احبتي جميعا اهديكم قصيدتي هذه ..والتي نشرة في مجلة وضوح الكويتيه وفي مجلة المرأه اليوم الاماراتيه
في ملف وهج الشعري ....متمنيا ان تحوز على اعجابكم
بلاتوه
أسابق خطوتي والدّرب ياخذ من خطاي إوجوه ؟
وألاقي عالرّصيف اعيون ناسٍ مايعرفوني
ثـرى يحـمـل إبـطـيّاته أثـر واحلام مـن مــرّوه
وانا مثـله تظم باحة اضلوعي ناس مـرّوني
وشبابيكٍ تـضاحك بعْـضها للدّرْب والـيمـشـوه
على شاطي ستايرْها رموشٍ تسكن اعيوني
وقهاوي شرْبت إمن النّاس ضعْف اللي بها شرْبوه؟
وكاساتٍ كسر وحشة فراغه قول صبّوني
وكـراسي فارغه تبكي غـياب اعـيون من حبّوه
جماد إيحن وأنا لاحنّلك قلبي يلوموني ..!!
ومسارح صاربه الـتّـمثـيل مجّاني بلا ابلاتـوه
بها نبض الحقيقه قـل والـتّزويـر قانـوني
وبحر ماملّت اضلوعه مجاديف الّذي طافـوه
تـطعـنْبه ويصيح ابطيب من هالهم زيدوني
وملابس لو حمل بصماتنا بعْضه يضل معتوه
تسمّابي وبعْض احيان بألوانه يسـمّـوني
تـذكّر قـصة الخبزه مـع التـنّـور والشـبّـوه
يومـنّه اسـتـوت قال لأهل هالنّار كولوني !!
ابدويٍ وأعشق الدلّه ويطربني صدى الهيدوه
وأصارع مجتمع يرفض قناعاتي ومضموني
بشر والخبز يافيصل غدى بعيونهم جاتوه
وأنا العربود يافيصل حصاه امشوّه اسنوني
تحضّر جسمنا وأكبر دليلٍ لبْسة المايوه ؟
وإلاّ اعقولنا ردّت ورى ياناس صدقوني !!
وتعالي ياللي لك بين الحنايا ابلاد ماشافوه
انا جيت اختبر حـبّـك وهالبسمات بالوني
على أجْدر هالبيوت اكتب احبّك والبشر يقروه؟
وانا من قبل لاتقرى الاوادم ..فيك يقروني
من اسولف للسطّور اسرار حبّك تستريح الأوه
وأتمتم في فضاء احضانك انتي اوْياه ظمّوني؟
وانا صاير طـريق إلهـشّعر واعيون حـبّـوه ؟
فـيه آشـوف هالعالم.. مـثـل مافـيه شافـونـي
على ارصفة الكلام افرش حروفي وأترك المشبوه
عشان ان طالع الكيّاف يلقى النّقش فرعوني
عسى لامن قرى حرفي بشر يقول لافض فوه !!
ويصفّقلي ابهدب عينن شرب من ثغر ماعوني
عبدالله صلال العساف