[خالد صالح الحربي]

***
ــــــــ
_ ألوه..
هلا.. و مليون غلا..
_ الأستاذ.. نايف..؟!
أيه نايف بس بدون الأستاذ.. الله.. يخلّيكِ..
_ أخبارك.. نايف..
بخير.. جعلك بخير..
ماعليش من معي..؟!
_ معك.. نبيلة.. عبيد..!
هلا هلا هلا.. وغلا.. بشاعرتنا.. الكبيرة..
وشلونك ووين هالغيبة .. عسى ماشَرّ..؟!
_ أبداً..والله.. كنت سياحة بلبنان..
ولمّا.. أنضربت رجعت..!
أخبارك وأخبار الشعر..
والله فقدناكِ.. وفقدك جمهورك..
_ ماتفقدون غالي يانايف..
عندي قصيدة جديدة.. وحبيت أنّك تسمعها.. وتقول.. لي رايك..
وَلَو.. تفضّلي مع أنّي واثق إن الزين مايجيب إلا.. الزّين..
_ تسلم والله يانايف..
القصيدة تقول:

... الليلة اللي ما تطالع عيونك
ماهي والله من ألف ليلة وليلة

الله لا من قلت لي يافتونك
... أو قلت لي أحبّك موووت يانبيلة

أذوب كلّي وأنهمر لك في مزونك
... وعلى طول أصير مثل الفتيلة

فستاني الأحمر بدونك
... وشنهو ويّا الكحل والمكياج وهذي الجديلة

يااللي جنونك شاعري من فنونك
... أحبّك حب مصر لنيله..

أدري بأن كل البنات يحبونك
... بس حبّي لك غير لأني أصيلة..!

الله الله الله عليكِ ياشاعرتنا..!
ماعليش.. مُمكن تعيدين البيت الرابع..
_ أبشر والله من عيوني
تسلم عيونك

فستاني الأحمر بدونك
... وشنهو ويّا الكحل والمكياج وهذي الجديلة..!

ياسلام ياسلام ياسلام..
البيت هذا غير.. فكرته وصياغته..
وبلاغته.. وحبكته وبعده عن ربكته..
وتفاصيله ومحاصيله وشمسه وهمسه.. وَ.. وَ.. وش أقول بس..!
تسلم والله ياخوي وهذا اللي خلاني أخصّكم بقصيدتي
لأنكم من القلّة اللي تنصفون الشعر..
ولا يهمّك يانبيلة.. النص أعتبريه منشور..
العدد الجاي وإذا ماهو العدد الجاي اللي بعده..
بس أرسليه.. على أيميلي اللي بالمجلّة..
ولا تنسين كم صورة شخصية معه..!
أبشر والله ومشكور يانايف..
ولو لا شكر على واجب..


عند صدور العدد الجديد..
وفي الصفحة 64 يُصفَع المتذوّق المسكين..
بنفس النص وبمقدّمةٍ طويلة..ولكن بهذا الشكل:

الليلة اللي ماتمرّ بعيونك
... وشلون أسمّيها بلا حُب ليلة..؟!

الله لا من قلت لي يافتونك
... أو قلت لي أموت بك يانبيله..

أذوب كلّي وأنهمر في مزونك
... وأصير لعيونك كأنّي: فتيله..!

فستاني الأحمر وشنهو بدونك.؟
... والكحل والماسكر وطيّ الجديلة

ياللي جنونك يختصر لي فنونك
... محبّتك تشبه لمصرٍ.. ونيله

أدري البنات الـ يكرهوني يبونك
... لكنّك تحبْني وَلا هي قليله..


***
عمر تلك المجلّة المختصة بالشعر.. هو أكثر من 12 سنة..!
والآن عرفت لماذا لم تنشر للحميدي الثقفي وتركي حمدان.. ولو نصاً واحداً..!
السبب بسيط لأنّ الصفحة 64 محجوزة لمكالمة.. ساخنة..!
وسلامتكم،،