اعذب الشعر طرق جرحته الطعون
ـــــ و اصدق الحب شعر ما كتبته لأحد
واطهر الشوق طفل حالف ما يخون
ـــــ لو تخون السحابه برقها و الرعد
و ابيض قلوب خلق الله جرحه يهون
ـــــ لا يعاتب ولا اعياه الوفا و الجلد
و اتعس الوقت غربه مقتفيها جنون
ـــــ واصعب الناس خل لأقتربت ابتعد
واقرب الناس لأخطا عذره انه يمون
ـــــ والمصيبه إذا اخطا ثم قفى وصد
ودي ادحر شياطيني وبعض الظنون
ـــــ مير ضيم الليالي ساقني للنكد
للسهر للمواجع للصخب للسكون
ـــــ للهجوس إللي اعيتني بصدق الوعد
وانتخيت القوافي واستهلت مزون
ـــــ وارتوى من قصيدي كل قاع جرد
والقصيدة هنوف سحرها في العيون
ـــــ واعذب الشعر سحر ما كتبته بعد
* لمن لايُنسى:عبدالرحمن الرشود_الله يرحمه_
"لطالما صرّحت له بحبّها "