- حنا في نعمه عظيمه
نعمة الأمن ..والأمان
فقْدها أمرٍ مهين!
- أدري ..
بس نعمه لـ مين؟!
- نعمة الأمن والأمان
عندنا أصدق شعار
لا تجادل
هذي فالواقع حقيقه
ما يغطيها الغبار
نعمه يحسدنا عليها
ناس كثيْر
لا يهمّك هالحوادث
واللي أحيانا تصير
حتى في عز النهار
ولا يهمك كم مجرم
حتى هذي اللحظه .. فارّ
ولا تشوف هذا الدمار
اللي منه ما سلم
حتى أولادٍ صغار
كم حبة كبتاغون!!!
ولاّ كم كيلو حشيش!!!
ولا أفيون .. وبلاوي زرقا
من خلف الستار!!!
كلها أشياء عادية ..تصير
لا يصير عندك لها
أي أعتبار !
يكفي إنك..إنت آمن
نايم فـ بيتك وضامن
فيه رمشٍ ما ينام
عالي الهمّه ..فطين
هذي نعمه
لا تكونوا جاحدين!!
- أدري
بس نعمه لـ ..مين؟!
- يعني لو حضرة جنابك
يعني.. بضرب لك مثال
وفـ عجاله!
- بس..
- لحظه بس خلني أخَدْمك
لا تردد كل ما قال الحثاله!
أنا بسّْ .. بعطيك مثال:
لو تغضّ الطرف
عن وضع العماله
اللي خلّوا حال هذا المجتمع
في أردى حاله
يسرقون
يزوّرون
ويقتلون
ويهربون
ويرجعون
كن هالديره..سباله!
أنا أقول..
لو تغض الطرف
عن وضع العماله
واللي حتى من وراهم مستقيد
بس يزيد .. في راس ماله
أنت أكيد ..حتما..
ولابدّ ابتشوف
وضعنا ما فيه مثاله
في بلاد العالمين
هذي نعمه
بس وين الشاكرين؟!!!
- إيه ياخي ..ما اختلفنا
هذي نعمه
بس سؤالي
ياترى نعمه لـ .. مين؟!
- شفيْك فَهْمك على قدّك؟!
ليش ياخي ..منْت لمّاح وذهين؟!
نعمة الأمن والأمان
عندنا..
للمجرمين....!!!!