معدل تقييم المستوى: 21
كل يوم الصبح بابا يفتح برنامج صباح النور يا بلدي .. في الراديو طبعا و احنا رايحين مشاويرنا و دواماتنا .. و أنا ع حسب مزاجي أتكلم ، أساسا ما أحب أتكلم في السيارة بالنسبة لي هذا مكان للتسريح و التفكير .. أتأمل في كل شي ولو اني ما أركز في أي شي غير أفكاري .. بس بطبعي انتقادية نوعا ما إلا ما يجي شي في البرنامج يلفتني و أنتقد .. و أهمها دلع البنات الي يتصلوا و نبدأ أنا و أختي سمسم نحش :d اليوم وصلنا عالمستشفى نوصل أخواتي و لفتني انه على بعد 4 أو 5 أمتار تقريبا في لافتة " مكان مخصص للتدخين " ما قدرت أمسك نفسي الصراحة .. ما عجبني الموضوع .. أول شي ليه يحطوا مكان مخصص للمدخنين .. " طبعا أنا ضد الدخان و المدخنين " ثاني شي .. طيب فلنفرض مالقيوا حل مع المدخنين قالوا نفتك من شرهم و نحطلهم مكان ينفثوا رمادهم فيه .. بالعقل ؟! مكان استراتيجي 5 امتار جنب الباب الرئيسي ؟!!! الحين لما يجي ضيوف ولا وفد ولا أي أحد .. حيقولوا للمدخنين أكيد لو سمحتوا ممنوع التدخين طيب من الأساس ليه تحطوا في مكان زي كذا .. غير استراتيجي أبدا .. ولا هي حرياتنا مقيدة بمين جاي ومين لأ ؟! يعني لما عاملين ديموقراطيين .. حطوا لهم مكان ما تجروهم منه لما تبغوا تحافظوا عالبرستيج ... .... و دخلنا في نقاش أنا و بابا هو شايف انها فكرة جميلة .... طبعا أكيد هو مو ضد المدخنين و أنا أشوف انه ماله داعي يحطوا مكان و بعدين في ظرف ما يروحوا يقولوا لا معليش ما تدخنوا هنا الزبدة ... أنبسط كل يوم أطلع فيه معاه حتى لو نتناقش و بحدة .. انتهينا أقله : حرية رأي يا بابا انت ليه زعلان .. هذي وجهة نظري / و هو يقلي: بالله خليك في اختبارك خخ و كله كوم و لما أنتقد البرنامج كوم ، أحسه مستعد يرميني من الشباك بس أحبه