[مرعي ونيس]

تقسم برب عيونها امـس رفـت
...تبي تشوف اليوم ناسن عزيزيـن

واليوم جيت اشوفهـا واستكفـت
...تبيني اكتـب سالفتهـا عناويـن

جت نورت عيني وراحت وطفـت
...كل النجوم اللي بسمايه من سنين

احيان اقول لقلبي ياخـي توفـت
...يقول طيب ماخلـق ربـي اثنيـن

اقـول الا بـس كفـت ووفــت
...الله معاها.. والسهـر والدواويـن

ياكثرهن ياقلب وش بـك تلفـت
...يمين شف يسـار يسـار يميـن

هذيك شفها بالكوفي شوب غفـت
...وهذيك زول وطول ومع الدلع عين

وهذيك تناظرلك وذيـك استخفـت
...وهذي تبي تجني على المستهيمين

قال ايه لكـن هـي وانـا مزفـت
...تنبت على ضحكة ثغرها بساتيـن

من غابت عروقي من الدم جفـت
...راحت وباقي عطرها بالشراييـن

تركض معـي والمـوت لياتعفـت
...أنفاسها تنفث بصدري شياطيـن

هي اللي ياقالت لنا العيـن رفـت
...نجي قبل لا يرتد الطـرف للعيـن