[فيصل الباهلي]

خرجت في وقتها
بسيطة لأنها رسالة
,
,
,






مانيب متحسف على فراق الانذال
. . . . اللي لهم مع طاري العيب سيـرة

.

مخيبين الظن في كل الاحـوال
. . . . لا جيتهم تلقى اليسيرة عسيـرة

.

والله مايحسب مع الناس رجال
. . . . منهو بوقت الجد يترك عشيره

.

متجرد ٍ بالسوء من كل الافضال
. . . . مافيه خير وتركة النقص خيرة

.

ياخالي الافعال مليان الاقوال
. . . . أنت الصغيرة في عيونك كبيرة

.

لاتكثـّر الاقوال تفضحك الافعال
. . . . جنسك ترى والله ما راح ديـرة

.

تضحك وتبدي الود والا انت دجال
. . . . من فعلتك معروف ما بالسريرة

.

ياتعس حظك يالردي وقت الاهوال
. . . . واللي مثل شرواك سيء مصيره

.

لا تامن الدنيا ترى الوقت ميـال
. . . . الارض تشبع عقب ماهي فقيرة

.

الحال مايثبت على وضع لو طال
. . . . الوقت يمشي والليالي قصيرة

.

المغتني هاذاك سائت به الحال
. . . . والمنعسر صارت أُموره يسيره

.

لا هزنا منصب ولا رزنا مال
. . . . بالطيب والاخلاق شفنا الستيرة

.

ولا همنا المكروه لو قال ما قال
. . . . درب المراجل مانجـنب مسيره

.

يحزنا الطيب من الهم لا شال
. . . . ويعاف سيف الجود فينا جفـيره

.

ما ضامني صدك ولا مات بي فال
. . . . عزمي قوي وافضال ربي كثــيرة

.

نشكي على الله ضيقة الصدر والبال
. . . . ونصبر على الصدمات لو هي خطيرة

.

محد ٍ بميت جوع والخبز بريال
. . . . والماء بلاش ورحمة الله كبيـرة


رحـمـة الله كبيــرة

رحـمـة الله كبيــرة




فيصل بن سبيّل