.
.
.
غني تفوح الذاكره ناس .. وتلاويح وبلاد
لا تهودنين الحال يتقمص .. حنين الميجنه
مثلي تماماً لا أشتعل بوحي وغطاة الرماد
تطغى ملامح بوهتي آهات وأبدا الهيجنه
في داخلي طفل أبـ مواجع وأمنيات وسندباد
مرت على صدره ليالي مستحيلة / ممكنه
يا كثر ما طشيت تغريبة قوافي لـ العباد !
ظنك تجي لحظه ترف ويفج ليل وحنحنه
يمكن يموج أفـ آخري صوتك وترتيلة براد
وإذا سألتيني من إيّة ناي قلت مْن أحزنه
يا ممطره جيبي معاك الغيم في صدري جراد
يا هو نفض كل أخضر أفـ صدري وذبلت سوسنه
أنتِ بريئة من زمان الوصل لكنّ الوكاد :
أنك تفاقمتي بـ روحي ليييين ضاقت أمكنه
تعالي لو غرك حنينك ماورى الرحله بعاد
أنا معك في حالة الممشى ... قوافي مزمنه
لو يرتمي طيفي على عيونك ينومسه المداد
كلي أحيكك في عتب عمري هدوء ومسكنه
حتى ولو صمتك يدثر أغنياتك
ـــــ ليييش عاد ؟
ماقلت لك صوتك إذا جاني بـ أطييير وبـ أحضنه ؟
خلي شبابيك الألم تغفى ... بـ جنب الإفتقاد
بـ يْمرها صبحٍ عصافيره تجي له مدمنه !
غني يذوب الصمت يوم أنّه سكن صدرك جماد
غني : قسم بالله في صوتك مواطن سلطنه !
غني : أبي عيني تسولف لك عن أحلام السواد
اللي فرض في دنيتي طيش ومنافذ هيمنه
غني : أنا محتاج لك تمحين من عمري حماد
مشيتها / وأوقاتها عشرة ثواني عن سنه !
غني : أنا مُتعب يجوز أنّك تكونين الضماد
لا تهودنين , اليوم في صدري أغاني ميجنه
.
.