[ناصر حطاب الدهمشي]

السلام عليكم و رحمة الله و بركاته ..

[ وجهك بلادي ]



هي ليه الأيام قبـل إتحدّنـي للمغيـب
,,,,,,,,,,,,,,,, إتوصِّي الدرب لا مـرّك غريـب اقتلـه

مقتول من يوم حلقي ضاري ٍ للحليـب
,,,,,,,,,,,,,,,, لا تتركيني تراك أكثر من احتجـت لـه

دوَّرت بين الوجيه و لا لقيـت الحبيـب
,,,,,,,,,,,,,,,, إلا سديمك قبـل يلقانـي ارتحـت لـه

وجهك بلد لا دخلته مـشعر إني غريب
,,,,,,,,,,,,,,,, أنسى هموم ارتحالي كل ما جيـت لـه

خلف المحاني وشمْتِه و الزمان الصعيب
,,,,,,,,,,,,,,,, نتـّل ضلوعي يبيـه و لا قـدر ينتلِـه

لي داخله ذكريات إتشيـل آه و تجيـب
,,,,,,,,,,,,,,,, أصدق تفاصيل من كلْ غايب اشتقت له

بأعلى حواجبْه ذيبة .. تحتري زول ذيب
,,,,,,,,,,,,,,,, و بشفتينه حمامة صوتها صـوْت لـه

فيه الأماني بعيـدة ..والتلاقـي قريـب
,,,,,,,,,,,,,,,, أقرب من الشعر لا جاني .. و غنيت له

وجهك بلادي ولا اقدر عن حدوده أغيب
,,,,,,,,,,,,,,,, لو ضايقه صيف , وجه الغيم حوّلت له

تدرين جسمي متى من هالمواجع يطيب؟
,,,,,,,,,,,,,,,, لا صار صدري على طول العمر بيت له

وجهك تعدّا مفاهيـم البلـد و الحبيـب
,,,,,,,,,,,,,,,, الله و امانه وهو جوَّاي .. حنيـت لـه


لـكل عين قرأتني ... شكرًا : )
.
ناصر حطاب الدهمشي