مجنون شافك وأصبح اليوم عاقل
وعاقل في غيبك اصبح ترى مجنون .
هذه من رسائل جوال الرهيب
كانت الرسائل ٧٠ حرف فقط
وقتها كان للكلمة قيمة وتضطر تضغط
المعاني لما تطلّع صفوتها
هذه قيمة الكلمة كيف لو تكلمت عن قيمة المشاعر
اذكر شريت جهاز رهيب ب ٩٠٠ ريال
للان والجهاز عندي ويبي له بس بطارية ويشتغل
اللي يبي يستعيره لا يستحي المهم اذا خلص منه
يرجعه مو يسحب علي ..
اذكر اعطيت واحد من اخوياي واسمه مطلق أشرطة غنائية
نسخ اصلية في شنطة صغيرة مثل شنطة ادوات الحلاقة للرجال
على انه بيرجعها وجلس يماطل بي ويصرف وكل يوم
بكرة لما حجرته عند بيتهم بيوم وكان الوقت المغرب
والحارة هادية تعرفون العالم كلها تتقهوى وانا حاجره
لما حلف يرجع الأشرطة ههههه ضاق علي فترة وبعدها رضى
بعدها ما صرت اعطي احد أشرطة اصلية بس اخيره بين خيارين
اما أعطيه نسخة مسجلة ويجيني بعد يومين ثلاثة يستلمها
او يدخل المجلس ويسجل الشريط اللي يبي اما حكاية
اني افرط في النسخ الاصلية لا خلاص ..
حتى في الحب الامور تمشي كذا تثق فيهم وتعطيهم
ثم يبدأون يتلاعبون بك والنتيجة تعرفون وش ؟
خلاص تحتفظ بمشاعرك الأصلية وتبدأ توزع مشاعر منسوخة
بحيث ما تتألم اذا آذوها أو زهدوا فيها ..
صحيح يجيك لوم وممكن تتهم بعد لكن اللي ذاق يعرف
وماراح يلقي بال للوم
هذه الحقيقة المرة
واللي ضدها ويعارضها هذا حقه وانا كل حياتي اصلا
قائمة على اعتبار الاخر لا الغاءه حتى لو كان منطقه شاطح
او كان يحب المثاليات لاني ماني مثالي هههههه