حصان الشعر [
تركي حمدان ]
{
لا تحايد }
لاتحايـد .. لاتحايـد .. ولـو هـي بالعـنـاد
العنـاد ارحــم ولا الوقـفـة المستنـكـرة
الـف درب ٍ تستفـزك .. ولااظنـك جـمـاد
والله ان بعـض الجمـاد يتخيّـر مكـسـرة !
والشجـر إنسـان .. لكنـه اوغـل بالحيـاد
قل معي : ملعون شخص ٍ تشبّـه بـشجـرة !
كيف عقب الطيش والعيش في جـرح وضمـاد
يصبح اللـي لا رمـوه بحجـر طـش ثمـره !؟
عاد وان قلت: " الشجر جاد " قلنا: كيف جاد ؟!
دون أن يملك علـى منـع جـوده مقـدرة !؟
من عجز عن بخل .. ما للكـرم فيـه امتـداد !
مثل ما القدرة علـى الثـار سـاس المغفـرة !
يارفيقي واستمع لـي .. وخـذ علـم ٍ وكـاد
لايـغـرك مايقولـونـه اهــل البـربـرة !
انتهـى الماضـي وجينـا مـع علـوم ٍ جـداد
تنتـمـي للعـقـل ماتنتـمـي للمقـبـرة !
الكرم .. لـو كـان بـذل النفايـس للعبـاد
كـان مـا سـت الصبايـا تسمـى الجوهـرة
الكرم : أن ترخص الشمع فـي عـز ّ السـواد
الكرم : أن تمنـع الدمـع عـن وجنـة مـرة
والكريم : اللي عطـى النـوم لعيـون السهـاد
والشجيع : اللي غفـى مـا تذكـر خنجـره !
والله ان اللـي يحسـب الشجاعـة بالـزنـاد
مثل من يحسـب حـلاة الحديـث الثرثـرة !!
وانت تدري قلـة الهـرج مـن كثـر الرشـاد
غير شِعري لـو كثـر .. بالرشـاد استكثـره !
إيه شاعر واطلب الصفـح عـن ذنـب المـداد
في بلاد ٍ سـاوت الشعـر باكـواز الـذرة !!
والله اني ما حرثـت الـورق وارجـي حصـاد
مير شفت الارض تـرزح تحـت ثقـل صخـرة
واذكر انـي شفـت قلبـي وعشقـه بازديـاد
واذكـر انـي ليـن هالحيـن فكـري بعـثـرة
لجـل هـذا أكتـب الشعـر .. واذم الحيـاد
ولجل هذا قلت هالشطـر "
ليتـك تذكـره " :
"
الشجر:
انسـان ..
لكنـه اوغـل بالحيـاد "
قل معي : ملعون شخـص ٍ تشبّـه بشجـرة !
ما زال الشعر يصهل
