[فالح البريكان]

[poem=font="Traditional Arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
غطرست نزوات فكري واوهم العقل بسكونه = واستشفيت المكيده يوم شمّيت الخيانه
وهدد الفكر انسحابه ومارضيت اقعد بدونه = وارتضيت لعنف طيشه واستمر بعنفوانه
يالله الخيرة يشارف عقلي الواعي جنونه = ومن هبالي كنت احسب اني انا عاقل تكانه
ياسمو الفكر تدرك لاتجيك اوهام خونه = لان حرب الزيف قام وبالسما عانق عنانه
كل عاقل بالزمن هذا يكون الله بعونه = وقت فقدان المبادي خلخل العقل اتزانه
كان سلم من انحرافه مات حسه من طعونه = وكان سلم وحي حسه.. الردى زلزل كيانه
ان شمخ راسه مهابه تقصر الطالات دونه = مالحق ادنى شموخ وماكفاه اقصى اهانه
خل عندك ياعزيز الروح بالدنيا مرونه = وخل عقلك بالوسط مابين خفه والرزانه
ان قسا ظرفك عليك تواجه القاسي ليونه = وان تهنيت برخاه اشتد لايغدرك زمانه
ماصبر غير الذي يعض شاربه بسنونه = حارب النفس بهواها وامتطى صهوة حصانه
المراجل للحريص من الرجال يبين لونه = والردى كلن يعرفه مايبي فهم وذهانه
الشجر لامات حت اوراقه اللي في غصونه = والمسيل الماء بدابه في مسيله من طمانه
ولو صدق كذاب مره العرب مايصدقونه = ماشفعله عند ربعه علمه وكثر احلفانه
وكل شكاك استشف الشك من اسواء ظنونه = ولو بداء باحسن ظنونه صار شكه في مكانه
الشجاع ان زاد فقره ضعف مانامت عيونه = فضل يموت بشجاعه عن مدى الدهر باهانه
من يقدّر ذات نفسه الجميع يقدرونه = ترفع الراس المتون وتحكم الهرجه لسانه
ياكثر مايزل طيّب منطق الفاظه تخونه = او من الجسره كلامه زاد من باب الميانه
وانتهزها محترف والنم فنن من فنونه = من ضياع المجتمع مقرود مليانن عفانه
يرتكي ويمد رجل وتلوي شماغه متونه = وبالتشدق والنذاله ياصل لسانه لاذانه
عاش عمره باستجابة دعوة الام الحنونه = ولا هو ماله مكان ولابحياته اي خانه
المهم ان كل واحد له خصوصياته وشونه = ويتفاوت طيب طيّب واول الطيب الامانه
وكل شي الا اربع السيّات (خاخات) المهونه = الخلاسه .. والخباله .. والخساسه .. والخيانه[/poem]