أذكرك مع صدح فيروز الأغاني
مع بداية عامنا ويش الجديد ؟
شوق ، وغياب ، وكسل مشي الثواني
وانتظار الباب ساعين البريد !
انتظرتك .. لين برد الما كواني
انتظرت بفارغ أحزاني .. وحيد
والليالي شمعها ذاب .. وبكاني
من كثر ما استرجع الذكرى واعيد
كل ما شوقي لشبّاكك خذاني
ردني عن شوفك السور الحديد
مرّ عيد .. ولا وصلت ، ومرّ ثاني
وانت تعرف ويش معنى ( يمرّ عيد )
ماني مغيّر مع الفرقى مكاني
لنّي أدري بك تجي لوّك بعيد