[شيخه الجابري]

أتمنى أن يروق لكم هذا البعد الجديد:
.
.
...


--------
لا تسائلني متى شفت الصباح
السؤال من الأساس بدون روح


ولا تعاتبني على إحساس راح
كل ما نهواه فـــــ الآخر، يروح


ولا تظن أن العتب فالحب طاح
والله ما طاحت سوى دمعة نصوح


والسؤال اللي على حد الرماح
فيه منّك صد، وجروح، وقروح


هو سؤالٍ مر لو عذب القراح
من عرفتك في سما روحي يلوح


وهو سؤال المنتهى والافتتاح
أسكت وكل المشاعر لك تبوح


يشبه لطيف السهر صمت ونواح
كنّه إلاّ من عنا حزنه ينوح


مثل عطر الحب لي بالوجد فاح
من كثر شوقه شذا ريحه يفوح


يستطيلك هم، يجتاحك سماح
رغم جفوة قلبك القاسي سموح


كنت له أجمل شعور الارتياح
وصرت له أبشع مشاهد للنزوح


هي مراحل من نكوص ومن فلاح
سنّة المشتاق، والعاشق لحوح


كم أزال الشوك من دربك وزاح
وكم تِعبْه الصبر واحساسه جموح


تدري وش معنـى حنيني يوم لاح
وتدري وش يعني أموتك، يا شحوح


يعني أن القلب تملاه الجراح
وإنني رغم التعب كلّي وضوح


وانت تسألني عن طيور الصباح
والفرح والحب، والقلب المزوح


أصلاً الشيْ الوحيد اللي متاح
هو سؤالي في غيابك وين أروح؟
شيخه الجابري