[وادرين]

( عويل النوافذ )

مرَّت سنيني والاماني فضَّلت درب الرحيل
_____________ وآنا وحيده ما معي مصباح واتـْهادى بْضياه

الحبَّ مفتاح الجراح وْاغنية قلبٍ عليل
_____________ البارحه غنيتها وْصاحت نجــوم الليل آه

ياكيف هذا العمْر يمْضي.. والخطاوي بْلا دليل
_____________ أسري لوين وْكلَّ دربٍ .. مظلم ٍ في منتهاه

هذي ثلاث عـْـقود أمشي والوفا مني يسيل
_____________ كم طعنةٍ مرّت عليَّ وْما اشْتكيت مْن الحياه

ماعاد لي غير الشعر يشعل بخـفَّـاقي فتيل
_____________ وآشوف به عتمة زماني صار لي قشِّ النجاه

الريح تعْصف والنوافذ ماتجيب إلا العويل
_____________الشارع البائس يجرَّ الفقـْـر والحسْره وراه

ياكيف أكفكف أدمعي والمشْهدَ قـْـبالي عليل
_____________ ما دام فيني عرْق ببْكي ليت للحرمان فاه

لابدَّ ما أحسب حسابي قبْـل ما ظهري يميل
_____________ واسقي ..بذور الحبَّ لين الحلـْم ينْبت من ثراه

غنَّيت ذاكرْتي وانا طفله تحت ظلِّ النخيل
_____________ مرجوحِتي / العابي وْحلمي المسافر في سماه

ياليتني أرجع صغيره لاهموم وْلاعويل
_____________ محتاجه الليله أبوي يْرتَّل لـْخوفي صلاه

هذا أنا وْكلَّ الأماني فضَّـلت باب الرحيل
_____________ من لي يعزِّيني إذا صار العمٌر فاقد ضياه

شعر : وادرين