[عبدالله عليان]

سرى هم ولفى هم ونسى يسري
لوى عنق الظلام ونوّخ الخاطر

ندهت الليل قعّدته على حجري
ورضعّته أسى أمس وغثى باكر

تصبّب ياقلم بنت الورق تغري
وانا اللي بي كثير وصفحتي عاقر

تعال انحت على وجه الورق قبري
اواري به ملامح وجهي الطاهر

تجي ساعة اضم من الوله شعري
وساعة العن الأشعار والشاعر

تعبت استر خطاي والبسه عذري
كرهت ارث السنين ولعنة الحاضر

تعرّي يالقصيدة واهتكي ستري
تهادي في صباك وحسنك السافر

ابي لا عانق شفاه البشر ذكري
يلوم اللي يلوم ويسخر الساخر

انا اللي بعت ليدين الزمن عمري
انا المغدور في حلمه وانا الغادر

شربت من الشقا لين امتلى صدري
همومٍ مالها أول ولا آخر

سكتّ ولا نفع صمتي ولا صبري
تعبت ولا عليهن كلهن قادر

اعرف الصبر لا يلهي ولا يبري
واعرف الوقت لا منّه جرح كافر

واعرف ان التعرّي للبشر يزري
ولكنه يريّح صدري الزاخر

ابا اعلنها كذا من ما درى يدري
انا هالحين خاسر . ويش انا خاسر ؟

.
تركي رويّع