[خالد الداودي]

المشاركة الأصلية كتبت بواسطة عبدالعزيز العميري

(كحل الشمس)

لمشاهدة القصيدة يمكن الضغط على الرابط التالي :

https://youtu.be/gxe38hb1gf0

في مهب المستحيل يْضيع سيرك
______________ يا وحيد إلا منَ أصوات الجراح!
كلّ ما تزجر منِ الاغصان طيرك
______________ للشمال يْطير ويـْـصحّي اللي راح
ذي حظوظك كيف تهرب عن مصيرك
______________ وين ما ولــيّـــت وجهاتك رمـــاح
انــْــت ما غيرك لأحزانك أسيرك
______________ من شعَلــْـت شـْـموع حلمك في الرياح

وان تعبْت تـْـحــث في الغربة مسيرك
ارمي الاوجاع في حضن القصيد
واستريح
من عنا الحب القديم
وغني للأطلال لو قلبك جريح
علّم اللي ليلها باب وْملاذ الحالمين
انـَّها المسرى
ولو ضاع الفلك صارت فضاك
علــَّـم اللي ما نسى الربّان تبر رْمالها وسْهولها وجْــبالها
وعلـَّم اللي راح في محرابها يقرا عليها:

عليها مْن الحنين انشودة النهـّــام والــحادي
____________ عليها اللي خفى بالقلــْـب قـــبْـل تــْــبوحهَ الكلمة
إليها ان قلـْـت انا ضايق ويكـْسر شوقي فــــْـوادي
______________ تجي تنصب خيام اعراسها وترجّــع البسمــة
على جمْر الحنين حْجولها ترقص لأعيادي
______________ انا اعْـيادي إذا مرَّتـني بْـنـوبة ربــو نســمــة
تنفـّـس من ثراها الصدْر وازهر غيمها كادي
______________رقــت حتى "الظلام اجمل" بها لو أصبحت ظلمة

من زمان
وكانت اول شمْس خطـَّــت بالمحاجر كحلها
وقالت اصحى
هيم في كل الروابي والتلال
مع فلَج يبعث من الصحراء الظلال!
هيم وحدك كلّ واد
مع حوافر خيل شعرك
صبّ من نهـْـــر الدموع لـْوحشة الدفتر مداد
كلَّ ما في الارض ذكرى
لو تغيب
تستفيق مْن الرماد
من زمان:

قبل ظلّ الغيم يرخي فوق راس الظهْــر شاله
_________________ كان ما غيري على جْبال الحجَر ينقش هواك
همْت فيك وْضعْت فيك وْبالهدى بعْت الظلاله
_________________ جيت لك كتفي بنادق حرْف لبـَّت لك نداك
يا كثيرة كلّ ما يسْـتحـضر الشــاعر خـْـياله
_________________ يا قليلة في سما الافلاك ما يبصر سواك

مرت الايام وانتي
فيك مسرى للقصايد
فيك حتى الصخـْــر شاعر
كلَّ صبح يمرني بك
وانتشي
من اغنية فلّاح من ذكرى حبيبه
من زمان
من بيوت الطين وانتي تخرجين
ريحة الليمون فيك
والصبايا اللي على الافلاج تورد
عطرها بْكل السكيك
يا بلادي
كلّ صوتٍ حيّ يرجع لي صداه
الأناشيد واهازيج السنين
والكتاتيب القديمه
اسمع المرزاب ورْعود الشتا
وآشوف سقف البيت غيمه
مرّ هذا العمْر حلم
ومرّ هذا الحلم مذعورٍ حزين
والله انَّـي ما ابي أصحى
واقول:
ليت هذي الشمْس ما خطت كحِلــْـها في عيوني
وقالت اصحى !

عبدالعزيز العميري

والله قصيدة
قصيدة تستحضر كل التضاريس والاشياء الجميله لتشكلها في رسمة فنان
كنت اتنقل من هضبة الى هضبه والتلال تحاصرني
قصيدة ان نشرت ستقرأ بعد سنين بنفس جمالها الاخاذ

سلاما لك اخي عبدالعزيز

اهداء

ضايق وفي صدري كلام
اعشـــابه الخضراء يبست