:
لا أعلم , كيف , ومن أين أبدأ ..
الغياب آفة , ولعل تلك المشاركة تتحدث بشكل أدق
:
:
الحصاد : الهم وكروم الأماني والجراح ..
والشعر : منجل ..
والشاعر : الفلاح
:
ما تاكل الا سكريات الجنى
ولا تشرب الا الصفو والعذب القراح
اليا حكت غنت كلام وميجنا
وان ما حكت .. ثارت لسكتتها الرياح
:
واحنا دراويشه ..
هذا الرماد اللي بقى في قبضة الشيشة ..
بعض ارتشاف اليم ..
بعض احتراق الروح ..
بعض افتراش الهم ..
بعض السهر والنوح ..
هذا الرماد ..
اللي بقى في قبضة الشيشة ..
حنا دراويشه ..
:
انتظرتك وارخت العتمة هدبها
لين فاض نعاسها مني وفيه
قلت والجمرة يساورني لهبها
والمدى يشبه سراب المهمهية
دمعةٍ تنزل ولا ادري وش سببها
مثل طعنة رمح من كف الخطية
:
حبيبي كيف انام وحضرتك في خافقي معزوم
وانا غفوة نعاسي منك مأمورة ومنهية
يظل نعاس جفني في وجودك يرتعش ويحوم
واظل ارقب وصالك يا قمر والجية الجية
:
يسعد صباحك يا صباح الحبايب
يا احلى من السكر ومن قطف الاعناب
ما غبت لكن الظروف الصعايب
باسبابها غيبت عن صوت الاحباب
:
حبيبي حاسب حسابك
غرامك فالحشا شابك
ونجمك ما غرب عني
اموتك حب واحيا بك
:
يا سادتي .. يا سادتي ..
لكم علي ..
احفظ همومي في الصباح ..
وان جا المسا ..
ابوحها لوسادتي ..
:
دمي حبر واقسام وجهي قصيدة
تشكلت بيد الليالي والاقدار
فيها من التغريب غربة جديدة
وفيها من الفرقى بقايا وتذكار
وفيها من اطلال النفوس الزهيدة
شمعة لقا وجدار باهت ومسمار
و ( سراج ) مسترخي وعتمة شديدة
وشباك يطرد بالضيا عتمة الدار
من لا عرف بالظبط .. سر القصيدة
يقرا عيوني ويعرف كل الاسرار
:
الانسان يبذر ..
الانسان يسقي ..
الانسان يصبر ..
الانسان يشقي ..
وان جا الحصاد ..
يتحول المحصول في .. بطن الجراد ..
:
يسعد صباح عيونك
يا شمعتي وسراجي
لا مرني مكنونك
يضحك فمي وحجاجي
وان ما لقى مفتونك
فالصبح همس مناجي
صار الصباح بدونك
ليل وظلامه داجي
:
لو لا السهر ما كان ..
فالمحبرة ريشة
هذا الزمن مليان ..
ما اكثر دراويشه ..
في هالزمن خسران ..
من دور العيشة
وفي هالزمن كسبان ..
من باع تحشيشة
وش قيمة الانسان .. ؟
لا طال تهميشه ..
:
يا قسوة ذنوبك
ياغارقه فالتيه
قلبي لبس ثوبك
بالرمش كلبشتيه
جا يشتعل صوبك
واثرك تجاهلتيه
شاعرك محبوبك
مسرع تناسيتيه
:
( إلى كل صديق تساهل في معنى الصداقة .. ورحل )
وين انت يا مفتري يلعن ابو هالغياب
فقرت عظمي وجفت فالعروق الدما
ماكن يابن اللذينا وانت اعز الصحاب
الارض تربة بعدك ولا سماي .. بسما
من كثر ما اغليك اخاف تصير للشرك باب
عظيم لا صار للتاريخ ناس اعظما
بس انت ما غيرت قلبك ليال العتاب
ولا كن معنى المودة في ضميرك سما
يعني جزاي اني اسألك عنك واخشى واهاب
واخاف .. يلحق مودتنا رماد وعمى
يعني جزاي اني ارمي في عدوك حراب
واحمي واذري عليك اليا عدوك رمى
على الاقل اتصل لا غبت واترك جواب
غيبتك مرة وتطنيشك مرار وضما
نما بصدري .. تشجر في عروقي سراب
يبس .. تساقط على القاع ( المرير ) .. انما
ربي يسامحك ما شدوا ظهور الركاب
وما جلجل الرعد فالغيم الثقيل وهما
وما عكرب النخل واسبل في وسيع الجناب
خضر المطاليع واهدت ظلها للحمى
في هالزمن لا عطيب وصار قلبك سحاب
تمطر وتلقى البشر تحتك هضاب ودمى
والغيم لو يدفق الما فوق روس الهضاب
ما تنبت الزعفرانة فالهضاب الصما
تبغى الصراحة .. وانا ادري ماعليها حجاب
وادري بأن الصراحة ما كماها .. كما
من لا سرى في ظلام الوقت مسرى الذياب
واخذ مخاليبها .. وانيابها .. والجمى
يصبر على جفوة الصحبة وياكل ........
حتى تصير الصداقة ,, مفخرة ,, وانتما
:
ثلاث سنين غبتي والقلق عاتي
وانا جمر السؤال يشبني .. وينك ؟
ثلاث سنين اموت احياك في ذاتي
صبرت احيا واموت وبيني وبينك
دموعي .. لهفتي .. تلعن سماواتي
وكن الضحك وابياتي مساجينك
وجيتي واسفهلت بك ملذاتي
وطاحت قسوتك في معمعة لينك
:
قالوا سمّعنا شعر ..
قلت : لازم تسمعون ؟
ما تشوفوني شعر ؟
والا ما معكم عيون ؟
:
حبيبي واعتبر ضيق الليالي فص ملح وذاب
تراك اغلى ضيا يجتاحني ويمر في عيني
احبك من هنا لآخر سهر في طاعة المحراب
واحبك لين ينشف دم قلبي في شراييني
واحبك لين ما يبقى على وجه التراب احباب
ولا يبقى طريق لغير قلبك ما يوديني
:
لو تجين او ما تجين
صدقيني مو مهم
دام خفاقي سجين
فالحنيا .. والأهم
صرت ادخن اوكسجين
وانفخ الدخااااااااااااااااااااااااااان .. هم
:
إهداء للطفلة (نوف بنت نايف الحارثي)
يا نوف يا نوف يا قطر(ن) يبل الضما
يا طفلة(ن) في محاجرها تضج الحياة
ابوك رتب يدينه واتجه للسما
واعطاه ربي عيونك واشهد انه عطاه
ابوك نايف ملاذ ومفخرة وانتما
والمزبن اللي يجمل من تذرا ذراه
يانوف ظلك يميل ومزن وجهك هما
والورد من مبسمك يرسل ويطلق شذاه
احس الاطفال في حضرة وجودك .. دمى
والارض من دون بسماتك .. مجرد حصاه
ماما تغنيك للنجمة وطير السما
وباباك يجني ثمار المغرس اللي سقاه
وياعل عين الحسودي بالرمد والعمى
والله يحفظك من الدنيا وطيش الحياة
:
يا صاحبي المهموم لا تشرب الكنت
دخنت همك .. لا تدخن سجارة
:
والصبح لا حس فيني حس باحساسك
وان ضمني .. ضمني تينك وليمونك
كن القدر فالحنايا علق اجراسك
مع كل نبضة خفوق يمرني كونك
سبحان من عظم المحراب للناسك
اللي معظم هواك بقلب مجنونك
:
طيب كتبنا شعر ..
طيب .. وبعدين
من فيه .. فيكم شعر ..
ومن فيه خلص دين ..
:
( ورد الكلام )
يبس ورد الكلام وحت من جدب الزمان العود
وانا اطلب من عيون الطيش حرفي واستعير اغناي
صرخت وضج صوتي فالسراب وفالليال السود
وصحيت الرماد اللي حرقته من لهيب مناي
احبك مثل ما حبت جروحي طبها المفقود
واحبك مثل ما حبت مكانك والدروب خطاي
دخيل الدمع في وجه النعاس وقدك المشدود
تصبين الندى فوق السعير المشتعل جواي
تعالي وامطري من دون برق وزوبعة ورعود
تعالي ما بقى غير القلق فيني وصوت الناي
تعالي فرقي شمل الغياب الكافر النمرود
وخلي طاري اسمك فالضما والجدب رايح جاي
تعالي صافحيني بالعناق لحيلي المهدود
تعالي شبكي كفك بكفي وانتشي وياي
تعالي صرت في غيبتك لا غايب ولا موجود
مع النجوى وحيد ولا لقيت اللي سمع نجواي
اجوعك واشتهي كسرة وصالك وانتي اصل الجود
وتضماك الحنايا وانتي الغيم المثقل ماي
معك ما للمكان اية تضاريس وسفر وحدود
معك ما للزمن عقرب تدور وتعلن البي باي
معك .. كني جديد بهالحياة وتوني مولود
اجي عفوي ولا اعرف ضحكتي قبل استفز بكاي
وتتفتح ورود وينتشي بك حلمي المفقود
واغني من عيونك في عيونك واستمد غناي
:
( ذاكرة تشرين )
وهمسك بقايا حب من ذاكرة تشرين
عطاها الحنين لسكرة البال والنظرة
على الياسمين اللي سكن في سواد العين
بكيت الغياب المر واحترت العبرة
احبك واغيض بحبك الورد والنسرين
وقطر الندى يغتاض قطرة ورا قطرة
رحلتي وخنجر غيبتك يتبع السكين
وانا اشب جمرة في يدي واطفي الجمرة
وجيتي وطاح الدمع في تربة التخمين
مع الصمت الأحمر والسهر في ضيا قمرة
تعيش الأماني والسهر والسهاد لمين ؟
ليا صار مالك حب يستدرج الفكرة
حلمنا بصدق احضورنا فالقسى واللين
ولا كنت افكر تصدق احلامنا بكرة
:
صباح الخير يا أجمل صباح يمرني بالخير
وارق من النسايم واعذب من الورد والمية
صباحك شي مدري بس احس انه صباحك غير
واحس ان الدقايق في وجودك نارها حية
:
(شفة الحنظلة)
الارض حنظل مرارة والسحابة عسل
واجساد الارواح معجونة من الحنظلة
وانا من الكوكب المليان عرف وجهل
الكوكب اللي عرفته من عيون اجهله
الكوكب اللي تلبس بالنشاط الكسل
واستنزف المهزلة فوق الثرى مهزلة
البارحة جيت افكر واستفز الملل
وادخل من الصمت واخرج من فم البلبلة
سكرت باب الضجيج وهمهماتي قفل
وتكسر النور من فوقي وطاح الوله
هناك عند الملامة والغياب الجلل
والماضي اللي رقد في طرقة المقبلة
حاولت افتش وجيه البارح اللي رحل
واقلب البوصلة من عقرب البوصلة
فجأة وانا اسرق من الذكرى ملامح طفل
جتني بقاياه مثل الريح مسترسلة
طفلٍ رماني خطا واثقل علي الزعل
الله يسامح خطاه ولا يديم ازعله
قلت اكنس الهم عن صدره وادف الوحل
قبل ايتكاثر طعون وينفجر قنبلة
يا صاحبي والجفاف اللي طمع فالبلل
رشه بالافكار والاذكار والبسملة
ركعة..تنجيك لا دارت عليك الحيل
سجدة.. تجاوبك لا لج المكان اسئلة
الله خلقنا نكبر له بقول وفعل
ماهو على شان للدنيا نجي هرولة
لا بد نكدح ونصبر مثل صبر الجمل
ونحارب الياس مهما طالت المسألة
وان كان صمنا .. وصمنا.. ثم نفطر بصل
افضل من اللي يصوم ولا يذوق ابصلة
وان ما زرعنا بلاد ارواحنا بالامل
نموت مثل المراحل .. مرحلة .. مرحلة
يا صاحبي والسنين تمرنا بالعجل
لا تحرث النور بالغفلة وبالحنشلة
هذي هي الارض لا تستغرب اللي حصل
والحنظلة ماعليها تستدير انحلة
من شفة الحنظلة .. انسى تذوق العسل
عمر العسل ما طلع من شفة الحنظلة
:
ضامي لصوتك يا ربيع ايامي
عطشان ادور للندى وزهوره
وان كان ما صدقتي اني ضامي
شوفي بعينك وش تقول الصورة
:
( امتداد اليم )
لا الحزن حزني , ولا هالكاس كاسي
ليت من يحبس قلق عمري .. يريقه
كيف اطيق الصمت .. هذا الصمت قاسي
كيف اسولف .. كيف افكر فالحقيقة
جيت احدث للسهر وانفض نعاسي
عن جفاف الحلم والورد ورحيقة
جيت ارتب فوضيات انعكاسي
جيت ارتل صرخة العمر العتيقة
وحدي اعطي .. وحدي اتحمل واقاسي
وحدي المحبوس .. وابياتي طليقة
وحدي اللي ضعت من كثر احتراسي
لا يطيح الريش فالقاع السحيقة
وحدي اللي صرت حمال المآسي
مو طريقة .. ظلم .. هذي مو طريقة
ما تطيق اليم نفسي .. و المراسي
وامتداد اليم نفسي ما تطيقه
الأمل يكبر ويصغر عن مقاسي
وان غفيت .. الحلم يصفعني بريقه
صرت ناسي .. ليه انا ما اصير ناسي ؟
والطرق ضجة .. وكل في طريقة
ودي امطر لين افضفض عن يباسي
واختلي بالنفس وعيوني غريقة
لين ينبت في مدى عمري حماسي
واكمل الباقي بلا نفس زهيقه
ودي اصبر لا انكسر فالعمر فاسي
علها تنبت على الصخر الحديقة
لو يقولون الزمن لعبة كراسي
قلت كم لعبة كراسي فالدقيقة
سامح الله من جمع فالعمر ياسي
وسامح الله من ترك فالقلب ضيقه
كاسهم والحزن مو حزني وكاسي
حملوا نفسي بمحملٍ ما تطيقه
:
ملاحظة : جميل أن تنسب الحقوق لأهلها , وللأحبة الذين سرقوا نصوص عبدالله سعيد في بعض المواقع
ونسبوها لـــ : منقول
أقول لهم : لتضعوا في قناعاتكم , أن ذلك هو ما لا ترتضيه النفس المتزنة , وما تكرهه النفس الطيبة .
( الحقوق محفوظة )
:
تحياتي للجميع