بعض الفرح لا لفى .. يحتاج له تهيئه ..
.......................... وشلون بالحزن لاباغت بليّـا صهيـل ؟
كنّه كذا عرش نخل ٍ جيت تتفيئه ..
..........................واثـره مـعرّيته ام الـريح مابـه ظِليـل
تغتاله الشمس لو عدّت ظِلاله مئه ..
..........................واتمحور اللي بقى منّه : عطيّة سبيل
ما كنّ هالأرض / ذول الناس/أيّة فئه
..........................ذرّوا على شان توديعه زهور الرحيل
شرْط الغياب : التعوّد ، كيف نستمرئه ؟
..........................حتى لـوْ إنّـا تعـوّدنا الغـياب الطويـل
أقساه ، لا والله إلا ارداه ، لا أسوأه :
..........................اللي يلقّـم أمانـيـنا فَـمْ المستحيـل !
لا والله إني من الخذلان ما آبرئّــه
..........................كانه تمادى بنـا حلم وحصـدناه ويـل
ما كان يعني من الأوّل قبل نملأه
..........................بالصبر ، يهدي تضاريس الوداع الدليل؟
ماكانت الروح ؟ أصل الروح : متلألأه
..........................تومض على شفّة السعْد اْبتسامة جليل ؟
يْـحقّ لي آتعـاطـى الجـرح ذا وأنكئـه
..........................ماهوب حزن ٍ عَرَى هالروح حزنٍ قليل
كانت كذا : تدحض الضيقه بلا تأتأه
..........................إليـن صارت تزبّنهــا الخفوق النـحـيـل
كانت كذا : تلطش البرد ويجي أدفئه
..........................إليـن غـلغل جمـود البـرد قلـب ٍ شِعيـل
كانت كذا: تاخذ الغيمة مطـر تهنئه
..........................وتْـزّيـن المـاي بألوان البزوغ الجميـل
كانت كذا : تعتبر نزْف القصايد : رئه
..........................إلين صـار القصيد النزف ضيف ٍ ثقـيل
ومن كانت إلين صارت شاحبة مُطْفَئه
..........................وانا آتنـثّـر علـى آخـر مـداها غـليل
اخترت أخوض الوجع هذا ولا آهدئـه
..........................قبـل يْتـوالـد شـعور القـاتل اللي قتــيل
قبْل يْتنامى الملام / الوخَزْ /والتخطئه
..........................أبـآرِد الـمرّ لـيـن آصدّر السلـسبيل
وأتهيأ الحزن لا منّه لفى و أبـدئــه
..........................واصيح بي لاتسرّج خاطري: خيل خيل .. !
الجازية