.
.
ملل والجو ياعاطف كئيب
ــــــ وانا ودّي أسولف لك شويّ
أبي أكتب على فرقا حبيب
ــــــ أو إني أكتب الحيرة عليّ
وقفت ولا لقيت إلّي قريب
ـــــ مشيت وشفت كل الناس زيّ
مقصٍ جار بيدين الرقيب
ــــــ دلو لكنّ ما فـ الدلو ميّ
تعبت أترحّم أنواري واجيب
ــــــ كلامٍ تعجز تخطّه يديّ
تعوّدت انهزم واسقط واغيب
ــــــ ولاكنّي أجي منصور بيّ
تخيلت الحروف أنسام طيب
ــــــ وجيت أشم طيبٍ صار غيّ
حسافة كل مافيني عطيب
ــــــ وعيني من هذاك الوقت هيّ
أبد ما جدّ ياعاطف نصيب
ــــــ ومحصولي بعد ماشاف ريّ
وصمتي صار ياعاطف غريب
ــــــ بعد ماكان لي ياخوي ضيّ
أكلني وإمتلا بالراس شيب
ــــــ وانا مانيب ناقص غير كيّ
وهو آخر دوا عند الطبيب
ــــــ إذا باقي لي من الروح حيّ
سكنت بدار من همٍ عصيب
ــــــ وشفت الدار للأحزان حيّ
صرخت ولا سمعت إلّي مُجيب
ــــــ سِوا صوتٍ صرخ ماقال شيّ
وجيت ارحل معا نفسي واغيب
ــــــ وأخذت إلّي قلم من غير فيّ
ابي أكتب على فرقا حبيب
ــــــ أو إني أكتب الحيرة عليّ