إلى متابعي ومشرفي ،،،،أبعاد الشعر الشعبي ،،،،بعد التحية
لكم هذه المقطوعة البحرية ،،،،من بواكير سلسلة (بحرينيات )
ألا يا بحروالله إن فرقا الولايف شيـن
ولا انته بحريني ولا نيـب بحرينـي
غريبين دارك وين وأنا ديـاري ويـن
عسى الله يكون بعون كل الغريبينـي
تلاطم مياهك ضايق الصدر يا مسكين
لعله يروفك من يـروف المساكينـي
يمرك خلي البال مالـد فيـك بعيـن
وأنا ساع شفتك عنك ما حولت عيني
أحس إني أعرفك منول مهوب الحين
ولو إن ما من معرفـه بينـك وبينـي
اعرف الوجيه اللي نحتها العنا والبين
على قول راع السالفة خبزة يد ينـي
وعرف الدموع اللي على وحده وثنتين
تعلـق بعينـك كنهـا تـا تناديـنـي
اقدر ظروفك ونت دمعك يبل الطيـن
وأنا كيف ألومك وأنت دينك على ديني
وأنا قصتي يا بحر قصه تهز الصيـن
لها في وجيه أهل الكرامة عناوينـي
لها جرح يبقى في خفوقي ليوم الدين
اجل عاد وإنها قطعة مـن شرايينـي
تبي تشتكي لي غيبة الأهل والغاليـن
أنا مثلك اشكي غيبة أهلـي وغالينـي
تبي تشتكي لي حي اقفى مع المقفيـن
أنا ما عرفـت ألا وجيـه المقفينـي
تبي تشتكي لي طعنه السيف والسكين
تهايق بصدري وأنت تلقى السكاكينـي
وإذا كان تا تبكي وتنثر دموع العيـن
تراني على حد البكـا لا تبكينـي!!؟
دخيلك كفاية لا تجيني بوجـه شيـن
أنا اللي لقيته مـن زمانـي مكفينـي؟
أقوله ويا درب الشقا متعب الماشيـن
على وين يا درب الشقا تـا تودينـي
وألا يا بحر باكر يجينا بوجـه زيـن
يبا الله يفرجهـا علينـا قـلَ آمينـي