[poem=font="traditional arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
يا كثر الأفكار تسبح في فضا بالي=تزهمني حروفها من قبل لأزهمها
لاجرهد الليل دكّ الصدر همالي=سيله يفج الحنايا لين يوسمها
عزي لحالي ليا من صرت بلحالي=ونوافذ الصبح ابدت لي تجهمها
ياليل ياكم فقدنا واحد ٍ غالي=كانت هنا جرته والوقت دمدمها
تعبت من كثر ماطيفه يورالي=واشعر بفقده وعبرة وجده اكتمها
ياكم تغنيت لعيونه وغنالي=ذكراه للحين ما بادت معالمها
لاطرف الليل واقبل فجري التالي=جتني عسوسه ملففة عمايمها
كني بها لادنت مني وانا سالي=تنشد عن الحال وتجدد مأتمها
لويكسي الحزن صدري ثوبه البالي=انا دموعي قبل شوفه مولمها
رياح الأيام تنحت شامخ جبالي=وانا بعون الولي والصبر أقاومها
لوكل شي تمنيته تهيالي=ماكان نفسي هبوب الياس حطمها
والساقي اللي يمر (بسدرة آمالي)=لوشح في ماه مالانت عزايمها
ولو ينبت الحقد بين وجيه عذالي=ماشفتني عندها وبروحي اخدمها
اكون عالي ولكن غير متعالي=وان شفت ذرة كبر في نفسي اخزمها
العذر طبع الكريم وحكمة الوالي=تخون الأعذار هقوة من يقدمها
ياكثر (الأسماء) في بالي وجوالي=لكن ماهو كــلّها دايم اكلمها
الا الذي في خفوقي منزله عالي=لا والله إلا ثوانيه اتغانمها
لاضاق صدر الحياة وشانت احوالي=نبرات صوته جيوش الهم تهزمها[/poem]
عطاالله ممدوح