دخول
----------
والله قهر
مدري من اللي يسرق احلام القدر
مدري وش اللي يجعل السكه ظلام
ويجعل الخطوه سهر
ليه السفر
لما ينزل شنطته عن عاتقي
القى سفر
وليه المواني ظلمها
ماريّح امواج البحر
والله قهر
يطيح الليل من كتف النهار ويحملَه كتفي
----------------------------------- ويندى بي جبينٍ من تعبْه يطيّح نْجومه
وامسِّحها باصابيعٍ يبان بوصفها وصفي
-------------------------------- نحيل..مشَقَّقٍ وجهي..شفاتي حيل مقظومه
تشابهني واشابهها..تجمَّع نزفها ونزفي
---------------------------- بأطهر دم و(اطهر حرف)صارت سحر منظومه
لعين غياب مقفوله/ونام بنونها[حتفي]
------------------------------- وإيد وصال مشلوله/بها الرامي معَ سْهومه
تعال وشوفني قدام/انا مليت بك خلفي
-------------------------------- وسكينك على ظهري/بلون البعد مرسومه
اذا جيتك..وحثّيت الخطا/في رحلتك تقفي
--------------------------------- واذا وقفت..ابي تقبل/تحث خطاك للشومه
على وجهي ملامح خوف/والأكثر منَه مخفي
-------------------------------- مـ بين ظلوع محرومه وبين آهات مكتومه
وفي كفّي رعيش الصدّْ/والعبرات في طرفي
------------------------------------ تكفِّي لو تناظرها عن الخفّاق وعْلومه
تعب صوتي..تعب ساقي..تعب من ساعتي وقْفي
-------------------------------- تعبت آشيل هذا الليل من يومه إلى يومه
متى نتقاسم الحمل الثقيل وكتفك بكتفي
-------------------------------- نشيل الليل وآهاته/ونسهر نحْسِب نْجومه
خروج
---------
يمكن يفيق
ينفظ جفونه من غياب
ويخطف كفوف الغريق
وين الطريق
اللي يوريك الإياب
ويمنحك(تبليل ريق)