[شهيق ورده]

- نايمه ؟

× إيه .. أوَّل مرَّه أخذ لي غفوه هالوقت مدري راسي مصدِّع ! وشفيك ؟

-لا تسأليني وش فيني ما أدري ؟

×كيف ما تدرين ؟ إحكي طيب أسمعك !

- أحس موضوع زواجي ما يعنيني ! كأني فيه من المعازيم ! كنت قبل أقولك عادي ما أستوعبت صح إني أبتزوج فوقت قصير ..بس بارِد إحساسي لأني أحس إنه موضوع يخص أهلي مو لي وحدي ؟!

× طيِّب يا قليبي شي طبيعي إنه يخص أهلك لأن أمر سعادتك يعنيهم و أكيد ..

- لاااااا ! إنتي ما فهمتيني ! أنا أقصد ..مدري والله شقولك بس صار الوضع بدل ما هو عادي .. حسيت إنه مفروض علي فرض وأنا علي السمع والطاعه كأي واجِب لازم أنفذه بدون ما أحس إني المعنية بالأمر!

× لا عاد ما يوصل لفرض .. أنتي استخرتي قبل ما توافقين صح ؟ يعني ما وقَّعْتي على عقد النِكاح إلا و ملائكة الرحمه والرضا والقبول حولكْ .. أنتي أتوقع تحسين إنك لمن إتخذتي هالقرار كنتي مسلوبة الإراده وإن رغبة أهلك هي إللي تحكمت في قبولك صح؟

- تقريباً ..إيه !

× لا يا بِنْتِي ليه فسَّرتِيه كذا ! الحمدلله والشكر كل البشائر حولك تدل على إنه خير لك بإذن الله .. وربي إني من أول ما قلتي لي عن خطبتك لهالإنسان وأنا مرتاحة إنه راح يكون مِلء قلبك ..وراح تكونين له ملء عينيه و قلبه ..ليش توأدين فرحة عُمرِكْ بهواجيس هدَّامه ؟! طيب إنتي الحين بإمكانك تحولين هالشعور السلبي لدافع إيجابي لك ..

-شلون طيب ؟

× إنتي الحين تعتقدين أو مؤمنة إن أهلك قرَّرُوا عنِّك حياتك الجايه ..وأنتي بس باركتي لهم بدون ما يكون لك تخطيط أو إختيار فعلي في شريك حياتك صح ؟ طيِّب ليه ما تنظرين لها من زاوية إن أهلك دفعوا بك لنقطة الإنطلاق لفردوس أعلى أنتي القادره على تشكيل ملامحه بنقائك وتلقائيتك .. قادرة تكونين مَلِكَة تحملين السعادة لقلب إختارك ملاكه الأبدي ..

-آه بس والله مدري ..بس خلص ما أبي أتكلم عن هالموضوع الحين ..

× أبشري .. بس أنتي قومي الحين صلِّي لِكْ ركعتين وأدعي ربِّك يشرح صدرك و إن شاء الله ما بعد ضيق إلا فرج ..

-إن شاء الله .. تصبحين ع خير أجل و كملي نومِك .

× أي أكمل نومي بس منِّك لله





(ليه دايماً نتقوقع في قرارت الآخرين الدكتاتوريَّه و نقرأ على أرواحنا الفاتحه إيذاناً

بمراسِم نحْر .. بدون ما نحاول الخروج من شرنَقَة الكَفَن إلى نُور الحياة ؟!)