[بسام الرميلي]

من بخل بالشي راح.. ولـو تنادي الفقر جاك
يـا بخـيـلٍ بـالـمـحـبّـة جـعـلـك الله ما رويـت

جيت لك والقـلب ظامي مرتجي منك عطاك
لـو دريت البخْـل منّـك ما وصلتك لو ظميت

أذكـر إنـي وافـيٍ لـك يـوم مـا حـظّـك رماك
جـيـتني و الهمّ صابك داخل ضلوعك يـبيت

جـيـتني ودّك أضمك و انت تدري هو دواك
حين ما حظّي رماني ليتك اللي لي وفيت

ما هـقـيت إنك تصدّ وْ خـاب ظنّي في وفاك
كذّبـت عـيـنـي نظرْها وْ لا قـوَتْها ولا قِوِيت

ما هقيت الغيم يقوى يحجب الشمس بْسماك
والبلا إنه حجـبـها و لا سـرت زي ما هقيت

يا عزيـز النّـفس ودي بس اوضح لك خطاك
ما هي عزّة نفْس منّـك لـو تصدّ وْ لـو جفيت

عـزّتك فـي قـرْب مـن هـو ساكنٍ قـلبه هواك
يسكـنـك بيـن الحـنايا وْ لـك عـيونه لو غفيت

ما يهـمّك شـخـص غـيره لا ولا يهـمّه سواك
تـملـك الـدنيا بـقـربه لـو وَرَى قـلـبـك مشيـت

كـلّ دنياه بْـعـيونـك.. يا "عـيـونه" وِشْ بَـلَاك
لـيـتـك الـلي طـعـت قـلبـك يا إبِـيّ الـودّ لـيت

لـيت من هو علّـمك تقسى وَ حطّك في عماك
كـان درّاك بْـنـهـاية دربـك الـلي بـه سـريت

بـاكـر يْدور الزمان وْ يـرجـع يْـردك ظـماك
ما تلاقي غير قـبْر.. وْ غير دمعك ما جنيت

مـات حـبٍ كان طـبّـك و السّبَبْ قسوة جفاك
كـل يـومٍ فـي غـيـابـك زوّد فـْ قـبـره نـحيـت

مـات .. لا تـتـعب عـيونك ما يرده لك بكاك
وشْ يـفـيد اللي قـبـرْتـه لو على قبره بكيت ؟