[عبدالله صلال العساف]

( أخو إفلانه؟؟)
خلّك مثل ناي الحزن
في لجّة الأفراح
يهنّي الناس بأحزانه
خلّك وطن
لاجاع الفقير وصاح
يلقاك أهْله وأخوانه
خلّك بيت
يِحظن أهْله والاغراب
واذا للضيف طيفٍ لاح
في وجهه
تضاحك كل بيبانه
خلّك اذا مال الرّفيج
في وجه الزمان وطاح
كفوفٍ تحمل أحزانه
خلّك جبل
الكل في ذراه يرتاح
وّوفي مايعرف إخيانه
خلّك سر
ماله بالبشر مفتاح
ويهاب الكل بركانه
خلّك يم
لو كل البشر ملاّح
ماتعرف إشبحضانه
خلّك لوْ تروح أزمان
لو يتْبدّل الانسان
لو تذبل وجوه
وتنكشف ألوان
خلّك دوم أخو إفلانه
خلّك دوم أخو إفلانه
خلّك دوم أخو إفلانه