[رضا الهاشمي]

سلام امسالم ٍ ما يبغي احروب

ولا بينك وبينه حطّ له دوب

سلام النفس من شرّ البليّة

ومن سير البلا في عالم اخطوب

سلام امجرّد ٍ من كلّ حقد ٍ

وخبث ٍ ممتلي من لبس وإلعوب

سلام الحبّ من روح ٍ زكيّة

شذى الريحان في حزّات لغروب

سلام ٍ من سما اشواق ٍ رفعنا

طرايقها ولا قد مسّنا إلغوب

سلام ٍ من فضا العشّاق لامن

سرت بين الحنايا سدم واشهوب

سلام امحب يتخيّل حبيبه

ويتلفّت شمال وشرق واجنوب

سلام امفارق ٍ وجنة غوالي

غلاهم ما يشارك فيه محبوب

سلام وعاشقك من عقب صدّك

بدى ياخذ من الدكتورة احبوب

سلام و لهفتي لو هي سحايب

همى منها عشيق ٍ صبّ مصبوب

سلام و لوعتي ترسم خطاوي

معاها أختصر لك كلّ لدروب

ألا والغيبة اللي غيّبتني

فلولا من عليم بكلّ لغيوب

لكان أمسيت في جحر الليالي

فلا حدّ دراني وين مغيوب

ألا من صدّ ٍ أصلاني لهيبه

وما ظنّي لشوق العاشق إلهوب

ي منوة خاطري في كل حزّة

فلو كان التجافي منْه مهروب

لكان أقفيت عنّه لا أبالي

ولو ماشيّ غير الموت لي صوب

فلو ما للمحبة من لهايف

لما عاش الرجا ما بين لقلوب

يواسيني ف بعادك خدّ شوقٍ

على واديه دمع الصدّ مسكوب

أفتش عن خيالك ما ألاقي

سوى شوق ٍ على الأقمار مكتوب

أبي ألقاك ف عيون التلاقي

ولو أصنع من الفرقى تلسكوب

نفذ صبري ولا تمّت دراهم

عزاي وفارغات ٍ كلّ لجيوب

بلاك العمر كلّه في مشاكل

على وجدي تصب أيامي اكروب

كأن عين العواذل صوّبتنا

وصاب اقلوبنا من صوبهم حوب

ألا يا ريحة المحبوب خبْري

غلاي انْ خافقي بالحب مشغوب

ألا من عينه الدعجا سبتني

مثل ما تنسبي الخدّر بلحروب

تخزني ف بحر عين ٍ زاد جزره

كأنْ ما للبحر في العين منسوب

حجبني بضيّ خدّه لين فارق

فوادي وصار عن دنياي محجوب

فلو شيبوب حيّ ٍ قلت صوّب

فوادي من لحظها سهم شيبوب

كأن قلبي قبل ينصاب برج ٍ

سقط طوب ٍ ورا طوب ٍ ورا طوب

لها شمسٍ تحت غرّة شعرها

ضياها يخترق آفاق واحجوب

ألا ويلي وهي عنّي بعيدة

وما من شفّها يا ناس مقروب

ملاك ٍ كامل ٍ والله كامل

كأنْها خالية من كلّ عذروب

فلا خفّف عن الآهات وافر

ولا هوّن على الأشواق مسحوب

حذا جذع اللقى قضّيت شوفه

وعلى جذع الجفى أمسيت مصلوب

فيا مطلوب كم يطلبك طالب

ويا طالب وما يطلبك مطلوب

نكابد في حياة العشق حتّى

يجي من مهنة الهجران مكسوب

ألا فابعث ي قلبي منْك طارش

ويا خفّاق طرّش منْك مندوب

يشوف الخلّ ياللي لابسنّي

مهو بجنّي لكنْ هو للحشى ثوب

يُداوى كلّ داء ٍ مير داء ٍ

حواه الشوق ماله طبّ واطبوب

فلو كان الهوى يا ناس ذنب ٍ

عسى من حبّها يا ناس ما اتوب