[عبدالله مدعج]

عام انقضى بين راحة غيبتي والتعب ..
... لا الحزن حزن القصيد..ولا الوجيه الوجيه

أشعر بشعــرً عظيمُ حالمً ما أنكتب ..
...قــريب مني تعبت أستنطـقه وارتـجيه

أن كان هو بحر صدق شلون بحر ونضب..
... أن كان هو جزل أجل وشلون شحت يديه

نشــب وهو كان قبل /اللي يحل النشب..
... تعبت يا أحمد وهو غايب تعبت أحتريه

أكثر من الضيق في صدري ملام وعتب..
... وأكثر من اللوم وعتابي وحشني وأبيه

هو صوتي اللي نذرني للسكوت وهرب..
... هو دربي اللي تـركني للضياع أقتفيه

هو السبب يوم أدور لاختلافي سبب..
... هو أنتمائـي لـيا دورت شي انتميه

والبارحـه بعد ما مل الغياب أنسكب..
... كأنه /الماء ,وكن الوقت/رمضاء وتيه

أو كنه :دموع فرقا ,واليدين:الهدب..
... من وين ماينتهي حزن البطا تبتديه

كل ما كتبته عن العزم ,المحال انشطب..
...كل ما قريته لقيت أحلامي البيض فيه

غاب ومعي شوق واحلام وحبايب وحب
..ورجع وأنا مامعي غيري وحيد أحتريه