الشاعر محمد الأشقر ( شاعر الجبلين ) رحمه الله من أعمدة الشعرالنبطي في جزيرة العرب
( دار الغرام )
دار الغـرام ولـف بالقلـب لافــوف
لاع الولـع قلبـي وروحـي صرمهـا
انا وليع مـن عنـا العيـن مشفـوف
سيف الهوى بالحـال يلحـى لحمهـا
القلب رفرف وانغرف غرف بصـدوف
والروح فوح الجـوح يلفـح فحمهـا
مرهوق زاهق غارق حـرق منحـوف
ولـه ذهيـل هايـم فــي غرمـهـا
بلجوج موج النجل والسجل مشغـوف
وهروج بنج الغنـج روحـي حكمهـا
جسر الغرام ابـرا معـي زل بزلـوف
نـزع الزغـازغ زلزلـه عـن قدمهـا
مانيب كـف العـذل عنـي بمعـروف
لا تبحـثـه بالله يقـبـس لغـمـهـا
الله خلق بالنـاس نـاسٍ بهـا نـوف
والشمس ما تخفى العرب مع عجمهـا
كاس الهوى بالباب الأسباب مـذروف
من ذاق رشف شفـاه يفـرق طعمهـا
لولا الهوى مارشرش الريم بخشـوف
والناس نسناس الهـوى هـو نسمهـا
خشفً عفر فارع ظفر عشر مكشـوف
تـل القلـوب وسلـهـا واستلمـهـا
رعبوب راعب كاعب طرب غطـروف
عمهـوج داعـج لاعـجً عـاج فمهـا
مغدور باهربه بهـا البـدر مصـروف
مسلـول عنـقً عندلـي راق دمـهـا
تمشي تهز الخصـر تنعـاج بعطـوف
مال الهوى به مـال عـوذا كصمهـا
بعيونهـا رايـات وايـات وحــروف
ترمـي هـل الغايـات سـم سهمهـا
كن البرد فاها ورى الـورد مصفـوف
وخـدود بـه وجـات جمـر زحمهـا
مـادار دور نهدهـا نــز بـوقـوف
نشوً نشى مانيـش مشمـش حرمهـا
واكثـل كثيـلٍ لـه كثاثيـل وزلـوف
يلعب على هاضـم ضميـره هضمهـا
عفرا برا طرز الطـرا صـدر واردوف
اطخم طخم طخـم الطراخـم طخمهـا
شربت شذى شذر الهوى كمع وكفـوف
من طاح بتفاحه حـرق مـن وحمهـا
تظلم وجيه البيـض لابـان بكسـوف
لاطـب حفـلاة المهـا هـو صنمهـا
قلـت آه وويـلاه ولهـان ملـهـوف
مجروح روح ابـروح روحـه عدمهـا
يانـاس خلونـي احوفـه واباشـوف
لا موت فوت وناضـري مـا فهمهـا
يسلب قلـب المبتلـي فيـك مكلـوف
ارفـق تـرى نفسـي تقطـع وذمهـا
امنع طريـح طـاح بيديـك مكتـوف
سلم العرب مـن سالمـه فـي لزمهـا
رد النظـر زيـن التعازيـل بهنـوف
قالت سنا نـار الهـوى مـن كهمهـا
حنـا عريبـات نجيبـات وعـفـوف
جواهـر السلطـان دونـه خدمـهـا
حنا كمـا خـزن بالآرصـاد مسقـوف
بالـك يغـرك سمهـا فـي دسمـهـا
قلت ياريم بدلت الرجا منـك بالخـوف
العفـو عافـاك الولـي عـن وهمهـا
ياريم قلبـي بـه نـدم دوم وحسـوف
العـبـد زل وزلـتــه ماعلـمـهـا
قالت كفـى لاتكلـف النفـس بعنـوف
ايضـاً ولاعـاب المنابـر شممـهـا
ياذيب قلبـي طافـح فـوق بشنـوف
مـالاق عينـي مـن يوالـم ولمهـا
ماشفت من يملى النظر كـل ماشـوف
والنفس يشهـد عزهـا فـي قرمهـا
ياذيب شفت وعفت اشكـال وصنـوف
صيغن وشغلن وإهدنـي عـن قدمهـا
ياذيـب جـودت المعاليـق برضـوف
ذكره عطـف قلبـي وكبـدي هشمهـا
ياذيب لاجله نرخص الحـال بلطـوف
قلبـي كفـخ والنفـس حبـه زهمهـا
جت له على حسنـاه هـدوً بنفنـوف
سلمتهـا تسلـيـم سـالـم عملـهـا
دار الغـرام وصفـق القلـب بكفـوف
والعيـن تـوه تهتنـي فـي منمـهـا
وصلوا عدد حرف على الطرس وزروف
على النبـي المصطفـى بـه ختمهـا
اللهم صلي وسلم عليه