[صالح العرجان]

لا تقطع ارحامك ويشملك الوعيد
ولا تخسر الغالي ولا ترخص غلاه

واخوك لا تخسره لو انه عنيد
يخطي مية مـرة وتسمح له خـطاه

وان كان شد الحبل حاول ما تزيد
ارخيـه قـبل الشـد يـوصل منتـهاه

ولا تنصحه وقت الزعل ما يستفيد
واعرض عليه النصح في ساعة رضاه

وليا طلب رايك عطه رايً سديد
وان ما طلبك الراي لا تبحث خفاه

واعرف ترى قرب المنازل ما يفيد
واحيان يبدي شي ما ودك تراه

لكن لا تقرب ولا تنزل بعيد
خلك على قول المثل حذفه عصاه

واحفظ حبال الود حفظك للوريد
اللي معلق فيه موتك والحياه

ترى الاخو مهما حصل يبقى عضيد
وترى عيال العم ما عنهم غناه

الناس دايم ما تهاب اللي وحيد
اللي ليا منه وقف محدً معآه