هاي الصبيّة المارقة من بعيد
لا بد إلا تكون
سعديّة.......!